ಉಡುಪಿ: ಕುಂಜಿಬೆಟ್ಟು ಶಾರದಾ ರೆಸಿಡೆನ್ಶಿಯಲ್ ಸ್ಕೂಲ್(ಎಸ್‌ಆರ್‌ಎಸ್) ವಿದ್ಯಾರ್ಥಿನಿ ಇಶಿಕಾ ಎಸ್. ಶೆಟ್ಟಿ(13) ನಾಪತ್ತೆಯಾಗಿ 16 ದಿನಗಳೇ ಕಳೆದರೂ ಇನ್ನೂ ಪತ್ತೆಯಾಗಿಲ್ಲ. ಮುಂಬೈಯ ಮನೆಯೊಂದರಲ್ಲಿ ಇಶಿಕಾ ಇರುವುದನ್ನು ಕುಟುಂಬಿಕರು ಶನಿವಾರ ಪತ್ತೆ ಹಚ್ಚಿದ್ದಾಗಿ ವರದಿಯಾಗಿದ್ದರೂ, ಇದನ್ನು ಬಾಲಕಿಯ ತಾಯಿ ಪ್ರಿಯಾ ಶೆಟ್ಟಿ ಹಾಗೂ ಜಿಲ್ಲಾ ಪೊಲೀಸ್ ವರಿಷ್ಠಾಕಾರಿ ಪಿ.ರಾಜೇಂದ್ರ ಪ್ರಸಾದ್ ನಿರಾಕರಿಸಿದ್ದಾರೆ.
ಬಾಲಕಿಯನ್ನು ಜೀವಂತವಾಗಿ ಪತ್ತೆ ಹಚ್ಚಲು ಮುಂಬೈ ಸಹಿತ ವಿವಿಧೆಡೆಗೆ ತೆರಳಿದ ಪೊಲೀಸರ ಎಂಟು ತಂಡಗಳು ಗಂಭೀರ ಪ್ರಯತ್ನ ಮಾಡುತ್ತಿವೆ. ಮುಂಬೈಯಲ್ಲಿ ಇಶಿಕಾ ಶೆಟ್ಟಿ ಪತ್ತೆಯಾಗಿದ್ದಾಳೆನ್ನುವ ಸುದ್ದಿ ಬರಿಯ ವದಂತಿಯಾಗಿದೆ ಎಂದು ಅವರು ಸ್ಪಷ್ಟಪಡಿಸಿದ್ದಾರೆ.
