ಶ್ರೀಮಂತ ಸಂಸದೆ ಜಯಾ ಬಚ್ಚನ್‌ ಆಸ್ತಿ ಮೌಲ್ಯ 1,000 ಕೋಟಿ ರೂ…!

ಹೊಸದಿಲ್ಲಿ: ನಟಿ ಹಾಗೂ ಸಮಾಜವಾದಿ ಪಕ್ಷದ ಜಯಾ ಬಚ್ಚನ್‌ ಅವರು ದೇಶದಲ್ಲೇ ಅತ್ಯಂತ ಶ್ರೀಮಂತ ಸಂಸದೆ ಎಂಬ ಖ್ಯಾತಿಗೆ ಪಾತ್ರರಾಗಿದ್ದಾರೆ. ತಾವು 1000 ಕೋಟಿ ರೂ ಮೌಲ್ಯದ ಆಸ್ತಿಗಳನ್ನು ಹೊಂದಿರುವುದಾಗಿ ಸ್ವತಃ ಘೋಷಿಸಿಕೊಂಡಿದ್ದಾರೆ.

2014ರಲ್ಲಿ ಬಿಜೆಪಿ ಸಂಸದ ರವೀಂದ್ರ ಕಿಶೋರ್ ರಾಜ್ಯಸಭೆಗೆ ಪ್ರವೇಶಿಸಿದಾಗ ತಮ್ಮ ಆಸ್ತಿಯ ಮೌಲ್ಯ 800 ಕೋಟಿ ರೂ ಎಂದು ಘೋಷಿಸಿದ್ದರು. ಇದೀಗ ಜಯಾ ಬಚ್ಚನ್‌ ಅವರಿಗಿಂತಲೂ ಶ್ರೀಮಂತ ಸಂಸದೆ ಎಂಬ ಖ್ಯಾತಿ ಪಡೆದಿದ್ದಾರೆ.

ಸಮಾಜವಾದಿ ಪಕ್ಷದ ಅಭ್ಯರ್ಥಿಯಾಗಿ ರಾಜ್ಯಸಭೆ ಚುನಾವಣೆಗೆ ನಾಮಪತ್ರ ಸಲ್ಲಿಕೆ ವೇಳೆ ಜಯಾ ಬಚ್ಚನ್‌ ಈ ಘೋಷಣೆ ಮಾಡಿದ್ದಾರೆ. 2012ರಲ್ಲಿ ಅವರು ಘೋಷಿಸಿದ್ದ ಆಸ್ತಿ ಮೌಲ್ಯ 492 ಕೋಟಿ ರೂ.ಗಳಾಗಿತ್ತು.

2012ರಲ್ಲಿ ಜಯಾ ಮತ್ತು ಅವರ ಪತಿ ಅಮಿತಾಭ್‌ ಬಚ್ಚನ್‌ 152 ಕೋಟಿ ರೂ ಮೌಲ್ಯದ ಸ್ಥಿರಾಸ್ಥಿ ಹೊಂದಿದ್ದರು. ಇದೀಗ ಅವುಗಳ ಮೌಲ್ಯ 460 ಕೋಟಿ ರೂ.ಗಳಾಗಿದೆ. ಅದೇ ರೀತಿ 2012ರಲ್ಲಿ 343 ಕೋಟಿ ರೂ ಮೌಲ್ಯದ ಚರಾಸ್ತಿ ಹೊಂದಿರುವುದಾಗಿ ಘೋಷಿಸಿದ್ದ ಅವರು, ಈಗ 540 ಕೋಟಿ ರೂ ಚರಾಸ್ತಿ ಹೊಂದಿರುವುದಾಗಿ ಘೋಷಿಸಿದ್ದಾರೆ.

ಅವರು ಸಲ್ಲಿಸಿದ ಅಫಿದವಿತ್ ಪ್ರಕಾರ, ಜಯಾ ದಂಪತಿ 62 ಕೋಟಿ ರೂ ಮೌಲ್ಯದ ಚಿನ್ನಾಭರಣ ಹೊಂದಿದ್ದಾರೆ. ಆ ಪೈಕಿ ಅಮಿತಾಭ್ ಅವರೊಬ್ಬರೇ 36 ಕೋಟಿ ಮೌಲ್ಯದ ಚಿನ್ನಾಭರಣ ಹೊಂದಿದ್ದಾರೆ. ಬಚ್ಚನ್‌ ದಂಪತಿ 12 ಸ್ವಂತ ವಾಹನಗಳನ್ನು ಹೊಂದಿದ್ದು, ಅವುಗಳ ಮೌಲ್ಯ 13 ಕೋಟಿ ರೂ.ಗಳಾಗಿವೆ. ಒಂದು ರೋಲ್ಸ್‌ರಾಯ್ಸ್‌, ಮೂರು ಮರ್ಸಿಡಿಸ್‌, ಒಂದು ಪೋರ್ಶೆ ಮತ್ತು ಒಂದು ರೇಂಜ್‌ ರೋವರ್‌ ಕಾರುಗಳೂ ಇವುಗಳಲ್ಲಿ ಸೇರಿವೆ. ಅಮಿತಾಬ್‌ ಅವರ ಬಳಿ ಒಂದು ನ್ಯಾನೋ ಕಾರು ಹಾಗೂ ಒಂದು ಟ್ರ್ಯಾಕ್ಟರ್‌ ಕೂಡ ಇದೆ.

ಅಮಿತಾಭ್ ಮತ್ತು ಜಯಾ ಕ್ರಮವಾಗಿ 3.4 ಕೋಟಿ ರೂ ಹಾಗೂ 51 ಲಕ್ಷ ರೂ ಮೌಲ್ಯದ ವಾಚುಗಳನ್ನು ಹೊಂದಿದ್ದಾರೆ. ಅಲ್ಲದೆ ಅಮಿತಾಭ್‌ ಅವರ ಬಳಿ 9 ಲಕ್ಷ ರೂ ಬೆಲೆಯ ಒಂದು ಪೆನ್ ಕೂಡ ಇದೆ. ಬಚ್ಚನ್‌ ದಂಪತಿ ಫ್ರಾನ್ಸ್‌ನಲ್ಲಿ 3,175 ಚದರ ಮೀಟರ್‌ ವಿಸ್ತೀರ್ಣದ ವಾಸ್ತವ್ಯದ ಆಸ್ತಿ ಹೊಂದಿದ್ದಾರೆ. ಅಲ್ಲದೆ ನೋಯಿಡಾ, ಭೋಪಾಲ್‌, ಪುಣೆ, ಅಹಮದಾಬಾದ್‌ ಮತ್ತು ಗಾಂಧಿನಗರಗಳಲ್ಲಿ ಆಸ್ತಿಗಳನ್ನು ಹೊಂದಿದ್ದಾರೆ.

ಜಯಾ ಅವರ ಬಳಿ ಲಖನೌದಲ್ಲಿ 1.22 ಹೆಕ್ಟೇರ್‌ ಕೃಷಿ ಭೂಮಿ (2.2 ಕೋಟಿ ರೂ ಮೌಲ್ಯ) ಯಿದೆ. ಅದೇ ರೀತಿ ಅಮಿತಾಭ್‌ ಬಳಿ ಬಾರಾಬಂಕಿ ಜಿಲ್ಲೆಯ ದೌಲತಾಪುರ್‌ನಲ್ಲಿ 5.7 ಕೋಟಿ ಮೌಲ್ಯದ 3 ಎಕರೆ ಭೂಮಿಯಿದೆ.