ಮಸಾಚುಸೆಟ್ಸ್‌ನ ಬ್ರಾಂಡೀಸ್ ಯೂನಿವರ್ಸಿಟಿ ಇತ್ತೀಚೆಗೆ ನಡೆಸಿದ ಅಧ್ಯಯನದ ಪ್ರಕಾರ ಭಾರತದಷ್ಟು ಡೆಂಗೆ ಸೋಂಕುಗಳನ್ನು ವಿಶ್ವದ ಯಾವುದೇ ದೇಶ ಕಂಡಿಲ್ಲ. ವರ್ಷಕ್ಕೆ ಸರಾಸರಿ 20 ಸಾವಿರ ಜನರು ಡೆಂಗೆ ಸೋಂಕಿನಿಂದ ಆಸ್ಪತ್ರೆ ಸೇರುತ್ತಾರೆ ಎಂದು ಭಾರತ ಸರಕಾರದ ಅಧಿಕೃತ ವರದಿಗಳು ಹೇಳುತ್ತವೆ. ಬ್ರಾಂಡೀಸ್ ಅಧ್ಯಯನದ ಪ್ರಕಾರ ವಾಸ್ತವ ಸಂಖ್ಯೆಯಲ್ಲಿ ಆಸ್ಪತ್ರೆ ಸೇರುವವರ ನೈಜ ಸಂಖ್ಯೆ ಆರು ಮಿಲಿಯನ್ ಮತ್ತು ಇತರೆ
ಅಧ್ಯಯನಗಳ ಪ್ರಕಾರ ವಾರ್ಷಿಕವಾಗಿ ಡೆಂಗೆ ಸೋಂಕಿಗೊಳಗಾಗುವವರ ಸಂಖ್ಯೆ 30 ಮಿಲಿಯನ್. ಡೆಂಗೆ ಜ್ವರ ಈಡಿಸ್ ಸೊಳ್ಳೆಯಿಂದ ಹರಡುವ ವೈರಸ್‌ಗಳ ಕುಟುಂಬದಿಂದ ಉಂಟಾಗುವ ಜ್ವರ. ಅವು ಮನುಷ್ಯರು ಎಸೆದ ಟೈರ್, ಹೂವಿನ ಕುಂಡ, ಹಳೆಯ ಎಣ್ಣೆಯ ಡ್ರಮ್‌ಗಳು ಮತ್ತು ನೀರು ಸಂಗ್ರಹಿಸುವ ತೊಟ್ಟಿಗಳಲ್ಲಿ ಬೆಳೆಯುತ್ತವೆ. ಆದ್ದರಿಂದಲೇ ಮಳೆಗಾಲದಲ್ಲಿ ಸೋಂಕು ಹರಡುವುದನ್ನು ಹೆಚ್ಚಾಗಿ ಕಾಣುತ್ತೇವೆ. ಇದು ಸಾಂಕ್ರಾಮಿಕ ರೋಗವಲ್ಲ ಮತ್ತು ಸೋಂಕಿಗೆ ಒಳಗಾದ ವ್ಯಕ್ತಿಯಿಂದ ಮತ್ತೊಬ್ಬರಿಗೆ ಹರಡುವುದಿಲ್ಲ.
ಡೆಂಗೆ ಹೇಗೆ ಕಾಣುತ್ತದೆ?: ಡೆಂಗೆ ಜ್ವರ ಫ್ಲೂ ರೀತಿಯ ಜ್ವರವಾಗಿದ್ದು ದಿಢೀರನೆ ತಲೆನೋವು, ಜ್ವರ, ಆಯಾಸ, ಸ್ನಾಯು ಮತ್ತು ಕೀಲುನೋವು ಮತ್ತು ಗುಳ್ಳೆಗಳು ಕಾಣಿಸಿಕೊಳ್ಳುತ್ತವೆ.
