ಬಹರಿನ್;ಶತಮಾನೋತ್ಸವದ ಸಂಭ್ರಮದಲ್ಲಿರುವ ಇಲ್ಲಿನ ಪ್ರತಿಷ್ಟಿತ ದಿ ಇಂಡಿಯನ್ ಕ್ಲಬ್ಬಿನ ನೂತನವಾಗಿ ನಿರ್ಮಾಣಗೊಂಡಿರುವ ಗಡಿ ಗಡಿ ಗೋಡೆಯ ಉದ್ಘಾಟನಾ ಕಾರ್ಯಕ್ರಮದಲ್ಲಿ ಭಾರತದ ಮಾಜಿ ಕೇಂದ್ರ ಸಚಿವ ,ರಾಜ್ಯ ಸಭಾ ಸದಸ್ಯ ಆಸ್ಕರ್ ಫೆರ್ನಾಂಡೀಸ್ ಹಾಗು ಇಲ್ಲಿನ ಮಂತ್ರಿ ಮಂಡಲದ ಸಚಿವರುಗಳು ,ರಾಜ ಮನೆತನದವರು ,ಇಲ್ಲಿನ ಭಾರತೀಯ ರಾಯಭಾರಿ ಡಾ ಮೋಹನ್ ಕುಮಾರ್ ,ಗಡಿ ಗೋಡೆಯನ್ನು ಉಚಿತವಾಗಿ ನಿರ್ಮಿಸಿಕೊಟ್ಟಿರುವ ಅಲ್ ನಮಾಲ್ ಸಮೂಹ ಸಂಸ್ಥೆಯ ಆಡಳಿತ ನಿರ್ದೇಶಕ ಡಾ ವರ್ಗೀಸ್ ಕುರಿಯನ್ ಮುಂತಾದವರು ಪಾಲ್ಗೊಂಡು ಗಡಿ ಗೋಡೆಯನ್ನು ವಿದ್ಯುಕ್ತವಾಗಿ ಉದ್ಘಾಟಿಸಿದರಲ್ಲದೆ ನೂರು ದಿನಗಳು ಜರುಗಲಿರುವ ಶತಮಾನೋತ್ಸವದ ವಿಶೇಷ ಸಾಂಸ್ಕ್ರತಿಕ ಹಾಗು ಕ್ರೀಡಾ ಕಾರ್ಯಕ್ರಮಗಳಿಗೆ ವಿದ್ಯುಕ್ತ ಚಾಲನೆ ನೀಡಿದರು .
ಕಾರ್ಯಕ್ರಮದ ಪ್ರಾರಂಭದಲ್ಲಿ ಇಂಡಿಯನ್ ಕ್ಲಬ್ಬಿನ ಸಾರಥ್ಯವನ್ನು ವಹಿಸಿಕೊಂಡಿರುವ ಅಧ್ಯಕ್ಷರಾದ ಶ್ರೀ ಆನಂದ್ ರವರು ಇಂಡಿಯನ್ ಸ್ಕೂಲಿನ ವಾದ್ಯ ವ್ರಂದದೊಂದಿಗೆ ಮುಖ್ಯ ದ್ವಾರದಲ್ಲಿ ಎಲ್ಲಾ ಗಣ್ಯರುಗಳನ್ನು ಸ್ವಾಗತಿಸಿ ವೇದಿಕೆಗೆ ಬರಮಾಡಿಕೊಂಡರು . ವಾದ್ಯವ್ರಂದದವರು ಭಾರತದ ಹಾಗು ಬಹರೈನ್ ನ ರಾಷ್ಟ್ರಗೀತೆಗಳನ್ನು ನುಡಿಸಿದ ನಂತರ ಸಭಾ ಕಾರ್ಯಕ್ರಮಪ್ರಾರಂಭಗೊಂಡಿತು . ಈ ಸಂಧರ್ಭದಲ್ಲಿ ನೆರೆದವರನ್ನು ಉದ್ದೇಶಿಸಿ ಮಾತನಾಡಿದ ವೇದಿಕೆಯ ಮೇಲಿದ್ದ ಗಣ್ಯರುಗಳು ಶತಮಾನೋತ್ಸವವನ್ನು ಆಚರಿಸುತ್ತಿರುವ ಇಂಡಿಯನ್ ಕ್ಲಬ್ಬಿಗೆ ಶುಭ ಹಾರೈಸಿದರು . ಅಧ್ಯಕ್ಷರಾದ ಶ್ರೀ ಆನಂದ್ ಲೋಬೋರವರು ನೂರು ದಿನಗಳ ಶತಮಾನೋತ್ಸವದ ಆಚರಣೆಯ ಸಂಕ್ಷಿಪ್ತ ವಿವರಣೆಯನ್ನು ನೀಡಿದರು . ವೇದಿಕೆಯ ಮೇಲಿರುವ ಗಣ್ಯರುಗಳನ್ನು ಸ್ಮರಣಿಕೆಗಳನ್ನು ನೀಡಿ ಸಮ್ಮಾನಿಸಲಾಯಿತು .
ತದನಂತರ ಜರುಗಿದ ಮನೋರಂಜನಾ ಕಾರ್ಯಕ್ರಮದಲ್ಲಿ ದಕ್ಷಿಣ ಭಾರತದ ಖ್ಯಾತ ಪಿಟೀಲು ವಾದಕ ಶ್ರೀ ಬಾಲ ಭಾಸ್ಕರ್ ರವರು ತಮ್ಮ ತಂಡದೊಂದಿಗೆ ಸತತ ೨ ಘಂಟೆಗಳ ಕಾಲ ಸಂಗೀತ ಧಾರೆಯನ್ನು ಹರಿಸಿ ನೆರೆದ ಶೋತ್ರಗಳು ಮಂತ್ರ ಮುಗ್ದರಾಗುವಂತೆ ಮಾಡಿದರು
ಚಿತ್ರ -ವರದಿ – ಕಮಲಾಕ್ಷ ಅಮೀನ್