ಹಾದಿಯಾ ಈಗ ಹೇಗಿದ್ದಾರೆ?

ಕೊಟ್ಟಾಯಂ: ಲವ್ ಜಿಹಾದ್ ಬಲಿಪಶು ಎನ್ನಲಾದ ಹಾದಿಯಾ ಅಲಿಯಾಸ್ ಅಖಿಲಾ (24) ಇದೀಗ ಪೋಷಕರ ಆಶ್ರಯದಲ್ಲಿದ್ದು, ಆರೋಗ್ಯವಾಗಿ, ಸಂತೋಷವಾಗಿದ್ದಾರೆಂದು, ರಾಷ್ಟ್ರೀಯ ಮಹಿಳಾ ಆಯೋಗ (ಎನ್‌ಸಿಡಬ್ಲ್ಯೂ)ದ ಅಧ್ಯಕ್ಷೆ ರೇಖಾ ಶರ್ಮಾ ತಿಳಿಸಿದ್ದಾರೆ.

ಹಾದಿಯಾಳನ್ನು ಗೃಹ ಬಂಧನದಲ್ಲಿರಿಸಿದ್ದು, ಮಹಿಳಾ ಹಕ್ಕುಗಳ ಉಲ್ಲಂಘನೆಯಾಗುತ್ತಿದೆ ಎಂದು ಆರೋಪಿಸಿ, ಕೇರಳದ ಕೆಲವು ಮುಸ್ಲಿಂ ಸಂಘಟನೆಗಳು ದೂರು ದಾಖಲಿಸಿದ್ದವು. ಈ ಹಿನ್ನೆಲೆಯಲ್ಲಿ ರೇಖಾ ಶರ್ಮಾ ಅವರು ಹಾದಿಯಾ ನಿವಾಸಕ್ಕೆ ಭೇಟಿ ನೀಡಿದ್ದರು.

ಮುಸ್ಲಿಂ ಮೂಲಭೂತವಾದಿ ಶಫಿನ್ ಜಹಾನ್ ತಮ್ಮ ಮಗಳನ್ನು ಬಲವಂತವಾಗಿ ವಿವಾಹವಾಗಿದ್ದಾನೆ ಎಂದು ಯುವತಿಯ ಪೋಷಕರು ಆರೋಪಿಸಿದ ಕಾರಣ ಈ ಪ್ರಕರಣ ದೇಶಾದ್ಯಂತ ಗಮನ ಸೆಳೆದಿತ್ತು. ನಂತರ ಕೇರಳ ಹೈಕೋರ್ಟ್ ಶಫಿನ್ ಜಹಾನ್-ಹಾದಿಯಾ ವಿವಾಹವನ್ನು ಅನೂರ್ಜಿತಗೊಳಿಸಿ, ಆದೇಶಿಸಿತ್ತು. ಅದರಂತೆ, ಹಾದಿಯಾ ಅವರೀಗ ಪೋಷಕರ ವಶದಲ್ಲಿದ್ದಾರೆ. ಆದರೆ, ಶಫಿನ್ ಜಹಾನ್, ಹೈ ಕೋರ್ಟ್ ತೀರ್ಪು ಪ್ರಶ್ನಿಸಿ, ಸುಪ್ರೀಂ ಕೋರ್ಟ್ ಮೆಟ್ಟಿಲೇರಿದ್ದು, ಇದರ ವಿಚಾರಣೆ ನ.27ಕ್ಕೆ ನಡೆಯಲಿದೆ. ಇದಕ್ಕೆ ಹಾದಿಯಾ ಹಾಜರಾಗಲಿದ್ದಾರೆ.