ಡೆಂಗೆ ಜ್ವರ ಗಂಭೀರ ಸೋಂಕೇ?: ಬಹಳಷ್ಟು ಮಕ್ಕಳಲ್ಲಿ ಯಾವುದೇ ಚಿಕಿತ್ಸೆಯ ಅಗತ್ಯವಿಲ್ಲದೆ 3ರಿಂದ 5 ದಿನಗಳಲ್ಲಿ ಜ್ವರ ಗುಣವಾಗುತ್ತದೆ ಅಥವಾ ಯಾವುದೇ ಇತರೆ ಫ್ಲೂ ಸೋಂಕಿನ ರೀತಿಯಲ್ಲಿ ಸಂಕೀರ್ಣವಾಗುತ್ತದೆ. ಸಂಕೀರ್ಣತೆಗಳು ಸಾಮಾನ್ಯವಲ್ಲ. ಜೀವಹಾನಿ ಉಂಟು ಮಾಡುವ ಸಂಕೀರ್ಣತೆಗಳು ಜ್ವರ ಇಳಿಯುವ ಹಂತದಲ್ಲಿ ಕಾಣಿಸಿಕೊಳ್ಳುತ್ತವೆ. ಬಹಳ ಮುಖ್ಯವಾದ ಸಂಕೀರ್ಣತೆ ಎಂದರೆ ರಕ್ತದೊತ್ತಡ ಕುಸಿಯುವುದು. ಈ ರಕ್ತದೊತ್ತಡ ರಕ್ತನಾಳಗಳ ಸೋರುವಿಕೆಯಿಂದ ಉಂಟಾಗುತ್ತದೆ. ಇದರಿಂದ ದೇಹದಲ್ಲಿ ಊತ ಬರುತ್ತದೆ. ಹೊಟ್ಟೆ ಹಿಗ್ಗುತ್ತದೆ,
ಉಸಿರಾಟ ಕಷ್ಟವಾಗುತ್ತದೆ ಮತ್ತು ಮೂತ್ರ ವಿಸರ್ಜನೆ ಕಡಿಮೆಯಾಗುತ್ತದೆ. ಸಂಕೀರ್ಣತೆ ಎಂದರೆ ರಕ್ತಸ್ರಾವ. ಡೆಂಗೆ ಜ್ವರದಲ್ಲಿ ಪ್ಲೇಟ್‌ಲೆಟ್ ಸಂಖ್ಯೆ ಕಡಿಮೆಯಾದರೂ ಬಹಳಷ್ಟು ಜನರಲ್ಲಿ ರಕ್ತಸ್ರಾವವಾಗುವುದಿಲ್ಲ.
ಚಿಕಿತ್ಸೆ ಹೇಗೆ?: ಡೆಂಗೆ ಜ್ವರಕ್ಕೆ ಫ್ಲೂ ಸೋಂಕಿನ ರೀತಿಯಲ್ಲಿಯೇ ಚಿಕಿತ್ಸೆ ನೀಡಬೇಕು. ಮಲೇರಿಯಾ ಅಥವಾ ಟೈಫಾಯಿಡ್ ಜ್ವರಗಳಿಗೆ ಇರುವಂತೆ ಪ್ರತ್ಯೇಕ ಚಿಕಿತ್ಸೆ ಇದಕ್ಕಿಲ್ಲ. ಜ್ವರದಿಂದ ಬಳಲುತ್ತಿರುವ ಮಕ್ಕಳಿಗೆ ಚಿಕಿತ್ಸೆ ನೀಡಿದರೆ 5 ದಿನಗಳಲ್ಲಿ ಗುಣವಾಗುತ್ತದೆ. ಆದರೆ ಇಬುಪ್ರೊಫೆನ್, ಮೆಫೆನಮಿಕ್ ಆಸಿಡ್‌ನಂತಹ ಔಷಧಗಳ ಬಗ್ಗೆ ಎಚ್ಚರ ವಹಿಸಬೇಕು. ಏಕೆಂದರೆ ಅವು ರಕ್ತಸ್ರಾವದ ಸಾಧ್ಯತೆ ಹೆಚ್ಚಿಸಬಹುದು. ಈ ಮಕ್ಕಳಲ್ಲಿ ಜ್ವರ ಮತ್ತು ದೇಹದ ನೋವುಗಳಿಗೆ ಅತ್ಯುತ್ತಮ ಔಷಧವೆಂದರೆ ಪ್ಯಾರಾಸಿಟಮಲ್. ಜ್ವರಕ್ಕೆ ಚಿಕಿತ್ಸೆಯೊಂದಿಗೆ ಹೈಡ್ರೇಷನ್ ಮಟ್ಟ ಕಾಪಾಡುವುದು ಬಹಳ ಮುಖ್ಯ. ಬರಿ ನೀರು ಕುಡಿಯುವುದನ್ನು ತಪ್ಪಿಸಿ. ಓರಲ್ ರೀಹೈಡ್ರೇಷನ್ ಸಲ್ಯೂಷನ್ (ಒಆರ್‌ಎಸ್) ಬಳಸುವುದು ಮುಖ್ಯ. ಬೀಟ್‌ರೂಟ್‌ನಂತಹ ಆಹಾರ ಬಳಸುವುದನ್ನು ತಪ್ಪಿಸಿ. ಅದು ಮಲದಲ್ಲಿ ರಕ್ತಸ್ರಾವದಂತೆ ಕಾಣುವ ಸಾಧ್ಯತೆ ಇರುತ್ತದೆ.
ಮಗು ಸಂಕೀರ್ಣತೆ ಬೆಳೆಸಿಕೊಳ್ಳುತ್ತಿದೆ ಎಂದು ಹೇಗೆ ಗೊತ್ತಾಗುತ್ತದೆ?: ಜ್ವರ ಕಡಿಮೆಯಾದ ಕೂಡಲೇ ಸಂಕೀರ್ಣತೆ ಪ್ರಾರಂಭವಾಗುತ್ತದೆ. ಆದ್ದರಿಂದಲೇ 4-5ನೇ ದಿನ ಜ್ವರ ಕಾಣಿಸಿಕೊಳ್ಳುತ್ತದೆ.
