ಭವಿಷ್ಯದಲ್ಲಿ ಗಾಂಧಿ ಕುಟುಂಬದ ಹೊರಗಿನವರು ಕಾಂಗ್ರೆಸ್‌ ಅಧ್ಯಕ್ಷರಾಗಬಹುದು: ಸೋನಿಯಾ ಗಾಂಧಿ

ಹೊಸದಿಲ್ಲಿ: ಮುಂದಿನ ದಿನಗಳಲ್ಲಿ ಕಾಂಗ್ರೆಸ್‌ ಅಧ್ಯಕ್ಷರಾಗಿ ನೆಹರೂ ಅಥವಾ ಗಾಂಧಿ ಕುಟುಂಬದ ಹೊರಗಿನವರೂ ಜವಾಬ್ದಾರಿ ವಹಿಸಿಕೊಳ್ಳಲಿದ್ದಾರೆ…..

ಈ ಮಾಹಿತಿಯನ್ನು ನೀಡಿದವರು ಬೇರಾರೂ ಅಲ್ಲ ಸ್ವತಃ ಸೋನಿಯಾ ಗಾಂಧಿ.

ಶುಕ್ರವಾರ ನಡೆದ ಕಾರ್ಯಕ್ರಮದಲ್ಲಿ ಸೋನಿಯಾ ಗಾಂಧಿ ಈ ರೀತಿಯ ಉತ್ತರ ನೀಡಿದರು.

ಭವಿಷ್ಯದಲ್ಲಿ ಕಾಂಗ್ರೆಸ್‌ ಅಧ್ಯಕ್ಷರಾಗಿ ಕುಟುಂಬದ ಹೊರಗಿನವರೂ ಬರಬಹುದು. ಈ ಬಗ್ಗೆ ಕಾರ್ಯಕರ್ತರೇ ನಿರ್ಧರಿಸಲಿ ಎಂದು ಸೋನಿಯಾ ಗಾಂಧಿ ತಿಳಿಸಿದ್ದಾರೆ.

ಕಾಂಗ್ರೆಸ್‌ ಅಧ್ಯಕ್ಷರನ್ನು ಪ್ರಜಾಪ್ರಭುತ್ವದಡಿಯಲ್ಲಿಯೇ ಆಯ್ಕೆ ಮಾಡಲಾಗುತ್ತಿದೆ. ಅಮೆರಿಕದಲ್ಲೂ ಕುಟುಂಬ ರಾಜಕಾರಣ ಇದೆ. ಬುಷ್‌, ಕ್ಲಿಂಟನ್‌ ಸೇರಿದಂತೆ ಹಲವರ ಕುಟುಂಬ ಅಮೆರಿಕದಲ್ಲಿ ಆಡಳಿತ ನಡೆಸಿದೆ ಎಂದು ಸೋನಿಯಾ ಗಾಂಧಿ ತಿಳಿಸಿದರು.

2004ರಲ್ಲಿ ಕಾಂಗ್ರೆಸ್‌ ನೇತೃತ್ವದ ಮೈತ್ರಿಕೂಟ ಸರಕಾರ ರಚನೆ ಸಂದರ್ಭದಲ್ಲಿ ಮನಮೋಹನ್‌ ಸಿಂಗ್‌ ಅವರ ಹೆಸರನ್ನು ನಾನೇ ಸೂಚಿಸಿದ್ದೆ. ಆದರೆ ರಿಮೋಟ್‌ ಕಂಟ್ರೋಲ್‌ ನಾನಾಗಿದ್ದೆ ಎಂಬುದು ಸುಳ್ಳು ಎಂದು ಸೋನಿಯಾ ನೆನಪಿನಂಗಳಕ್ಕೆ ಜಾರಿದರು.

ರಾಜಕೀಯದಲ್ಲಿ ನನ್ನ ಇತಿಮಿತಿ ಗೊತ್ತಿದೆ. ಅದನ್ನು ಎಂದಿಗೂ ದಾಟಿಲ್ಲ. ಕಾಂಗ್ರೆಸ್‌ನಿಂದ ಅಂದು ಹಲವರು ಬಿಟ್ಟು ಹೋಗುತ್ತಿದ್ದರು. ಆ ಸಂದರ್ಭದಲ್ಲಿ ಪಕ್ಷ ಸಂಘಟನೆ ಮಾಡಲು ಚುಕ್ಕಾಣಿ ಹಿಡಿಯಬೇಕಾಯಿತು ಎಂದು ಸೋನಿಯಾ ಹಿಂದಿನ ಘಟನೆಗಳನ್ನು ಸ್ಮರಿಸಿಕೊಂಡರು.