ಅಮೃತ್‌ಸರ: ಫೇಸ್‌ಬುಕ್‌ನಲ್ಲಿ ಪರಿಚಯವಾಗುವ ಗೆಳೆಯರನ್ನು ಹುಡುಕಿಕೊಂಡು ಹೋಗುವ ಪ್ರಕರಣ ಹೆಚ್ಚುತ್ತಿರುವ ಬೆನ್ನಲ್ಲೇ ಪಂಜಾಬ್‌ನ ಅಮೃತಸರ ಮೂಲದ ಯುವಕನೋರ್ವ ಪಾಕಿಸ್ತಾನಕ್ಕೆ ತೆರಳಿ ಗೆಳೆಯನನ್ನು ಭೇಟಿಯಾಗಿದ್ದಾನೆ. ಅಮೃತ್‌ಸರದ ನಿರಂಜನಪುರ ಗ್ರಾಮದ ನಿವಾಸಿ 24 ವರ್ಷದ ಅಮರ್ಜಿತ್ ಸಿಂಗ್ ಏಪ್ರಿಲ್‌ 12ರಂದು ಪಾಕಿಸ್ತಾನಕ್ಕೆ ಬೈಸಾಖಿ ಆಚರಣೆಗೆ ಸಿಖ್‌ ಜಾಥಾದೊಂದಿಗೆ ತೆರಳಿದ್ದ.
ಆದರೆ ಜಾಥಾ ಮರಳಿ ಬರುವಾಗ ಆತ ತಪ್ಪಿಸಿಕೊಂಡು ಫೇಸ್ಬುಕ್ ಗೆಳೆಯನ ಮನೆಯ ಹಾದಿ ಹಿಡಿದಿದ್ದ. ಅಮರ್ಜಿತ್ ಸಿಂಗ್‌ನ ಗೆಳೆಯ ಅಮೀರ್ ರಝಾಕ್‌ನ ಮನೆ ಪಾಕಿಸ್ತಾನದ ಪಂಜಾಬ್ ಪ್ರಾಂತ್ಯದ ಶೇಖ್‌ಪುರದಲ್ಲಿದೆ. ಅಮರ್‌ಜಿತ್‌ಗೆ ಫೇಸ್ಬುಕ್ ಮೂಲಕ ಪರಿಚಯವಾಗಿದ್ದ ಅಮೀರ್ ಪಾಕಿಸ್ತಾನಕ್ಕೆ ಬಂದರೆ ವಸತಿ ವ್ಯವಸ್ಥೆ ಮಾಡುವುದಾಗಿ ತಿಳಿಸಿದ್ದ. ಅದರಂತೆ ಗೆಳೆಯನ ಮನೆಗೆ ತೆರಳಿದ್ದ ಅಮರ್ಜಿತ್ ಅಲ್ಲಿ ಮೂರು ದಿನ ಕಳೆದಿದ್ದ. ಜತೆಗೆ ಏ. 21ರಂದು ವೀಸಾ ಅವಧಿ ಮುಗಿಯುತ್ತಿದ್ದರೂ, ಮೂರು ತಿಂಗಳ ವೀಸಾ ಇರುವುದಾಗಿ ಅಮೀರ್‌ಗೆ ಸುಳ್ಳು ಹೇಳಿದ್ದ.
ನಾಪತ್ತೆ ವದಂತಿ:
ಪಾಕಿಸ್ತಾನಕ್ಕೆ ತೆರಳಿದ್ದ ಅಮರ್ಜಿತ್ ಮರಳದೇ ಇದ್ದಿದ್ದರಿಂದ ಆತ ನಾಪತ್ತೆಯಾಗಿದ್ದಾನೆ ಎಂದು ಸುದ್ದಿಯಾಗಿದ್ದು, ಭದ್ರತಾ ಪಡೆಗಳಿಗೆ ತಲೆನೋವಾಗಿ ಪರಿಣಮಿಸಿತ್ತು. ಅಲ್ಲದೆ ಸಿಖ್‌ ಪ್ರತ್ಯೇಕತಾವಾದಿಗಳ ಜತೆ ಹೋಗಿರಬಹುದು ಎಂದು ಶಂಕಿಸಲಾಗಿದ್ದರೆ, ಮತ್ತೊಂದೆಡೆ ಆತ ಪಾಕಿಸ್ತಾನದಲ್ಲಿ ಯಾರಾದರೂ ಗೆಳತಿಯನ್ನು ಹೊಂದಿರಬಹುದು ಎಂದು ಹೇಳಲಾಗಿತ್ತು. ಜತೆಗೆ ಅಮರ್ಜಿತ್ ನಾಪತ್ತೆಯಾಗಿದ್ದಾನೆ ಎಂದು ಸಾಮಾಜಿಕ ತಾಣಗಳಲ್ಲಿ ಕೂಡ ಪ್ರಚಾರ ಮಾಡಿ ಪತ್ತೆಗೆ ಕೋರಲಾಗಿತ್ತು. ಈ ಪೋಸ್ಟ್‌ ಗಮನಿಸಿದ ಅಮೀರ್, ಕೂಡಲೇ ಪಾಕಿಸ್ತಾನ್‌ ಇವಾಕ್ಯೂ ಟ್ರಸ್ಟ್‌ ಪ್ರಾಪರ್ಟಿ ಬೋರ್ಡ್‌ (ಇಟಿಪಿಬಿ)ಗೆ ಮಾಹಿತಿ ನೀಡಿ ಅಮರ್ಜಿತ್ ತನ್ನ ಮನೆಯಲ್ಲಿ ಇರುವುದಾಗಿ ತಿಳಿಸಿದ್ದ. ಅದರಂತೆ ಇಟಿಪಿಬಿ ಅಮರ್‌ಜಿತ್‌ನನ್ನು ವಶಕ್ಕೆ ಪಡೆದಿದ್ದು, ಮಂಗಳವಾರ ಭಾರತಕ್ಕೆ ಗಡಿಪಾರು ಮಾಡಲಿದೆ.
Comments are closed.