ಅಧಿಕಾರಿಗಳಿಗಿಂತ ರಾಷ್ಟ್ರಪತಿ, ಉಪರಾಷ್ಟ್ರಪತಿ ವೇತನ ಕಡಿಮೆ

ಹೊಸದಿಲ್ಲಿ: ದೇಶದ ಮೊದಲ ಪ್ರಜೆ – ರಾಷ್ಟ್ರಪತಿ. ನಮ್ಮ ಸಂವಿಧಾನದಲ್ಲಿ ಅತ್ಯುನ್ನತ ಹುದ್ದೆ ಇದಾಗಿದೆ. ಆದರೆ ರಾಷ್ಟ್ರಪತಿ ಸ್ಥಾನದಲ್ಲಿರುವವರಿಗೆ ಸಕಲ ಸೌಕರ್ಯ, ರಾಜ ವೈಭೋಗ ದೊರೆಯುತ್ತದೆ. ಆದರೆ ಅವರ ವೇತನ ಮಾತ್ರ ಕಡಿಮೆ. ಇದೇ ಪರಿಸ್ಥಿತಿ ದೇಶ ಉಪರಾಷ್ಟ್ರಪತಿಯದ್ದು ಆಗಿದೆ.

ರಾಷ್ಟ್ರಪತಿ ಪಡೆಯುತ್ತಿರುವ ವೇತನ ಸದ್ಯಕ್ಕೆ ಮಾಸಿಕ 1.5 ಲಕ್ಷ ರೂಪಾಯಿ. ಉಪರಾಷ್ಟ್ರಪತಿ ವೇತನ 1.25 ಲಕ್ಷ. ರಾಜ್ಯಪಾಲರ ವೇತನ 1.1 ಲಕ್ಷ.

ಸದ್ಯ ಸರಕಾರದ ಅತ್ಯುನ್ನತ ಹುದ್ದೆಯಲ್ಲಿರುವ ಅಧಿಕಾರಿಗೆ ದೊರೆಯುತ್ತಿರುವ ಸಂಬಳ 2.5 ಲಕ್ಷ ರೂಪಾಯಿ. ಕೇಂದ್ರ ಸರಕಾರದಲ್ಲಿರುವ ಕಾರ್ಯದರ್ಶಿ ಖಾತೆಗೆ ತಿಂಗಳಿಗೆ 2.25 ಲಕ್ಷ ರೂಪಾಯಿ ಜಮೆಯಾಗುತ್ತಿದೆ..

ಏಳನೇ ವೇತನ ಆಯೋಗದ ಶಿಫಾರಸು ಇನ್ನೂ ಜಾರಿಗೆ ಬಂದಿಲ್ಲ. ಒಂದು ವೇಳೆ ಇದು ಜಾರಿಗೆ ಬಂದರೆ ಈ ವೇತನ ಇನ್ನಷ್ಟು ಹೆಚ್ಚಾಗಲಿದೆ.

ದೇಶ ಮೂರು ಸಶಸ್ತ್ರ ಸೇನಾ ಪಡೆಗಳ ಅಧಿಪತಿಯಾಗಿರುವವರು ರಾಷ್ಟ್ರಪತಿ. ಆದರೆ ರಾಷ್ಟ್ರಪತಿಗಿಂತ ಹೆಚ್ಚು ಸಂಬಳವನ್ನು ಈ ಪಡೆಗಳ ಮುಖ್ಯಸ್ಥರು ಪಡೆಯುತ್ತಿದ್ದಾರೆ.

2008ರಲ್ಲಿ ಕಡೆಯ ಬಾರಿಗೆ ರಾಷ್ಟ್ರಪತಿ, ಉಪ ರಾಷ್ಟ್ರಪತಿ, ರಾಜ್ಯಪಾಲರ ವೇತನ ಹೆಚ್ಚಿಸಲಾಗಿತ್ತು. ಅದಕ್ಕಿಂತಲೂ ಮುಂಚೆ ಇವರ ವೇತನ ಕ್ರಮವಾಗಿ 50, 40, 36,000 ರೂ.ಗಳಿತ್ತು.