ಹೊಸ ದಿಲ್ಲಿ: ಐಐಟಿ ಗುವಾಹಟಿ ಹಾಗೂ ಸಿಂಗಾಪುರದ ಡ್ಯೂಕ್-ಎನ್ಯುಎಸ್ ಮೆಡಿಕಲ್ ಸ್ಕೂಲ್ನ ಸಂಶೋಧಕರು ಜಂಟಿಯಾಗಿ ಕೋವಿಡ್-19 ಸೋಂಕಿತರ ಪ್ರಕರಣದ ಅಂದಾಜು ಲೆಕ್ಕ ಮಾಡಲು ಹೊಸ ಗಣಿತ ಮಾದರಿಯನ್ನು ರೂಪಿಸಿದ್ದಾರೆ.
ಪ್ರಸ್ತುತ ಇರುವ ರೆಡ್ ಜೋನ್, ಆರೆಂಜ್ ಜೋನ್ ಹಾಗೂ ಗ್ರೀನ್ ಜೋನ್ ಎಂಬ ಮೂರು ಮಾದರಿಯೂ ಅಡಕವಾಗಿರುವಂತಹ ಹೊಸ ಡೇಟಾ- ಸೈನ್ಸ್ ಮಾಡೆಲ್ ರಚಿಸಲಾಗಿದೆ. ಈ ಸೂತ್ರದ ಪ್ರಕಾರ ದೇಶದ ನಾನಾ ರಾಜ್ಯಗಳಲ್ಲಿ 30 ದಿನಗಳಲ್ಲಿ ಎಷ್ಟು ಕೊರೊನಾ ಪ್ರಕರಣಗಳು ದಾಖಲಾಗಬಹುದು ಎಂಬುದನ್ನು ಅಂದಾಜಿಸಲು ಸಾಧ್ಯ ಎಂದು ಸಂಶೋಧಕರು ವಿವರಣೆ ನೀಡಿದ್ದಾರೆ.
ನಿಯಂತ್ರಿತ (ಕಂಟ್ರೋಲ್ಡ್), ಸಾಮಾನ್ಯ (ಮಾಡರೇಟ್) ಹಾಗೂ ಗಂಭೀರ(ಸಿವಿಯರ್) ಎಂದು ರಾಜ್ಯಗಳನ್ನು ವಿಭಾಗ ಮಾಡಿ ಅಲ್ಲಿ ದಿನವೊಂದಕ್ಕೆ ಪತ್ತೆಯಾಗುತ್ತಿರುವ ಪ್ರಕರಣಗಳ ಆಧಾರದಲ್ಲಿ ಒಂದು ತಿಂಗಳಲ್ಲಿ ಎಷ್ಟು ಪ್ರಕರಣಗಳು ದಾಖಲಾಗಬಹುದು ಎಂಬುದನ್ನು ಅಂದಾಜಿಸಲು ಸಾಧ್ಯ. ಒಟ್ಟು ಪ್ರಕರಣ ಸಂಖ್ಯೆಯನ್ನು ಲಾಜಿಸ್ಟಿಕ್ ಹಾಗೂ ಎಕ್ಸ್ಪೊನೆನ್ಷಿಯಲ್ (ಗಣಿತದ ಘಾತ) ಎನ್ನುವ ಎರಡು ಸೂತ್ರದ ಪ್ರಕಾರ ನಿರ್ಧರಿಸಲು ಸಾಧ್ಯ. ಇದರಿಂದ ಲೆಕ್ಕಾಚಾರದಲ್ಲಿ ಲೋಪವಾಗುವ ಸಾಧ್ಯತೆ ಕಡಿಮೆ ಎಂದು ಸಂಶೋಧಕರು ಹೇಳಿದ್ದಾರೆ.
ಮಾದರಿ ಸಿದ್ಧಪಡಿಸಿದ ತಂಡದ ಪ್ರಕಾರ, ಲಾಜಿಸ್ಟಿಕ್ ಸೂತ್ರದಂತೆ ಮುಂದಿನ 30 ದಿನಗಳಲ್ಲಿ ಭಾರತದಲ್ಲಿ 1.5 ಲಕ್ಷ ಕೊರೊನಾ ಸೋಂಕು ಪ್ರಕರಣಗಳು ಕಂಡುಬಂದರೆ, ಎಕ್ಸ್ಪೊನೆನ್ಷಿಯಲ್ ಸೂತ್ರದಲ್ಲಿ ಅದು 5.5 ಲಕ್ಷ ದಾಟಲಿದೆ.
Comments are closed.