ಫರಿದಾಬಾದ್: ಕಳೆದ ವರ್ಷ ಭಾರತ ಮೂಲದ ಅಮೆರಿಕಾ ಉದ್ಯಮಿಯನ್ನು ವಿವಾಹವಾಗಿದ್ದ ಮಹಿಳೆಯೊಬ್ಬರು ತಾವು ತಂಗಿದ್ದ ಐಷಾರಾಮಿ ಹೋಟೆಲ್ನ ಸ್ನಾನದ ಟಬ್ನಲ್ಲಿ ಶವವಾಗಿ ಪತ್ತೆಯಾಗಿದ್ದಾರೆ.
ನ್ಯೂಜೆರ್ಸಿಯಲ್ಲಿ ಉದ್ಯಮಿಯಾಗಿರುವ ಅರುಣ್ ಕುಮಾರ್ ಎಂಬುವರ ಪತ್ನಿ ರಿತು ಮೃತ ಮಹಿಳೆ. ಹರಿಯಾಣದ ಫರಿದಾಬಾದ್ನ ಐಷಾರಾಮಿ ಹೋಟೆಲ್ನ ಕೊಠಡಿ ಸಂಖ್ಯೆ 631ರಲ್ಲಿ ತಂಗಿದ್ದ ಅವರು ಅನುಮಾನಾಸ್ಪದವಾಗಿ ಮೃತಪಟ್ಟಿದ್ದು, ಶನಿವಾರ ಮೃತದೇಹ ಪತ್ತೆಯಾಗಿದೆ.
ರಿತು ಏಪ್ರಿಲ್ 22 ರಿಂದ ಇದೇ ಕೊಠಡಿಯಲ್ಲಿ ವಾಸ್ತವ್ಯ ಹೂಡಿದ್ದರು. ಏ.26 ರಂದು ಹೋಟೆಲ್ನ ಸ್ವಾಗತಕಾರರಿಗೆ ಕರೆ ಮಾಡಿದ್ದ ಅವರು, ನನಗೆ ಯಾರೂ ತೊಂದರೆ ಕೊಡಬಾರದು. ವೇಟರ್ಗಳನ್ನು ಕಳುಹಿಸಬೇಡಿ, ಕರೆಗಳನ್ನು ನಿರ್ಬಂಧಿಸಿ ಎಂದು ಹೇಳಿದ್ದರು ಎನ್ನಲಾಗಿದೆ. ರಿತು ಅವರ ಸೂಚನೆ ಮೇರೆಗೆ ಹೋಟೆಲ್ ಸಿಬ್ಬಂದಿ ಕೂಡ ಯಾರನ್ನೂ ಕೊಠಡಿಯತ್ತ ಕಳುಹಿಸಿರಲಿಲ್ಲ. ಕರೆಗಳನ್ನೂ ನಿರ್ಬಂಧಿಸಿದ್ದರು.
ಈ ನಡುವೆ ಆಕೆಯ ಸೋದರಿ ಕರೆ ಮಾಡಿದಾಗ ರಿತು ಸ್ವೀಕರಿಸಿಲ್ಲ. ಇದರಿಂದ ಗಾಬರಿಗೊಳಗಾದ ರಿತು ಸೋದರಿ ಹೋಟೆಲ್ ಸ್ವಾಗತಕಾರರಿಗೆ ಕರೆ ಮಾಡಿದಾಗ ಅವರಿಂದಲೂ ಸೂಕ್ತ ಉತ್ತರ ಬಂದಿಲ್ಲ. ಈ ಹಿನ್ನೆಲೆಯಲ್ಲಿ ಹೋಟೆಲ್ ಬಳಿಗೆ ತೆರಳಿ ಕೊಠಡಿ ತೆಗೆದು ನೋಡಿದಾಗ ರಿತು ಬಾತ್ ಟಬ್ನಲ್ಲಿ ಶವವಾಗಿ ಪತ್ತೆಯಾಗಿದ್ದಾರೆ.
ಈ ಕುರಿತು ಮಾತನಾಡಿರುವ ಮೃತ ರಿತು ಅವರ ಸಹೋದರಿ, ” ರಿತು ಕಳೆದ ವರ್ಷ ಮಾರ್ಚ್ 3ರಂದು ಭಾರತ ಮೂಲದ ನ್ಯೂಜೆರ್ಸಿ ಉದ್ಯಮಿ ಅರುಣ್ಕುಮಾರ್ ಅವರನ್ನು ಎರಡನೇ ವಿವಾಹವಾಗಿದ್ದರು. ಅರುಣ್ ಕುಮಾರ್ಗೆ ರಿತು ಮೂರನೇ ಪತ್ನಿಯಾಗಿದ್ದಳು. ಮಾರ್ಚ್ನಲ್ಲಿ ಮದುವೆಯಾಗಿದ್ದ ಆಕೆ ಜುಲೈ/ ಆಗಸ್ಟ್ನಿಂದಲೂ ಭಾರತದಲ್ಲಿಯೇ ನೆಲೆಸಿದ್ದಾಳೆ. ಕೆಲವು ಬಾರಿ ಹೊಟೇಲ್ನಲ್ಲಿ, ಕೆಲವೊಮ್ಮೆ ಸಹೋದರನ ಮನೆಯಲ್ಲಿ, ಕೆಲವೊಮ್ಮೆ ಸಹೋದರಿ ಮನೆಯಲ್ಲಿ ಆಕೆ ಇರುತ್ತಿದ್ದಳು,” ಎಂದು ಹೇಳಿದ್ದಾರೆ.
ರಿತು ಅವರ ಮೃತ ದೇಹ ಸಿಕ್ಕ ಕೊಠಡಿಯನ್ನು ಪೊಲೀಸರು ತಮ್ಮ ಸುಪರ್ದಿಗೆ ಪಡೆದುಕೊಂಡಿದ್ದಾರೆ. ವಿಧಿ ವಿಜ್ಞಾನ ತಜ್ಞರು ಸ್ಥಳ ಪರಿಶೀಲನೆ ನಡೆಸಿದ್ದಾರೆ.
Comments are closed.