ರಾಷ್ಟ್ರೀಯ

ಹೀಗೊಂದು ಯಾರೂ ಊಹಿಸದ ಪತಿ ಪತ್ನಿ ಔರ್‌ ವೋ ಕಥೆ

Pinterest LinkedIn Tumblr


ಕೋಲ್ಕತಾದ ಮಾನಸಿಕ ಆಸ್ಪತ್ರೆಯಲ್ಲಿ 6 ವರ್ಷ ಚಿಕಿತ್ಸೆ ಪಡೆದು ಇನ್ನು ಮುಂದೆ ಗಂಡ-ಮಕ್ಕಳ ಜತೆ ಸಂತೋಷದ ಜೀವನ ನಡೆಸಬೇಕೆಂದು ಮನೆಗೆ ಬಂದಿದ್ದ ಮಹಿಳೆಗೆ ಕಾದಿತ್ತು ಅಚ್ಚರಿ. ಮನೆಗೆ ಬಂದು ನೋಡಿದರೆ ಗಂಡ ಮತ್ತೊಂದು ಮದುವೆಯಾಗಿ ಜೀವನ ನಡೆಸುತ್ತಿದ್ದಾನೆ ಎಂಬ ವಿಷಯ ತಿಳಿಯಿತು. ಆಕೆಗೆ ತನ್ನ ಬದುಕಿನಲ್ಲಿ ಏನು ನಡೆಯಿತು ಎಂದು ತಿಳಿದು, ಅರಗಿಸಿಕೊಳ್ಳಲು ಸ್ವಲ್ಪ ಸಮಯವೇ ಹಿಡಿಯಿತು.

ಬಾಗ್ದಾ ನಿವಾಸಿ ಶೀಲಾರಾವ್‌ಗೆ ಒಂಭತ್ತು ವರ್ಷಗಳ ಹಿಂದೆ ಮಾನಸಿಕ ಕಾಯಿಲೆ ಕಾಡಿತು. ಇದರಿಂದಾಗಿ ಇದ್ದಕ್ಕಿದ್ದಂತೆ ಮನೆ ಬಿಟ್ಟು ಹೋದರು. ಮನೆಯವರು ಎಷ್ಟು ಹುಡುಕಿದರೂ ಸಿಕ್ಕಿರಲಿಲ್ಲ. ಪೊಲೀಸರಿಗೆ ದೂರು ನೀಡಲಾಯಿತು. ಶೀಲಾ ಮನೆ ಬಿಟ್ಟು ಹೋಗುವಾಗ ಮೊದಲನೇ ಮಗುವಿಗೆ 10 ವರ್ಷ, ಎರಡನೇ ಮಗನಿಗೆ 6 ತಿಂಗಳು ಆಗಿತ್ತಷ್ಟೆ. ಶೀಲಾ ಪತ್ತೆಯಾಗದಿದ್ದಾಗ ಪತಿ ಮರು ಮದುವೆಯಾದರು.

ಶೀಲಾ ಕಾಣೆಯಾಗಿ ನಾಲ್ಕು ವರ್ಷಗಳ ಬಳಿಕ ಪೊಲೀಸರು ಆಕೆಯನ್ನು ಪತ್ತೆ ಹಚ್ಚಿದರು. ಆಗ ಆಕೆ ಸಂಪೂರ್ಣ ಮಾನಸಿಕ ಸ್ತಿಮಿತ ಕಳೆದುಕೊಂಡಿದ್ದರು. ಅವರನ್ನು ಚಿಕಿತ್ಸೆಗಾಗಿ ಮಾನಸಿಕ ಆಸ್ಪತ್ರೆಗೆ ಸೇರಿಸಲಾಯಿತು. ಸಂಪೂರ್ಣ ಗುಣಮುಖರಾದ ಶೀಲಾರನ್ನು ಮನೆಗೆ ಕರೆದುಕೊಂಡು ಬರಲು ಎರಡನೇಯ ಪತ್ನಿ ಸಾಧ್ನಾ ಕೂಡ ಒಪ್ಪಿಗೆ ನೀಡಿದ್ದಾರೆ.

ಶೀಲಾ ಮಕ್ಕಳು ಸಾದ್ನಾಳನ್ನೇ ಅಮ್ಮ ಎಂದು ಕರೆಯುತ್ತಿದ್ದರು. ಸಾಧ್ನಾ ಕೂಡ ಮಕ್ಕಳನ್ನು ಚೆನ್ನಾಗಿ ನೋಡಿಕೊಂಡಿದ್ದರು. ಚಿಕ್ಕ ಮಗನಿಗಂತೂ ಹೆತ್ತ ತಾಯಿಗಿಂತ ಸಾಕಿದ ತಾಯಿ ಮೇಲೆ ಅಕ್ಕರೆ ಜಾಸ್ತಿ.

ಈ ಎಲ್ಲಾ ವಿಷಯ ತಿಳಿದ ಶೀಲಾ ‘ಗಂಡ ಎರಡನೇಯ ಮದುವೆಯಾದರೆ ಏನಂತೆ? ನಾವಿಬ್ಬರು ಅಕ್ಕ-ತಂಗಿಯಾಗಿ, ಗಂಡನನ್ನ ಚೆನ್ನಾಗಿ ನೋಡಿ ಕೊಳ್ಳುತ್ತೇವೆ’ ಎಂದಿದ್ದಾರೆ.

Comments are closed.