ಚಿಕನ್ ಬೆಲೆ ಕೆಜಿಗೆ 160ರಿಂದ 200ರೂ.ಗಳಿಗೆ ಮಟನ್ 360ರಿಂದ 400 ರೂ.ಗೆ ಹೆಚ್ಚಳ ಮೊಟ್ಟೆ ಬೆಲೆ 3.50ರೂ.ಗಳಿಂದ 4 ಕ್ಕೆ ಹೆಚ್ಚಳ ಮಹಾರಾಷ್ಟ್ರದಲ್ಲಿ ಗೋಹತ್ಯೆ ನಿಷೇಧ-ತೆಲಂಗಾಣದಲ್ಲಿ ಎಚ್1ಎನ್1 ಎಫೆಕ್ಟ್ ಮಟನ್-ಚಿಕನ್ ಮೊಟ್ಟೆ ಬೆಲೆ ಗಗನಕ್ಕೆ; ಬಾಡೂಟ ಬಲು ದುಬಾರಿ
* ದೇವಯ್ಯ ಗುತ್ತೇದಾರ್ ಕಲಬುರಗಿ ಚಿಕನ್, ಮಟನ್ ಮತ್ತು ಮೊಟ್ಟೆ ಸೇವಿಸುವವರಿಗೆ ಈಗ ಬೆಲೆ ಏರಿಕೆ ಬಿಸಿ ತಾಗಿದೆ. ಭಾನುವಾರದ ಬಾಡೂಟ ಪ್ರಿಯರಿಗೆ ಇದೊಂದು ಶಾಕ್ ನೀಡಿದಂತಾಗಿದೆ. ಬೆಲೆ ಹೆಚ್ಚಾದರೂ 10-20 ರೂ.ಗಳಾಗುತ್ತಿದ್ದರೂ ಈಗ ಶೇ 20ರಷ್ಟು ಹೆಚ್ಚಾಗಿ ಹಲ್ಲು ಕಡಿಯುವಂತಾಗಿದೆ. ಬಡ ಮತ್ತು ಮಧ್ಯಮ ವರ್ಗದ ಗ್ರಾಹಕರಿಗೆ ಇದರ ಪರಿಣಾಮ ಬೀರಿದೆ.
ಎಷ್ಟು ಹೆಚ್ಚು?: ಜೂನ್ 7ರಂದು ಮೃಗಶಿರಾ ಮಳೆ ಎಂಟ್ರಿ ಹೊಡೆಯುವಾಗ ಬಹುತೇಕ ಮಾಂಸಾಹಾರಿಗಳು ಬಾಡೂಟ ಸವಿಯುವುದು ವಾಡಿಕೆ. ಅಂದಿನಿಂದ ಬೆಲೆ ಹೆಚ್ಚಾಗುತ್ತಿದ್ದು, ರಂಜಾನ್ ವೇಳೆಗೆ ಇದರ ಬೆಲೆ ಇನ್ನೂ ಹೆಚ್ಚಾಗುವ ಆತಂಕವೂ ಎದುರಾಗಿದೆ. ಎರಡು ವಾರಗಳ ಹಿಂದೆ ಕೆಜಿ ಚಿಕನ್‌ಗೆ 160 ರೂ. ದರವಿದ್ದರೆ, ಈಗ 200 ರೂ.ಗಳಿಗೆ ಏರಿಕೆಯಾಗಿದೆ. ಮಟನ್ ಬೆಲೆ 360 ರೂ.ಗಳಿಂದ 400 ರೂ.ಗಳಿಗೆ ಹೆಚ್ಚಾಗಿದೆ. ಮೊಟ್ಟೆ ಬೆಲೆ 3.50 ರೂ.ಗಳಿಂದ 4.50ರೂ.ಗಳಿಗೇರಿದೆ. ಖಾರದ ಊಟ ಈಗ ಬೆಂಕಿಯಂಥ ಖಾರವಾಗಿದೆ.
