ರಾಷ್ಟ್ರೀಯ

ಗರ್ಭಿಣಿಯಾಗಿರುವ ಸುಳಿವು ನೀಡಿದ ಸಾನಿಯಾ ಮಿರ್ಜಾ

Pinterest LinkedIn Tumblr


ಹೊಸದಿಲ್ಲಿ: ಖ್ಯಾತ ಟೆನಿಸ್‌ ಆಟಗಾರ್ತಿ ಸಾನಿಯಾ ಮಿರ್ಜಾ ಮಾಡಿರುವ ಟ್ವೀಟ್‌ ಒಂದು ಅವರು ಗರ್ಭಿಣಿಯಾಗಿದ್ದು, ಮಗುವನ್ನು ಬಯಸುತ್ತಿರುವ ಕುರಿತು ಸುಳಿವು ನೀಡಿದೆ. ಫೋಟೋ ಒಂದನ್ನು ಟ್ವೀಟ್ ಮಾಡಿರುವ ಸಾನಿಯಾ, ಮಗುವಿನ ಸರ್‌ನೇಮ್‌ ಮಿರ್ಜಾ ಮಲಿಕ್ ಇರಲಿ ಎಂದಿದ್ದಾರೆ.

ಜತೆಗೆ ಸಾನಿಯಾ ಪತಿ ಕ್ರಿಕೆಟ್‌ ಆಟಗಾರ ಶೋಯೆಬ್ ಮಲಿಕ್ ಕೂಡ ಅದೇ ಚಿತ್ರವನ್ನು ಟ್ವೀಟ್‌ ಮಾಡಿರುವುದು ಸಾನಿಯಾ-ಮಲಿಕ್ ದಂಪತಿ ಮಗುವಿನ ನಿರೀಕ್ಷೆಯಲ್ಲಿದ್ದಾರೆ ಎನ್ನುವುದಕ್ಕೆ ಪುಷ್ಟಿ ನೀಡಿದೆ. ಏಪ್ರಿಲ್ ತಿಂಗಳ ಆರಂಭದಲ್ಲಿ ಹೇಳಿಕೆ ನೀಡಿದ್ದ ಸಾನಿಯಾ, ಇಬ್ಬರೂ ಮಗಳನ್ನು ಬಯಸುತ್ತಿದ್ದು, ಕುಟುಂಬವನ್ನು ಆರಂಭಿಸಲು ಇದು ಸೂಕ್ತ ಸಮಯ ಎಂದಿದ್ದರು.

ಸೋಮವಾರ ಗೋವಾ ಫೆಸ್ಟ್‌ 2018 ಕಾರ್ಯಕ್ರಮದಲ್ಲಿ ಲಿಂಗ ಪಕ್ಷಪಾತ ಎಂಬ ಸಂವಾದದಲ್ಲಿ ಭಾಗವಹಿಸಿ ಮಾತನಾಡಿದ ಸಾನಿಯಾ, ಮುಂದೊಂದು ದಿನ ನಾವು ಮಗುವನ್ನು ಹೊಂದಲು ಬಯಸಿದರೆ, ಮಗುವಿನ ಸರ್‌ನೇಮ್ ಮಿರ್ಜಾ ಮಲಿಕ್ ಎಂದಿರಬೇಕೆ ಹೊರತು ಮಲಿಕ್ ಎಂದಿರಬಾರದು. ಇದರಿಂದ ಮಗುವಿನ ಹೆಸರಿನಲ್ಲಿ ಎರಡೂ ಕುಟುಂಬದ ಸರ್‌ನೇಮ್ ಇರುತ್ತದೆ. ಮಲಿಕ್‌ಗೆ ಹೆಣ್ಣುಮಗು ಎಂದರೆ ಇಷ್ಟ ಎಂದಿದ್ದಾರೆ.

ಅಲ್ಲದೆ ಗಂಡುಮಗು ಬೇಕು ಎಂದು ಬಯಸುವವರ ಬಗ್ಗೆ ವೈಯಕ್ತಿಕ ಅಭಿಪ್ರಾಯ ಹಂಚಿಕೊಂಡ ಸಾನಿಯಾ, ಕುಟುಂಬದ ಹೆಸರು ಮುಂದುವರಿಸಲು ಗಂಡು ಮಗು ಬೇಕು ಎಂದು ಕುಟುಂಬಸ್ಥರು ಪಾಲಕರ ಬಳಿ ಹೇಳುತ್ತಿದ್ದರು. ಆದರೆ ಸಹೋದರಿಯನ್ನು ಹೊಂದಿದ್ದರಿಂದ ಯಾವತ್ತೂ ಓರ್ವ ಸಹೋದರ ಬೇಕೆಂದು ತಮಗೆ ಅನ್ನಿಸಿರಲಿಲ್ಲ ಎಂದಿದ್ದಾರೆ.

ಗಂಡು ಮಗು ಬೇಕು ಎಂದು ಒತ್ತಾಯಿಸುತ್ತಿದ್ದ ಚಿಕ್ಕಪ್ಪ-ಚಿಕ್ಕಮ್ಮನವರ ಬಳಿ ಗಲಾಟೆ ಮಾಡಿದ್ದ ಸಾನಿಯಾ, ಕುಟುಂಬದ ಹೆಸರನ್ನು ಮುಂದುವರಿಸಲು ಗಂಡುಮಗುವೇ ಬೇಕಾಗಿಲ್ಲ, ಹೆಣ್ಣುಮಕ್ಕಳು ಕೂಡ ಸಾಕು ಎಂದಿದ್ದಾರೆ.

ಅಲ್ಲದೆ ಮದುವೆಯಾದ ಬಳಿಕವೂ ಸರ್‌ನೇಮ್ ಬದಲಾಯಿಸಿಕೊಳ್ಳದೆ, ಅದನ್ನೇ ಉಳಿಸಿಕೊಂಡಿರುವುದಾಗಿ ಸಾನಿಯಾ ತಿಳಿಸಿದ್ದಾರೆ.

Comments are closed.