ರಾಷ್ಟ್ರೀಯ

2005ಕ್ಕಿಂತ ಹಿಂದೆ ಮುದ್ರಣವಾಗಿರುವ ನೋಟುಗಳ ಬದಲಿಗೆ ಜ.1 ಕಡೆಯ ದಿನ

Pinterest LinkedIn Tumblr

currency_note_found

ಹೊಸದಿಲ್ಲಿ: ಹಳೆಯ ನೋಟುಗಳನ್ನು ಹೊಸ ನೋಟುಗಳಿಗೆ ಬದಲಿಸಿಕೊಳ್ಳಲು ಇನ್ನು 10 ದಿನ ಮಾತ್ರ ಬಾಕಿ ಉಳಿದಿದೆ. 2005ಕ್ಕಿಂತ ಹಿಂದೆ ಮುದ್ರಣವಾಗಿದ್ದ ನೋಟುಗಳನ್ನು ಬ್ಯಾಂಕ್‌ಗಳಿಗೆ ಕೊಟ್ಟು ಅದೇ ಮೌಲ್ಯಕ್ಕೆ ಹೊಸ ನೋಟುಗಳನ್ನು ಪಡೆಯಲು ಜ.1 ಕೊನೆಯ ದಿನವಾಗಿರುತ್ತದೆ.

ಹಳೆಯ ನೋಟುಗಳನ್ನು ಹೊಸ ನೋಟುಗಳಿಗೆ ಬದಲಿಸಿಕೊಳ್ಳುವಂತೆ ಈ ಹಿಂದೆಯೇ ಕೇಂದ್ರ ಹಣಕಾಸು ಸಚಿವಾಲಯ ಮತ್ತು ರಿಸರ್ವ್ ಬ್ಯಾಂಕ್ ಹಲವು ಬಾರಿ ನಿರ್ದೇಶನ ನೀಡಿದ್ದವು. ಈಗ ಇದಕ್ಕೆ ಅಂತಿಮ ಗಡುವು ಬಿದ್ದಿದ್ದು, ಈ ಕೂಡಲೇ ಗ್ರಾಹಕರು ಬ್ಯಾಂಕ್‌ಗೆ ತೆರಳಿ ತಮ್ಮ ಬಳಿ ಇರುವ 2005ಕ್ಕಿಂತ ಹಳೆಯ 100, 500, 1000 ಮುಖಬೆಲೆಯ ನೋಟುಗಳನ್ನು ಬದಲಿಸಿಕೊಳ್ಳಬೇಕು. ಜ.1ರ ನಂತರ ಹಳೆಯ ನೋಟುಗಳಿಗೆ ಮಾನ್ಯತೆ ಇರುವುದಿಲ್ಲ ಎಂಬುದನ್ನು ಗ್ರಾಹಕರು ಅರಿಯಬೇಕು.

2005ಕ್ಕಿಂತ ಹಿಂದೆ ಮುದ್ರಣವಾಗಿರುವ ಎಲ್ಲಾ ಮುಖಬೆಲೆಯ ನೋಟುಗಳ ಹಿಂಬದಿಯ ಕೆಳಭಾಗದಲ್ಲಿ ‘ನೋಟಿನ ಮುದ್ರಿತ ವರ್ಷ’ ನಮೂದಾಗುತ್ತಿರಲಿಲ್ಲ. ಜತೆಗೆ, ನಕಲಿ ನೋಟುಗಳ ಹಾವಳಿ ಹೆಚ್ಚಾಗುತ್ತಿರುವುದನ್ನು ಮನಗಂಡ ಕೇಂದ್ರ ಹಣಕಾಸು ಸಚಿವಾಲಯ ಮತ್ತು ಆರ್‌ಬಿಐ, 2005ರಿಂದ ವಿವಿಧ ಮುಖಬೆಲೆಯ ನೋಟುಗಳಿಗೆ ಕೆಲವೊಂದು ಭದ್ರತಾ ಗುಣಲಕ್ಷಣಗಳನ್ನು ಸೇರ್ಪಡೆ ಮಾಡಿ, ಮುದ್ರಿತ ಇಸವಿಯನ್ನು ನಮೂದಿಸುತ್ತಿದೆ.

