ಅತ್ತೆಮನೆಯಲ್ಲೇ ಕಳ್ಳತನ ಮಾಡಿದ ಕಿರುತೆರೆ ನಟಿ; ಇದಕ್ಕೆ ಸಹಾಯ ಮಾಡಿದವರು ಯಾರು ಗೊತ್ತಾ?

ಚೆನ್ನೈ: ಇಲ್ಲೊಬ್ಬ ಸಿನಿಮಾ ನಟಿ ತಾನು ಮದುವೆಯಾದ ಪತಿ ಮನೆಯನ್ನೇ ದೋಚಿ ಸಿನಿಮಾ ಸ್ಟೈಲ್​ನಲ್ಲಿ ನಾಪತ್ತೆಯಾಗಿದ್ದಾಳೆ. ಇದಕ್ಕೆ ನಟಿಯ ಗಂಡ ಕೂಡ ಬೆಂಬಲ ನೀಡಿದ್ದಾನೆ. ತಮಿಳಿನ ದೈವಿಮಗಳು ಧಾರಾವಾಹಿ ನಟಿ ಸುಚಿತ್ರಾ ಈ ಕೃತ್ಯದ ರೂವಾರಿ.

ಮದುವೆಗೆ ಅನುಮತಿ ಕೇಳಲು ಗಂಡನ ಮನೆಗೆ ಹೋದ ನಟಿ, ಹಣದ ಮುಗ್ಗಟ್ಟಿನಿಂದಾಗಿ ಈ ಕೃತ್ಯ ಎಸಗಿದ್ದಾಳೆ. ಅತ್ತೆ ಮನೆಯಲ್ಲಿ ಕಳ್ಳತನ ಮಾಡಲು ಗಂಡನ ಸಹಾಯ ಪಡೆದಿದ್ದು, ಸ್ವಂತಃ ಮನೆದೋಚಲು ಆತನಿಗೆ ತಿಳಿಸಿದ್ದಾಳೆ. ಈ ಕುರಿತು ಪೊಲೀಸ್​ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದ್ದು, ಇವರ ಹುಡುಕಾಟಕ್ಕೆ ಮುಂದಾಗಿದ್ದಾರೆ.

ತಮಿಳಿನ ಕಿರುತೆರೆ ನಟಿಯಾಗಿರುವ ಸುಚಿತ್ರ ಮಣಿಕಂದನ್​ ಎಂಬಾತನನ್ನು ಪ್ರೀತಿಸಿ, ರಹಸ್ಯವಾಗಿ ಮದುವೆಯಾಗಿದ್ದಳು. ವೃತ್ತಿಯಲ್ಲಿ ಕಾರು ಚಾಲಕನಾಗಿರುವ ಮಣಿಕಂದನ್ ಗೆ​ ಶೂಟಿಂಗ್​ ವೇಳೆ ಸುಚಿತ್ರಾಳ ಪರಿಚಯವಾಗಿತ್ತು.

ಇದಾದ ಬಳಿಕ ಮಣಿಕಂದನ್​ ತನ್ನ ಮನೆಯವರಿಗೆ ಸುಚಿತ್ರಾಳ ಪರಿಚಯ ಮಾಡಿಸಲು ಕರೆದೊಯ್ದಿದ್ದಾನೆ. ಮೊದಲಿಗೆ ಅವರ ಮನೆಯವರು ವಿರೋಧಿಸಿದ್ದು, ನಂತರ ಅವರು ಒಪ್ಪಿಗೆ ನೀಡಿದ್ದಾರೆ

ಈ ವೇಳೆ ಹಣದ ಸಮಸ್ಯೆ ಎದುರಿಸುತ್ತಿದ್ದ ಸುಚಿತ್ರಾಗೆ ಮನೆಯಲ್ಲಿದ್ದ ಚಿನ್ನಾಭರಣ ಕಣ್ಣಿಗೆ ಕಂಡಿದೆ. ಅಲ್ಲದೇ ಈ ಹಣದಿಂದ ನಾವು ಕಿರುಚಿತ್ರ ತಯಾರಿಸಿ, ಯೂಟ್ಯೂಬ್​ನಿಂದ ಹಣ ಸಂಪಾದಿಸಬಹುದು ಎಂದು ಗಂಡನನ್ನು ಒಪ್ಪಿಸಿದ್ದಾಳೆ.

ಇದಕ್ಕೆ ಒಪ್ಪಿದ ಮಣಿಕಂದನ್​ ತನ್ನ ಮನೆಯನ್ನೇ ದರೋಡೆ ಮಾಡಲು ಸಿದ್ದನಾಗಿದ್ದಾನೆ. ಇದಕ್ಕಾಗಿ ಯೋಜನೆ ರೂಪಿಸಿದ್ದಾನೆ. ಮೊದಲಿಗೆ ಯಾರಿಗೂ ಅನುಮಾನ ಬರದಂತೆ ಸುಚಿತ್ರಾ ಮನೆಯಿಂದ ಚೆನ್ನೈಗೆ ಹೊರಟ್ಟಿದ್ದಾಳೆ. ಈಕೆ ಹೋದ ಬಳಿಕ ಮಣಿಕಂದನ್​ ಮನೆಯಲ್ಲಿದ್ದ ನಗ ನಾಣ್ಯ ಕಳ್ಳತನ ಮಾಡಿದ್ದಾನೆ. ಈ ಕುರಿತು ಮಣಿಕಂದನ್​ ಪೋಷಕರು ಪೊಲೀಸ್​ ಠಾಣೆಯಲ್ಲಿ ಪ್ರಕರಣ ದಾಖಲಿಸಿದ್ದಾರೆ.