ಹೊಸದಿಲ್ಲಿ: ಬೆಂಗಳೂರಿಗರಿಗೆ ಇಲ್ಲೊಂದು ಬೆಚ್ಚಿ ಬೀಳುವ ಸುದ್ದಿಯಿದೆ. ಮುಂದಿನ ದಿನಗಳಲ್ಲಿ ತೀವ್ರ ಕುಡಿಯುವ ನೀರಿನ ಕೊರತೆ ಎದುರಿಸಲಿರುವ ವಿಶ್ವದ ಟಾಪ್‌ 11 ನಗರಗಳಲ್ಲಿ ಉದ್ಯಾನನಗರಿ 2ನೇ ಸ್ಥಾನ ಪಡೆದಿದೆ. ನೀರಿನ ಸಮಸ್ಯೆಗಾಗಿ ವಿಶ್ವದಲ್ಲಿ ಕುಖ್ಯಾತಿ ಗಳಿಸಿರುವ ದಕ್ಷಿಣ ಆಫ್ರಿಕಾದ ಕೇಪ್‌ ಟೌನ್‌ ಈ ಪಟ್ಟಿಯಲ್ಲಿ ಅಗ್ರಸ್ಥಾನ ಪಡೆದಿದೆ.
ವಿಶ್ವ ಸಂಸ್ಥೆ ಮತ್ತು ಏಷ್ಯನ್‌ ಡೆವಲಪ್‌ಮೆಂಟ್‌ ಬ್ಯಾಂಕ್‌ ಅಧ್ಯಯನ ಆಧರಿಸಿ, ಬಿಬಿಸಿ ನ್ಯೂಸ್‌ ಪ್ರಕಟಿಸಿದ ವರದಿಯೊಂದು ಈ ಬಗ್ಗೆ ಬೆಳಕು ಚೆಲ್ಲಿದೆ.
ಕೆರೆಗಳ ದುಸ್ಥಿತಿ ವರದಿ: ಬೆಂಗಳೂರಿನಲ್ಲಿ ಸದ್ಯ ಜ್ವಲಂತ ಸಮಸ್ಯೆಯಾಗಿರುವ ಕೆರೆ ಒತ್ತುವರಿ ಮತ್ತು ಜಲ ಮಾಲಿನ್ಯವನ್ನೂ ವರದಿಯಲ್ಲಿ ಒತ್ತಿ ಹೇಳಲಾಗಿದೆ.
ನಗರದಲ್ಲಿ ಒಂದೇ ಒಂದು ಕೆರೆಯ ನೀರೂ ಸಹ ಕುಡಿಯಲು ಅಥವಾ ದಿನಬಳಕೆ ಉದ್ದೇಶಕ್ಕೆ ಉಪಯೋಗಿಸಲು ಯೋಗ್ಯವಲ್ಲ ಎಂದು ವರದಿ ಹೇಳಿದೆ.
ಹಲವು ಕಾರಣಗಳು: ನಿಯಂತ್ರಣರಹಿತವಾಗಿ ಬೆಳೆಯುತ್ತಿರುವ ನಗರ, ಹೆಚ್ಚುತ್ತಿರುವ ಕಾಂಕ್ರೀಟ್‌ ಕಾಡು, ನೀರು ಮತ್ತು ಒಳಚರಂಡಿ ವ್ಯವಸ್ಥೆಯನ್ನು ನಿರ್ವಹಿಸಲು ಸ್ಥಳೀಯ ಆಡಳಿತದ ವೈಫಲ್ಯದತ್ತ ವರದಿ ಬೊಟ್ಟು ಮಾಡಿದೆ.
ಕುಡಿಯುವ ನೀರು ವ್ಯರ್ಥ: ನಗರದಲ್ಲಿ ಶೇ. 50ರಷ್ಟು ಕುಡಿಯುವ ನೀರನ್ನು ಪೋಲು ಮಾಡಲಾಗುತ್ತಿದೆ ಎಂಬ ಇತ್ತೀಚೆಗಿನ ಕೇಂದ್ರ ಸರಕಾರದ ವರದಿಯನ್ನೂ ಬಿಬಿಸಿ ಇಲ್ಲಿ ಉಲ್ಲೇಖಿಸಿದೆ.
2025ರಲ್ಲಿ ಜನರ ಗುಳೆ: ನೀರಿನ ತೀವ್ರ ಅಭಾವದಿಂದಾಗಿ 2025ರ ವೇಳೆಗೆ ಜನರು ನಗರದಿಂದ ಗುಳೆ ಹೋಗಲು ಆರಂಭಿಬಹುದು ಎಂದು ವರದಿಯಲ್ಲಿ ಅಂದಾಜಿಸಲಾಗಿದೆ.
50% ನೀರನ ಕೊರತೆ: ಏಷ್ಯನ್‌ ಅಭಿವೃದ್ಧಿ ಬ್ಯಾಂಕ್‌ ವರದಿ ಪ್ರಕಾರ, 2030ರ ವೇಳೆಗೆ ಭಾರತದಲ್ಲಿ ನೀರಿನ ಅಭಾವವು ಶೇ. 50ರಷ್ಟು ಹೆಚ್ಚಾಗಲಿದೆ. ಭೂಮಿಯ ಶೇ. 70ರಷ್ಟು ಭಾಗವನ್ನು ನೀರು ಆವರಿಸಿದ್ದರೂ, ಇದರಲ್ಲಿ ಕುಡಿಯಲು ಯೋಗ್ಯವಾಗಿರುವ ನೀರು ಶೇ. 3ರಷ್ಟು ಮಾತ್ರ ಎಂಬುದು ಗಮನಾರ್ಹ.
…………………….
ಕೊಹ್ಲಿ ಪಡೆಗೂ ಕಹಿ ಅನುಭವ
ಕ್ರಿಕೆಟ್‌ ಪಂದ್ಯದ ನಿಮಿತ್ತ ಕೇಪ್‌ ಟೌನ್‌ಗೆ ತೆರಳಿದ್ದ ಟೀಮ್‌ ಇಂಡಿಯಾಕ್ಕೂ ಇತ್ತೀಚೆಗೆ ನೀರಿನ ಬವಣೆಯ ಬಿಸಿ ತಟ್ಟಿತ್ತು. ನೀರಿನ ಅಭಾವದ ಕಾರಣ 2 ನಿಮಿಷದಲ್ಲೇ ಸ್ನಾನ ಮುಗಿಸುವಂತೆ ಕೊಹ್ಲಿ ಪಡೆಗೆ ಸೂಚಿಸಲಾಗಿತ್ತು. ಅಲ್ಲದೆ, ತೀರಾ ಅಗತ್ಯವಾದರೆ ಮಾತ್ರ ಶೌಚಾಲಯಗಳಲ್ಲಿ ‘ಫ್ಲಶ್‌’ ಮಾಡುವಂತೆ ಸೂಚಿಸಿದ್ದರಿಂದ ಟೀಮ್‌ ಇಂಡಿಯಾ ಆಟಗಾರರು ಕಸಿವಿಸಿ ಅನುಭವಿಸಿದ್ದರು.
Comments are closed.