ಯಾಕೆ ಹೆಚ್ಚಳ?: ರಾಜ್ಯದ ಗಡಿಗೆ ಹೊಂದಿಕೊಂಡಿರುವ ಹೊಸ ರಾಜ್ಯ ತೆಲಂಗಾಣದಲ್ಲಿ ಹಲವು ತಿಂಗಳ ಹಿಂದೆ ಎಚ್1ಎನ್1 ಕಾಣಿಸಿಕೊಂಡಿದ್ದರಿಂದ ಹೈದರಾಬಾದ್ ಮತ್ತು ತೆಲಂಗಾಣ ಪ್ರದೇಶಗಳಲ್ಲಿ ಪೌಲ್ಟ್ರಿಗಳಲ್ಲಿ ಉತ್ಪಾದನೆ ಕಡಿಮೆ ಮಾಡಲಾಯಿತು. ಜ್ವರಕ್ಕೆ ಹೆದರಿ ಗ್ರಾಹಕರೂ ಚಿಕನ್ ಸೇವನೆ ಕಮ್ಮಿ ಮಾಡಿದ್ದರು.ಇದರಿಂದ ಪೌಲ್ಟ್ರಿ ಉದ್ಯಮಿಗಳು ಉತ್ಪಾದನೆ ಮಾಡಲಿಲ್ಲ. ಆದರೆ ಈಗ ಮದುವೆ ಸೇರಿದಂತೆ ಹಲವು ಸೀಜನ್‌ಗಳು ಬಂದಿದ್ದರಿಂದ ದಿಢೀರ್ ಬೇಡಿಕೆ ಹೆಚ್ಚಾಗಿ ಬೆಲೆ ಏರಲು ಕಾರಣವಾಗಿದೆ ಎನ್ನುತ್ತಾರೆ ವ್ಯಾಪರಿಗಳು.
ನೆರೆಯ ಮಹಾರಾಷ್ಟ್ರದಲ್ಲಿ ಗೋ ಹತ್ಯೆ ನಿಷೇಧ ಕಾಯ್ದೆ ಜಾರಿಗೆ ಬಂದಿದ್ದರಿಂದ ಹಸುವಿನ ಮಾಂಸ ಸಿಗುತ್ತಿಲ್ಲ. ಹೀಗಾಗಿ ಜನ ಅನಿವಾರ್ಯವಾಗಿ ಚಿಕನ್ ಮತ್ತು ಮಟನ್ ಮೊರೆ ಹೋಗಿದ್ದರಿಂದಲೂ ಅದರ ಬೆಲೆ ಹೆಚ್ಚಾಗಲು ಕಾರಣವಾಗಿದೆ. ಕಾಯ್ದೆ ಕಟ್ಟುನಿಟ್ಟಾಗಿ ಜಾರಿಗೊಂಡಷ್ಟು ಬೇಡಿಕೆ ಹೆಚ್ಚಾಗುತ್ತಿದೆ ಎನ್ನುತ್ತಾರೆ ನಗರದ ಚಿಕನ್ ಅಂಗಡಿ ಮಾಲೀಕ ಫಯಾಜ್ ಖಾನ್.
ಪೌಲ್ಟ್ರಿಗಳಲ್ಲಿ ಕೋಳಿ ಉತ್ಪಾದನೆ ಕಮ್ಮಿಯಾಗಿದ್ದರ ಪರಿಣಾಮ ಮೊಟ್ಟೆಗಳ ಮೇಲೂ ಬಿದ್ದದ್ದರಿಂದ ಇದರ ಬೆಲೆಯೂ ಹೆಚ್ಚಾಗಿದೆ. ಮಟನ್ ಚಿಕನ್ ಬೆಲೆ ಹೆಚ್ಚಾಗಿದ್ದರಿಂದ ಕೆಲವರು ಮೊಟ್ಟೆ ಮೊರೆ ಹೋಗಿದ್ದರಿಂದಲೂ ಇದರ ಬೆಲೆ ಹೆಚ್ಚಾಗಿದೆ ಎನ್ನುತ್ತಾರೆ ವರ್ತಕರು. —
ಮಹಾರಾಷ್ಟ್ರದಲ್ಲಿ ಗೋಹತ್ಯೆ ನಿಷೇಧ ಮಾಡಿರುವುದರಿಂದ ಬೇಡಿಕೆ ಜಾಸ್ತಿಯಾಗಿದೆ. ತೆಲಂಗಾಣದಲ್ಲಿ ಎಚ್1ಎನ್1ನಿಂದ ಪೌಲ್ಟ್ರಿಗಳಲ್ಲಿ ಉತ್ಪಾದನೆ ಕಮ್ಮಿಯಾಗಿದೆ. ಈಗ ಮದುವೆ ಸೀಜನ್ ಇರುವುದರಿಂದ ಬೇಡಿಕೆ ಹೆಚ್ಚಾಗಿದ್ದರಿಂದ ಬೆಲೆ ಜಾಸ್ತಿಯಾಗಿದೆ. ಹೆಚ್ಚು ಖರೀದಿಸುವ ಗ್ರಾಹಕರು ಈಗ ಪ್ರಮಾಣವನ್ನು ಕಮ್ಮಿ ಮಾಡಿದ್ದಾರೆ ಹೊರತು ಗ್ರಾಹಕರ ಸಂಖ್ಯೆ ಕಮ್ಮಿಯಾಗಿಲ್ಲ. -ಫಯಾಜ್, ಮಾಂಸದ ವ್ಯಾಪಾರಿ,ಕಲಬುರಗಿ