ಹಾಗಾಗಿ, 2005ಕ್ಕಿಂತ ಮುನ್ನ ಮುದ್ರಣವಾಗಿರುವ ಎಲ್ಲಾ ನೋಟುಗಳನ್ನು ಆರ್‌ಬಿಐ ಚಲಾವಣೆಯಿಂದ ಹಿಂದೆ ಪಡೆದು ನಾಶಪಡಿಸುತ್ತಿದೆ. ಆರ್‌ಬಿಐ ಈ ಕ್ರಮವು ನಕಲಿ ನೋಟುಗಳ ಹಾವಳಿಯನ್ನು ತಡೆಯಲು ನೆರವಾಗಿದೆ. 2005ಕ್ಕಿಂತ ಮೊದಲಿನ ಎಲ್ಲಾ ನೋಟುಗಳನ್ನು ಚಲಾವಣೆಗೆಬಿಡಬಾರದು. ಶಾಖೆಗಳಿಗೆ ಬರುವ ಅಂತಹ ನೋಟುಗಳನ್ನು ಆರ್‌ಬಿಐಗೆ ತಲುಪಿಸುವಂತೆ ಎಲ್ಲಾ ಬ್ಯಾಂಕ್‌ಗಳಿಗೆ ರಿಸರ್ವ್ ಬ್ಯಾಂಕ್ ಕಟ್ಟುನಿಟ್ಟಿನ ಸೂಚನೆ ನೀಡಿದೆ.

2005ಕ್ಕಿಂತ ಮೊದಲು ಮುದ್ರಣವಾಗಿದ್ದ ನೋಟುಗಳನ್ನು ಚಲಾವಣೆಯಿಂದ ಹಿಂಪಡೆಯಲು ಆರ್‌ಬಿಐ ಏಪ್ರಿಲ್‌ನಲ್ಲಿ ಆಂದೋಲನ ಆರಂಭಿಸಿತ್ತು. ಅದು ಇಲ್ಲಿಯವರೆಗೆ 144.66 ಕೋಟಿ ಹಳೆಯ ನೋಟುಗಳನ್ನು ಚೂರುಚೂರು ಮಾಡಿದೆ. ಆ ನೋಟುಗಳ ಮೌಲ್ಯ 52,855 ಕೋಟಿ ರೂ.

2005ರ ತರುವಾಯ ಮುದ್ರಣವಾಗುತ್ತಿರುವ ವಿವಿಧ ಮುಖಬೆಲೆಯ ನೋಟುಗಳಿಗೆ ಭದ್ರತಾ ಗುಣಲಕ್ಷಣಗಳನ್ನು ಸೇರಿಸಲಾಗಿದೆ. ನಕಲಿ ನೋಟುಗಳ ಹಾವಳಿ ತಡೆಗೆ ಆರ್‌ಬಿಐ, ಈ ಕ್ರಮ ತೆಗೆದುಕೊಂಡಿದೆ.

2005ಕ್ಕಿಂತ ಹಿಂದೆ ಮುದ್ರಣವಾಗಿರುವ ನೋಟುಗಳ ಹಿಂಬದಿಯಲ್ಲಿ ಮುದ್ರಣದ ವರ್ಷ ನಮೂದಾಗಿರುತ್ತಿರಲಿಲ್ಲ. 2005ರ ನಂತರ ಅದು ಮುದ್ರಣವಾಗುತ್ತಿದೆ.

2005ಕ್ಕಿಂತ ಮುನ್ನ ಮುದ್ರಣವಾದ 100 ರೂ. ಮುಖಬೆಲೆಯ 73.2 ಕೋಟಿ ನೋಟುಗಳು, 500 ರೂ. ಮುಖಬೆಲೆಯ 51.85 ಕೋಟಿ ನೋಟುಗಳು ಹಾಗೂ 1,000 ರೂ. ಮುಖಬೆಲೆಯ 19.61 ಕೋಟಿ ನೋಟುಗಳನ್ನು ಆರ್‌ಬಿಐ ನಾಶಪಡಿಸಿದೆ.

ಸಾರ್ವಜನಿಕರೇನು ಮಾಡಬೇಕು?
ಸಾಮಾನ್ಯವಾಗಿ 2005ಕ್ಕಿಂತ ಹಿಂದೆ ಮುದ್ರಣವಾಗಿರುವ ನೋಟುಗಳ ಮೇಲೆ ಎಲ್ಲೂ ಮುದ್ರಣ ಇಸವಿ ಇರುವುದಿಲ್ಲ. ಇದನ್ನು ಗಮನಿಸಿ, ಅವು ಹಳೇ ನೋಟುಗಳಾಗಿದ್ದಲ್ಲಿ, ಹತ್ತಿರದ ಬ್ಯಾಂಕ್ ಶಾಖೆಗೆ ಹೋಗಿ ಅದನ್ನು ಹೊಸ ನೋಟುಗಳಿಗೆ ಬದಲಿಸಿಕೊಳ್ಳಬೇಕು. ಹೊಸ ನೋಟುಗಳ ಹಿಂಬದಿಯ ಕಳಭಾಗದಲ್ಲಿ ಮುದ್ರಿತ ವರ್ಷ ಇರುವುದನ್ನು ಗಮನಿಸಬೇಕು. ಇನ್ನು ಬರೀ 10 ದಿನಗಳ ಗಡುವು ಇರುವುದಿರಂದ ತುರ್ತಾಗಿ ಈ ಕೆಲಸ ಮಾಡಿದರೆ ಒಳಿತು. ಜ.1ರ ನಂತರ ಹಳೇ ನೋಟುಗಳಿಗೆ ಮಾನ್ಯತೆ ಇರುವುದಿಲ್ಲ ಎಂಬುದನ್ನು ನೆನಪಿಡಬೇಕು.