ಜ್ವರದ ಸಾಮಾನ್ಯವಾದ ಲಕ್ಷಣವೆಂದರೆ ಹೊಟ್ಟೆನೋವು ಮತ್ತು ವಾಂತಿ, ವಾಂತಿ ಮತ್ತು ಮಲದಲ್ಲಿ ರಕ್ತ, ಚಟುವಟಿಕೆ ಕಡಿಮೆಯಾಗುವುದು, ಅಂಗಾಂಗಗಳು ತಣ್ಣಗಾಗುವುದು, ಮೂತ್ರ ವಿಸರ್ಜನೆ ಕಡಿಮೆಯಾಗುವುದು, ಅಂತಹ ಮಕ್ಕಳಲ್ಲಿ ಆಹಾರಸೇವನೆ ದುರ್ಬಲವಾಗಿದ್ದರೆ ಆಸ್ಪತ್ರೆಗೆ ಸೇರಿಸುವುದು ಅಗತ್ಯ.
ಪ್ಲೇಟ್‌ಲೆಟ್ ಸಂಖ್ಯೆ ಬಹಳ ಮುಖ್ಯವೇ?: ಪ್ಲೇಟ್‌ಲೆಟ್ ಸಂಖ್ಯೆ ಮಗುವಿನ ಚಿಕಿತ್ಸೆಯಲ್ಲಿ ಮುಖ್ಯವಲ್ಲ. ಸೋಂಕಿನ ಸಂದರ್ಭದಲ್ಲಿ ಪ್ಲೇಟ್‌ಲೆಟ್ ಸಂಖ್ಯೆ ಕುಸಿಯುತ್ತದೆ ಮತ್ತು ಸುಧಾರಿಸುತ್ತಿರುವಾಗ ಹೆಚ್ಚಾಗುತ್ತದೆ. ಪ್ಲೇಟ್‌ಲೆಟ್ ನಿರ್ವಹಣೆಯಿಂದ ಕೂಡಲೇ ಸುಧಾರಿಸಿಕೊಳ್ಳುವುದು ಸಾಧ್ಯವಿಲ್ಲ. ಇಲ್ಲಿ ಪ್ಲೇಟ್‌ಲೆಟ್ ಸಂಖ್ಯೆಯಲ್ಲಿ ಕುಸಿತಕ್ಕಿಂತ ರಕ್ತದೊತ್ತಡದ ಕುಸಿತವೇ ಗಂಭೀರವಾದುದು. ಪ್ಲೇಟ್‌ಲೆಟ್ ಸಂಖ್ಯೆಗಿಂತಲೂ ಹೆಮಟೊಕ್ರಿಟ್ ಎಂಬ ಸೋರಿಕೆಯನ್ನು ಗಮನಿಸುವುದು ಬಹಳ ಮುಖ್ಯ.
ಡೆಂಗೆ ಜ್ವರವನ್ನು ಕಂಡುಹಿಡಿಯುವುದು ಹೇಗೆ?: ರಕ್ತಪರೀಕ್ಷೆಯಿಂದ ಇದು ದೃಢವಾಗುತ್ತದೆ. ಆದರೆ ಕೆಲ ಪರೀಕ್ಷೆಗಳನ್ನು ಜ್ವರ ಕಾಣಿಸಿಕೊಂಡ ಕೂಡಲೇ ನಡೆಸುವ ಮೂಲಕ ರೋಗಪತ್ತೆ ಮಾಡಬಹುದು.
ಡೆಂಗೆಗೆ ಲಸಿಕೆ ಇದೆಯೇ? ಇಲ್ಲ. ಪ್ರಸ್ತುತ ಪರಿಣಾಮಕಾರಿ ಲಸಿಕೆ ಅಭಿವೃದ್ಧಿಪಡಿಸಲು ಸಂಶೋಧನೆ ನಡೆಸಲಾಗುತ್ತಿದೆ.
ಡೆಂಗೆ ಜ್ವರವನ್ನು ತಡೆಯಬಹುದೇ? ರೋಗ ತಡೆಯುವುದು ಎಂದರೆ ಸೊಳ್ಳೆಗಳಿಂದ ಕಚ್ಚಿಸಿಕೊಳ್ಳುವುದನ್ನು ತಡೆಯುವುದು. ಸೊಳ್ಳೆ ನಿರೋಧಕ ಕ್ರೀಮ್ ಹಚ್ಚಿಕೊಳ್ಳುವುದು ಮತ್ತು ನೀರು ನಿಲ್ಲುವುದನ್ನು ತಡೆಯುವ ಮೂಲಕ ಸೊಳ್ಳೆಯ ಕಾಟವನ್ನು ತಪ್ಪಿಸಬಹುದು.
