ಅಹಮದಾಬಾದ್ : ಪ್ರಖ್ಯಾತ ಶಾಸ್ತ್ರೀಯ ನೃತ್ಯ ಪಟು ,ನೃತ್ಯ ಗುರು ಮೃಣಾಲಿನಿ ಸಾರಾಭಾಯಿ ಅವರು ಗುರುವಾರ ಬೆಳಗ್ಗೆ ಇಹಲೋಕ ತ್ಯಜಿಸಿದ್ದಾರೆ. ಅವರಿಗೆ 97 ವರ್ಷ ಪ್ರಾಯವಾಗಿತ್ತು.
ನಿಧನದ ವಿಚಾರವನ್ನು ಫೇಸ್ ಬುಕ್ ನಲ್ಲಿ ಹಂಚಿಕೊಂಡಿರುವ ಅವರ ಪುತಿ ಮಲ್ಲಿಕಾ ಸಾರಾಭಾಯಿ ‘ನನ್ನ ತಾಯಿ ಶಾಶ್ವತ ನೃತ್ಯ ರಂಗಕ್ಕೆ ನಿರ್ಗಮಿಸಿದ್ದಾರೆ’ ಎಂದು ಬರೆದಿದ್ದಾರೆ.
ಖ್ಯಾತ ಭೌತ ವಿಜ್ಞಾನಿ ,ಬಾಹ್ಯಾಕಾಶ ಸಂಶೋಧನಾ ಪಿತಾಮಹ ವಿಕ್ರಮ್ ಸಾರಾಭಾಯಿ ಅವರ ಪತ್ನಿಯಾಗಿದ್ದ ಮೃಣಾಲಿನಿ ಅವರು ತಮ್ಮ ಜೀವನವನ್ನು ನೃತ್ಯ ಮತ್ತು ನೃತ್ಯ ತರಬೇತಿಗಾಗಿ ಮುಡುಪಾಗಿಟ್ಟಿದ್ದರು. ಅವರು 18,000ಕ್ಕೂಹೆಚ್ಚು ಶಿಷ್ಯವರ್ಗವನ್ನು ಹೊಂದಿದ್ದರು.
ಕೇರಳದ ಪಾಲಕ್ಕಾಡ್ ನಲ್ಲಿ ಜನಿಸಿದ್ದ ಮೃಣಾಲಿನಿ ಅವರು ಶಾಸ್ತ್ರೀಯ ನೃತ್ಯದ ಪ್ರಚಾರ ಮತ್ತು ತರಬೇತಿಗಾಗಿ ಅಹಮದಾಬಾದ್ನಲ್ಲಿ ದರ್ಪಣಂ ಎನ್ನುವ ಸಂಸ್ಥೆಯನ್ನು 1948 ರಲ್ಲಿ ಹುಟ್ಟುಹಾಕಿದ್ದರು.
ಮೃಣಾಲಿನಿ ಅತ್ಯುನ್ನತ ಪ್ರಶಸ್ತಿಗಳಾದ ಪದ್ಮಭೂಷಣ ,ಪದ್ಮಶ್ರಿ ಪ್ರಶಸ್ತಿಗೆ ಭಾಜನರಾಗಿದ್ದರು. ವಿಶ್ವದೆಲ್ಲೆಡೆ ಸಾವಿರಾರು ಸನ್ಮಾನಗಳು ಅವರಿಗೆ ಸಂದಿವೆ.
ಮೃಣಾಲಿನಿ ಅವರ ಸಹೋದರಿ ಕ್ಯಾಪ್ಟನ್ ಲಕ್ಷ್ಮೀ ಅವರು ಐಎನ್ಎ ಸೇನೆಯಲ್ಲಿದ್ದರು.
ಮೃಣಾಲಿನಿ ಅವರು ಪುತ್ರ ಕಾರ್ತಿಕೇಯ, ಪುತ್ರಿ ಮಲ್ಲಿಕಾ ಸಾರಾಭಾಯಿ ಮತ್ತು ಅಪಾರ ಅಭಿಮಾನಿ ವರ್ಗವನ್ನು ಅಗಲಿದ್ದಾರೆ.
-ಉದಯವಾಣಿ
