ನವದೆಹಲಿ: ಮುಂದಿನ ಸಲ ಭಾರತಕ್ಕೆ ಬರುವಾಗ ಖಂಡಿತ ನನ್ನ ಇಬ್ಬರೂ ಪುತ್ರಿಯರನ್ನೂ ಜತೆಗೆ ಕರೆತರುತ್ತೇನೆ ಎಂದು ಅಮೆರಿಕ ಅಧ್ಯಕ್ಷ ಬರಾಕ್ ಒಬಾಮ ಹೇಳಿದರು.
ಮಂಗಳವಾರ ಪ್ರಸಾರವಾದ ಪ್ರಧಾನಿ ನರೇಂದ್ರ ಮೋದಿ ಅವರ ‘ಮನ್ ಕಿ ಬಾತ್’ (ಮನದ ಮಾತು) ಧ್ವನಿಮುದ್ರಿತ ರೇಡಿಯೊ ಕಾರ್ಯಕ್ರಮದಲ್ಲಿ ಒಬಾಮ ಕೂಡ ವೈಯಕ್ತಿಕ ವಿಷಯಗಳ ಬಗ್ಗೆ ಮನಬಿಚ್ಚಿ ಮಾತನಾಡಿದ್ದಾರೆ.
‘ಭಾರತಕ್ಕೆ ಬರಲು ನನ್ನ ಮಕ್ಕಳು ತುದಿಗಾಲಲ್ಲಿ ನಿಂತಿದ್ದಾರೆ. ಆದರೆ, ನಾವು ಇಲ್ಲಿಗೆ ಬರುವಾಗ ಅವರಿಗೆ ಶಾಲೆ ಇರುತ್ತದೆ. ತರಗತಿ
ಬರಾಕ್ ಎಂದರೆ ಅದೃಷ್ಟಶಾಲಿ ಎಂದರ್ಥ. ಅಮೆರಿಕದ ಅಧ್ಯಕ್ಷರಿಗೆ ಅವರ ಕುಟುಂಬ ಈ ಹೆಸರಿಟ್ಟು ಆಶೀರ್ವದಿಸಿದೆ
– ಮೋದಿ
ತಪ್ಪಿಸಿಕೊಳ್ಳಲು ಅವರಿಗೆ ಇಷ್ಟವಿಲ್ಲ. ಹಾಗಾಗಿ ಅವರಿಗೆ ಇಲ್ಲಿಗೆ ಬರಲು ಸಾಧ್ಯವಾಗುತ್ತಿಲ್ಲ’ ಎಂದು ಅಸಹಾಯಕತೆ ವ್ಯಕ್ತಪಡಿಸಿದರು.
‘ಭಾರತದ ಬಗ್ಗೆ ಅವರಿಗೆ ಭಾರಿ ವ್ಯಾಮೋಹವಿದೆ. ಈ ದೇಶದ ಬಗ್ಗೆ ತಿಳಿದುಕೊಳ್ಳುವ ಕುತೂಹಲ, ಹಂಬಲವಿದೆ. ಇಲ್ಲಿಯ ಕಲೆ, ಸಂಸ್ಕೃತಿ ಮತ್ತು ಇತಿಹಾಸದಿಂದ ಅವರು ಪ್ರಭಾವಿತರಾಗಿದ್ದಾರೆ’ ಎಂದರು.
‘ಭಾರತದ ಸ್ವಾತಂತ್ರ್ಯ ಸಂಗ್ರಾಮ ಹಾಗೂ ಗಾಂಧೀಜಿ ಅವರ ಪಾತ್ರದ ಬಗ್ಗೆ ಎಲ್ಲ ವಿಷಯಗಳನ್ನೂ ಅವರು ತಿಳಿದು ಕೊಂಡಿದ್ದಾರೆ. ಗಾಂಧೀಜಿ ಅಹಿಂಸಾ ಮಾರ್ಗ ಅಮೆರಿಕದ ನಾಗರಿಕ ಹಕ್ಕುಗಳ ಆಂದೋಲನದ ಮೇಲೆ ಬೀರಿದ ಪ್ರಭಾವದ ಬಗ್ಗೆಯೂ ಗೊತ್ತಿದೆ’ ಎಂದರು.
‘ನಾನು ಮರಳಿ ಅಮೆರಿಕ್ಕೆ ಹೋದ ಬಳಿಕ ನನ್ನ ಮಕ್ಕಳಿಗೆ ಈ ದೇಶ ಎಷ್ಟು ಸುಂದರವಾಗಿದೆ ಎಂದು ಹೇಳುತ್ತೇನೆ. ಅವರ ಕಲ್ಪನೆಯ ಭಾರತದಂತೆಯೇ ಈ ದೇಶ ಅತ್ಯಂತ ಸುಂದರವಾಗಿದೆ ಎಂದು ತಿಳಿಸುತ್ತೇನೆ’ ಎಂದು ನುಡಿದರು.
‘ಇಲ್ಲಿಯ ಕಥೆಗಳನ್ನೆಲ್ಲ ನನ್ನಿಂದ ಕೇಳಿ ತಿಳಿದರೆ, ಮುಂದಿನ ಸಲ ನಾವು ಇಲ್ಲಿಗೆ ಬರುವಾಗ ತಮ್ಮನ್ನೂ ಜತೆಗೆ ಕರೆದೊಯ್ಯುವಂತೆ ಅವರು ಖಂಡಿತ ಪಟ್ಟು ಹಿಡಿಯುತ್ತಾರೆ. ನಾನು ಅಮೆರಿಕದ ಅಧ್ಯಕ್ಷನಾಗಿರುವಾಗ ಇದು ಸಾಧ್ಯವಾಗದಿದ್ದರೂ, ಆ ನಂತರವಾದರೂ ಅವರನ್ನು ಇಲ್ಲಿಗೆ ಕರೆತಂದು ಅವರ ಕಲ್ಪನೆಯ ಸುಂದರ ಭಾರತವನ್ನು ತೋರಿಸುತ್ತೇನೆ’ ಎಂದರು.
ಇದಕ್ಕೆ ಪ್ರತಿಕ್ರಿಯಿಸಿದ ಮೋದಿ, ‘ಒಬಾಮ ಅವರಿಗೆ ಈ ದೇಶದ ಬಾಗಿಲು ಸದಾ ತೆರೆದಿರುತ್ತದೆ. ಅವರು ಅಧ್ಯಕ್ಷರಾಗಿರಲಿ ಅಥವಾ ಆಗಿರದೇ ಇರಲಿ. ಅವರಿಗೆ ಸದಾ ಸ್ವಾಗತ’ ಎಂದರು.