ರಾಷ್ಟ್ರೀಯ

ಅತ್ಯಾಚಾರ ಪ್ರಕರಣ: ಸತ್ತ ಆರೋಪಿ ಈಗ ನಿರ್ದೋಷಿ!

Pinterest LinkedIn Tumblr


ಹೊಸದಿಲ್ಲಿ: ನಾದಿನಿಯ ಮೇಲೆ ಅತ್ಯಾಚಾರವೆಸಗಿ ಸೀಮೆಎಣ್ಣೆ ಸುರಿದು ಬೆಂಕಿ ಹಚ್ಚಿ ಕೊಲೆ ಮಾಡಿದ 25 ವರ್ಷ ಹಳೆಯ ಪ್ರಕರಣದಲ್ಲಿ ಸತ್ತ ಆರೋಪಿಯನ್ನು ದಿಲ್ಲಿ ಹೈಕೋರ್ಟ್‌ ನಿರ್ದೋಷಿ ಎಂದು ತೀರ್ಪು ನೀಡಿದೆ!

”ಸತ್ತ ಬಳಿಕವಾದರೂ ನಮ್ಮ ತಂದೆಗೆ ಅಂಟಿದ್ದ ಕಳಂಕ ದೂರವಾಗಿದೆ. ಅಲ್ಲದೇ ಸೇವೆಯಿಂದ ಅಮಾನತುಗೊಂಡು ತಡೆಹಿಡಿಯಲಾಗಿದ್ದ ಭತ್ಯೆ ಹಾಗೂ ಪಿಂಚಣಿ ಈಗ ನಮ್ಮ ಕೈಸೇರಲಿದೆ,” ಎಂದು ಆರೋಪಿಯ ಮಗ ಹಾಗೂ ಕುಟುಂಬದ ಇತರ ಸದಸ್ಯರು ಸಂತಸ ವ್ಯಕ್ತಪಡಿಸಿದ್ದಾರೆ.

1993ರ ಏಪ್ರಿಲ್‌ನಲ್ಲಿ ದಿಲ್ಲಿಯ ಸಫ್ದರ್‌ಜಂಗ್‌ ಆಸ್ಪತ್ರೆಗೆ ಶೇಕಡ 100ರಷ್ಟು ಸುಟ್ಟ ಗಾಯಗಳಿಂದ ಮಹಿಳೆಯೊಬ್ಬರು ದಾಖಲಾಗಿದ್ದರು. ”ನನ್ನ ಪತ್ನಿಯ ಮೇಲೆ ಆಕೆಯ ಭಾವ ಅತ್ಯಾಚಾರವೆಸಗಿ ಸೀಮೆಎಣ್ಣೆ ಸುರಿದು ಬೆಂಕಿ ಹಚ್ಚಿ ಸಾಯಿಸಲು ಯತ್ನಿಸಿದ್ದ ,” ಎಂದು ಸಂತ್ರಸ್ತೆಯ ಪತಿ ಆಗ ಪೊಲೀಸರಿಗೆ ದೂರು ಕೊಟ್ಟಿದ್ದರು. 2002ರ ಮಾರ್ಚ್‌ನಲ್ಲಿ ವಿಚಾರಣಾ ಕೋರ್ಟ್‌ ಆರೋಪಿಯನ್ನು ದೋಷಿ ಎಂದು ತೀರ್ಪು ನೀಡಿತ್ತು.

ಇದಾದ ಬೆನ್ನಲ್ಲೇ ಎಂಜಿನಿಯರ್ಸ್‌ ಇಂಡಿಯಾ ಲಿಮಿಟೆಡ್‌ ಕಂಪನಿಯು ಆರೋಪಿಯನ್ನು ಸೇವೆಯಿಂದ ವಜಾಗೊಳಿಸಿ, ಅವರಿಗೆ ಸಿಗಬೇಕಿದ್ದ ಭತ್ಯೆ ಹಾಗೂ ಮುಂದೆ ದೊರೆಯಬೇಕಾಗಿದ್ದ ಪಿಂಚಣಿ ಮತ್ತಿತರ ಸೌಲಭ್ಯಗಳನ್ನು ತಡೆದಿತ್ತು. ದಿಲ್ಲಿ ಹೈಕೋರ್ಟ್‌ನಲ್ಲಿ ಮೇಲ್ಮನವಿ ಅರ್ಜಿ ವಿಚಾರಣೆ ನಡೆಯುತ್ತಿರುವಾಗಲೇ 2016ರ ಏ. 3ರಂದು ಆರೋಪಿ ಸತ್ತು ಹೋದ. 2018ರ ಜನವರಿಯಲ್ಲಿ ಈ ವಿಚಾರವನ್ನು ಹೈಕೋರ್ಟ್‌ ಗಮನಕ್ಕೆ ತಂದ ನಂತರ, ಕೋರ್ಟ್‌ ಪ್ರಕರಣವನ್ನು ಬರ್ಖಾಸ್ತುಗೊಳಿಸಿತ್ತು.

ಇಷ್ಟೆಲ್ಲಾ ಆದ ಬಳಿಕ ಆರೋಪಿಯ ಮಗ, ”ನಾವು ಒಟ್ಟು ಆರು ಜನ ಸಹೋದರ/ಸಹೋದರಿಯರಿದ್ದೇವೆ. ತಾಯಿ ಮಾನಸಿಕ ಕಾಯಿಲೆಯಿಂದ ಬಳಲುತ್ತಿದ್ದು ಕುಟುಂಬ ನಿರ್ವಹಣೆ ಕಷ್ಟವಾಗಿದೆ. ನಮ್ಮ ತಂದೆ ನಿರ್ದೋಷಿ ಎಂದು ನಮ್ಮ ಮನಸ್ಸು ಈಗಲೂ ಹೇಳುತ್ತಿದೆ. ಪ್ರಕರಣದ ಮರು ವಿಚಾರಣೆ ನಡೆಸಿ. ನಿರ್ದೋಷಿ ಎಂದು ಸಾಬೀತಾದಲ್ಲಿ ನಮ್ಮ ತಂದೆಗೆ ಬರಬೇಕಿದ್ದ ಭತ್ಯೆ ಮತ್ತು ಪಿಂಚಣಿ ಸೌಲಭ್ಯಗಳು ನಮಗೆ ಬಂದಲ್ಲಿ ಆರ್ಥಿಕವಾಗಿ ನೆರವಾಗುತ್ತದೆ,” ಎಂದು ಕೋರಿ ಅರ್ಜಿ ಸಲ್ಲಿಸಿದ್ದರು.

ಮರು ವಿಚಾರಣಾ ಅರ್ಜಿಯ ವಿಚಾರಣೆ ನಡೆಸಿದ ನ್ಯಾಯಮೂರ್ತಿ ಎಸ್‌.ಮುರಳೀಧರ ಮತ್ತು ಐ.ಎಸ್‌.ಮೆಹ್ತಾ ಅವರನ್ನೊಳಗೊಂಡ ನ್ಯಾಯಪೀಠವು ಪೊಲೀಸ್‌ ತನಿಖೆಯಲ್ಲಿನ ಲೋಪದೋಷಗಳನ್ನು ಗಮನಿಸಿ ಆರೋಪಿಯನ್ನು ನಿರ್ದೋಷಿ ಎಂದು ತೀರ್ಪು ನೀಡಿದೆ.

Comments are closed.