ಹಿಂದಿಯಲ್ಲಿ ವಹಿವಾಟು ವಿವರ?
ದೈನಂದಿನ ಬ್ಯಾಂಕಿಂಗ್ ವ್ಯವಹಾರದಲ್ಲಿ ಹಿಂದಿಯನ್ನು ಜನಪ್ರಿಯಗೊಳಿಸಬೇಕೆಂದು ಕೇಂದ್ರ ಗೃಹ ಸಚಿವಾಲಯ ಎಲ್ಲ ಸಾರ್ವಜನಿಕ ರಂಗದ ಬ್ಯಾಂಕುಗಳಿಗೆ ಸೂಚನೆ ಕೊಟ್ಟಿದೆ. ಈ ಪ್ರಸ್ತಾವನೆಯನ್ನು ಅವು ಜಾರಿಗೆ ತಂದರೆ ಬ್ಯಾಂಕ್ ವಹಿವಾಟಿನ ಸಂದೇಶ, ಎಟಿಎಂ ಯಂತ್ರದಿಂದ ಪಡೆಯುವ ರಶೀದಿ ಅಥವಾ ಚೀಟಿಗಳಲ್ಲಿ ಹಿಂದಿ ಭಾಷೆ ಕಾಣಿಸಿಕೊಳ್ಳಲಿದೆ. ಇಂಟರ್‌ನೆಟ್ ಅಥವಾ ಮೊಬೈಲ್ ಬ್ಯಾಂಕಿಂಗ್ ಸೇವೆಗಳಲ್ಲಿ ಇದುವರೆಗೆ ಹಿಂದಿ ಭಾಷೆಯ ಬಳಕೆಯ ಸೌಲಭ್ಯ ಸಿಗುತ್ತಿಲ್ಲ. ಗ್ರಾಹಕರಿಗೆ ಕಳುಹಿಸುವ ಇ-ಮೇಲ್‌ಗಳು, ಬ್ಯಾಂಕ್ ವಹಿವಾಟಿನ ಎಸ್ಸೆಮ್ಮೆಸ್‌ಗಳು ಹಿಂದಿ ಭಾಷೆಯಲ್ಲಿ ಬರಬೇಕು. ಇದನ್ನು ಬ್ಯಾಂಕ್‌ಗಳು ದೃಢಪಡಿಸಬೇಕು ಎಂದು ಗೃಹ ಸಚಿವಾಲಯ ಇತ್ತೀಚೆಗೆ ಹಣಕಾಸು ಸೇವೆಗಳ ಇಲಾಖೆಗೆ ಪತ್ರ ರವಾನಿಸಿದೆ.

ನಕಲು ನೋಟುಗಳ ಹಾವಳಿ ತಡೆಗಾಗಿ 2005ಕ್ಕಿಂತ ಮುಂಚೆ ಮುದ್ರಣವಾದ ಎಲ್ಲಾ ಮುಖಬೆಲೆಯ ನೋಟುಗಳನ್ನು ಹಿಂಪಡೆಯಲಾಗುತ್ತಿದೆಯೇ ಹೊರತು ಕಪ್ಪು ಹಣ ಮತ್ತು ತೆರಿಗೆ ವಂಚನೆ ಪತ್ತೆಗಾಗಿ ಅಲ್ಲ. ಇದೊಂದು ತಾಂತ್ರಿಕ ಕ್ರಮ. ಕೆಲವಷ್ಟೇ ಭದ್ರತಾ ಗುಣಲಕ್ಷಣಗಳಿರುವ ಹಳೆಯ ನೋಟುಗಳನ್ನು ಹಿಂಪಡೆಯಲಾಗುತ್ತಿದೆ. ಸಾರ್ವಜನಿಕ ಕೈಯಲ್ಲಿ ಹೆಚ್ಚಿನ ವಿಶ್ವಾಸಾರ್ಹ ನೋಟುಗಳು ಚಲಾವಣೆ ಆಗಬೇಕು ಎಂಬುದು ನಮ್ಮ ಉದ್ದೇಶ.
– ರಘುರಾಮ್ ಜಿ ರಾಜನ್
ಆರ್‌ಬಿಐ ಗರ್ವನರ್

Write A Comment