ಚೆನ್ನೈ: ಹೃದ್ರೋಗದಿಂದ ಬಳಲುತ್ತಿದ್ದ 81 ವರ್ಷದ ವೃದ್ಧೆಗೆ ಹಸುವಿನ ಹೃದಯದ ಕವಾಟ ಹೊಸ ಬದುಕು ಕೊಟ್ಟಿದೆ.
ಮಹಾಪಧಮನಿಯ ಕವಾಟ ಕಿರಿದಾಗಿ ತೊಂದರೆ ಅನುಭವಿಸುತ್ತಿದ್ದ ಹೈದರಾಬಾದ್‌ ಮೂಲದ ಹಿರಿಯ ಮಹಿಳೆಗೆ ಚೆನ್ನೈನ ಫ್ರಾಂಟಿಯರ್‌ ಲೈಫ್‌ಲೈನ್‌ ಆಸ್ಪತ್ರೆಯಲ್ಲಿ ಶನಿವಾರ ಚಿಕಿತ್ಸೆ ನೆರವೇರಿಸಲಾಗಿದೆ.
‘ತೆರದ ಹೃದಯದ ಶಸ್ತ್ರಚಿಕಿತ್ಸೆಗೆ ಪಯಾರ್ಯವಾಗಿ ಈ ವಿಧಾನ ನೆರವೇರಿಸಲಾಗಿದೆ. ಮಹಾಪಧಮನಿಯ ಕವಾಟ ಕಿರಿದಾಗಿ ಸಮಸ್ಯೆ ಎದುರಿಸುತ್ತಿರುವ ಹಾಗೂ ಶಸ್ತ್ರಚಿಕಿತ್ಸೆ ನೆರವೇರಿಸಲು ಸಾಧ್ಯವಾಗದವರಿಗೆ ಇದು ಸೂಕ್ತ,’ ಎಂದು ಡಾ. ಕೆ.ಎಂ. ಚೆರಿಯನ್‌ ಹೇಳಿದ್ದಾರೆ.
11 ವರ್ಷಗಳ ಹಿಂದೆ ಬದಲಿ ಕವಾಟ ಜೋಡಿಸುವ ಶಸ್ತ್ರಚಿಕಿತ್ಸೆಗೆ ಒಳಗಾಗಿದ್ದ ಮಹಿಳೆಗೆ ಮತ್ತೆ ಹೃದಯದ ಸಮಸ್ಯೆ ಕಾಣಿಸಿಕೊಂಡಿತ್ತು. ಜತೆಗೆ, ಕೆಲ ವರ್ಷಗಳ ಹಿಂದೆ ಸ್ತನ ಕ್ಯಾನ್ಸರ್‌ಗಾಗಿ ಚಿಕಿತ್ಸೆ ಪಡೆದಿದ್ದರು. ಹಾಗಾಗಿ ಇವರಿಗೆ ದೊಡ್ಡ ಶಸ್ತ್ರಚಿಕಿತ್ಸೆ ನೆರವೇರಿಸುವುದು ಕಷ್ಟವಾಗಿತ್ತು.
‘ಉಸಿರಾಟದ ಸಮಸ್ಯೆಯೊಂದಿಗೆ ಆಸ್ಪತ್ರೆಗೆ ಬಂದಾಗ ಮಹಾಪಧಮನಿಯ ಕವಾಟು ಕಿರಿದಾಗಿದ್ದ ವಿಷಯ ಪರೀಕ್ಷೆಗಳಿಂದ ದೃಢವಾಯಿತು. ಸಾಮಾನ್ಯವಾಗಿ ಇಂಥ ರೋಗಿಗಳಿಗೆ ಬದಲಿ ಕವಾಟು ಜೋಡಿಸಲಾಗುತ್ತದೆ. ಆದರೆ, ಅವರ ವಯಸ್ಸನ್ನು ಗಮನದಲ್ಲಿಟ್ಟುಕೊಂಡು ಪರ್ಯಾಯ ಚಿಕಿತ್ಸೆ ನೀಡಲಾಯಿತು,’ ಎಂದು ಹೃದ್ರೋಗ ತಜ್ಞ ಡಾ. ಅನಂತರಾಮನ್‌ ಹೇಳಿದ್ದಾರೆ.
ಚಿಕಿತ್ಸೆ ಏನು ?
ಹಸುವಿನ ಹೃದಯದ ಕೋಶಗಳಿಂದ ಮಾಡಿದ ಜೈವಿಕ ಕವಾಟವನ್ನು ತೂರುನಳಿಕೆ (ಕ್ಯಾತಿಟರ್‌) ಮೂಲಕ ತೊಡೆ ಸಂದಿಯಿಂದ ಅವರ ಮಹಾಪಧಮನಿಗೆ ಸೇರಿಸಲಾಗಿದೆ. ಸಾಮಾನ್ಯವಾಗಿ ಇಂಥ ಸಮಸ್ಯೆ ಇರುವ ರೋಗಿಗಳಿಗೆ ಹಳೆಯ ಕವಾಟವನ್ನು ತೆಗೆದು ಹೊಸದನ್ನು ಜೋಡಿಸಲಾಗುತ್ತದೆ. ಆದರೆ, ಆಕೆಯ ವಯಸ್ಸು ಹಾಗೂ ಇನ್ನಿತರ ದೈಹಿಕ ಸಮಸ್ಯೆಗಳನ್ನು ಗಮನದಲ್ಲಿಟ್ಟುಕೊಂಡು ಹಳೆಯ ಕವಾಟಿನೊಳಗೆ ಹೊಸದನ್ನು ಜೋಡಿಸಲಾಗಿದೆ. ನಾಲ್ಕು ವೈದ್ಯರ ತಂಡ, ಮೂರು ತಾಸಿನೊಳಗೆ ಈ ವಿಧಾನ ನೆರವೇರಿಸಿದೆ.
