ಮನೋರಂಜನೆ

ಲಾಕ್‌ಡೌನ್‌: ಅಲ್ಲು ಅರ್ಜುನ್‌-ರಶ್ಮಿಕಾ ನಟನೆಯ ‘ಪುಷ್ಪ ಚಿತ್ರದಲ್ಲಿ ಭಾರೀ ಬದಲಾವಣೆ!

Pinterest LinkedIn Tumblr


ವಿಶ್ವವ್ಯಾಪಿ ಭೀತಿ ಉಂಟು ಮಾಡಿರುವ ಕೊರೊನಾ ವೈರಸ್‌, ಹೆಜ್ಜೆ ಹೆಜ್ಜೆಗೂ ತನ್ನ ವ್ಯಾಪ್ತಿಯನ್ನು ಹಿರಿದಾಗಿಸುತ್ತಲೇ ಹೋಗುತ್ತಿದೆ. ಭಾರತದಲ್ಲಿ ಕೊರೊನಾದಿಂದಾಗಿ ಲಾಕ್‌ಡೌನ್ ಜಾರಿಯಲ್ಲಿದೆ. ಆದ್ದರಿಂದ ಎಲ್ಲ ರೀತಿಯ ಸಿನಿಮಾ ಕೆಲಸಗಳು ಸ್ಥಗಿತಗೊಂಡಿವೆ. ಅಲ್ಲದೆ, ಚಿತ್ರರಂಗದ ಮೇಲೆ ಕೊರೊನಾ ಎಫೆಕ್ಟ್‌ ಸಣ್ಣದೇನಲ್ಲ. ಇದೀಗ ಅದು ಅಲ್ಲು ಅರ್ಜುನ್-ರಶ್ಮಿಕಾ ಮಂದಣ್ಣ ನಟನೆಯ ‘ಪುಷ್ಪ’ ಸಿನಿಮಾದ ಮೇಲೆ ಬೀರಿದೆ!

ಹೌದು, ‘ಪುಷ್ಪ’ ಚಿತ್ರತಂಡದ ಮೇಲೆ ಕೊರೊನಾ ಹೊಡೆತ ಜೋರಾಗಿಯೇ ಇದೆ. ತಂಡ ಅಂದುಕೊಂಡಿದ್ದ ಯೋಜನೆಗಳೆಲ್ಲ ತಲೆಕೆಳಗಾಗುವಂತೆ ಮಾಡಿದೆ ಕೊರೊನಾ. ಚಿತ್ರದಲ್ಲಿ ಒಂದು ಭರ್ಜರಿ ಫೈಟ್‌ ಸೀನ್‌ ಇತ್ತು. ಅದಕ್ಕಾಗಿ 6 ಕೋಟಿ ರೂ. ಖರ್ಚು ಮಾಡುವುದಕ್ಕೆ ಚಿತ್ರತಂಡ ಯೋಜಿಸಿತ್ತು. ಅಲ್ಲದೆ, ವಿದೇಶದಿಂದ ಸಾಹಸ ನಿರ್ದೇಶಕರನ್ನು ಕರೆಸುವ ಆಲೋಚನೆ ಚಿತ್ರತಂಡಕ್ಕಿತ್ತು. ವಿದೇಶಿ ತಂತ್ರಜ್ಞರು ‘ಪುಷ್ಪ’ ಸಿನಿಮಾಕ್ಕೆ ಕೆಲಸ ಮಾಡಬೇಕಿತ್ತು. ಇದೀಗ ಅದೆಲ್ಲವೂ ಕಟ್ ಆಗಿದೆ. ಇಡೀ ಸಿನಿಮಾ ಮೇಡ್‌ ಇನ್‌ ಇಂಡಿಯಾ ಆಗಲಿದೆ. ಅರ್ಥಾತ್‌, ಭಾರತೀಯ ತಂತ್ರಜ್ಞರಿಂದಲೇ ಮೂಡಿಬರಲಿದೆ.

ಇದರ ಜೊತೆಗೆ ವಿದೇಶದಲ್ಲೇ ಕೆಲವೊಂದು ದೃಶ್ಯಗಳ ಚಿತ್ರೀಕರಣ ಮಾಡುವ ಪ್ಲ್ಯಾನ್‌ ಕೂಡ ಇತ್ತು. ಇದೀಗ ಅದೆಲ್ಲವೂ ಕ್ಯಾನ್ಸಲ್ ಆಗಿದೆ. ತೆಲುಗಿನಲ್ಲಿ ನಿರ್ಮಾಣವಾದ ಬಹುತೇಕ ಬಿಗ್‌ ಬಜೆಟ್‌ ಸಿನಿಮಾಗಳಿಗೆ ಕೆಲಸ ಮಾಡಲು ವಿದೇಶಿ ತಂತ್ರಜ್ಞರನ್ನು ಕರೆಸಲಾಗಿತ್ತು. ಆದರೆ, ಇದೇ ಮೊದಲ ಬಾರಿಗೆ ಬಿಗ್‌ ಬಜೆಟ್‌ ಚಿತ್ರವೊಂದು ಬರೀ ಇಲ್ಲಿಯವರನ್ನೇ ಇಟ್ಟುಕೊಂಡು ಕೆಲಸ ಮಾಡುತ್ತಿದೆ. ಹಾಗಾಗಿ, ‘ಪುಷ್ಪ’ ಪಕ್ಕಾ ಸ್ವದೇಶಿ ಸಿನಿಮಾವಾಗಿರಲಿದೆ.

ಎಲ್ಲ ಅಂದುಕೊಂಡಂತೆ ಆಗಿದ್ದರೆ, ಈಗಾಗಲೇ ಚಿತ್ರದ ಶೂಟಿಂಗ್ ಆರಂಭಗೊಂಡಿರಬೇಕಿತ್ತು. ಆದರೆ, ಕೊರೊನಾದಿಂದಾಗಿ ಚಿತ್ರೀಕರಣ ಮುಂದಕ್ಕೆ ಹೋಗಿದೆ. ಮೈತ್ರಿ ಮೂವೀ ಮೇಕರ್ಸ್‌ ನಿರ್ಮಾಣ ಮಾಡುತ್ತಿರುವ ಈ ಸಿನಿಮಾಗೆ ಸುಕುಮಾರ್ ನಿರ್ದೇಶನ ಮಾಡುತ್ತಿದ್ದಾರೆ. ರಶ್ಮಿಕಾ ಮಂದಣ್ಣ ನಾಯಕಿಯಾಗಿದ್ದು, ದಿಶಾ ಪಟಾಣಿ ಐಟಂ ಸಾಂಗ್‌ವೊಂದಕ್ಕೆ ಹೆಜ್ಜೆ ಹಾಕಲಿದ್ದಾರೆ ಎನ್ನಲಾಗಿದೆ. ಜಗಪತಿ ಬಾಬು ಪ್ರಮುಖ ಪಾತ್ರ ಮಾಡಲಿದ್ದು, ಕನ್ನಡದ ‘ಡಾಲಿ’ ಧನಂಜಯ, ಬಾಲಿವುಡ್‌ನ ಸುನೀಲ್ ಶೆಟ್ಟಿ ಈ ಸಿನಿಮಾದಲ್ಲಿ ನಟಿಸುವ ಸಾಧ್ಯತೆಗಳಿವೆ.

Comments are closed.