ಥಾಯ್​ ಗುಹೆಗೆ ತೆರಳಿದ್ದ ಫುಟ್​ಬಾಲ್​ ಆಟಗಾರರು ಸಿಲುಕಿದ್ದು ಹೇಗೆ?

ಥಾಯ್ಲೆಂಡ್​: ಆಕರ್ಷಕ ಪ್ರವಾಸಿ ತಾಣಗಳಿಗೆ ಹೆಸರುವಾಸಿಯಾಗಿರುವ ಥಾಯ್ಲೆಂಡ್ ಈಗ ಬೇರೊಂದು ಕಾರಣಕ್ಕೆ ವಿಶ್ವದ ಗಮನ ಸೆಳೆಯುತ್ತಿದೆ. ಜೂ. 23 ರಂದು ಥೈಲ್ಯಾಂಡ್ ನ ಪ್ರಖ್ಯಾತ ಥೈಮ್ ಲುವಾಂಗ್ ಗುಹೆಗಳನ್ನು ನೋಡಲು ಕೋಚ್​ ಜೊತೆ ತೆರಳಿದ್ದ 12 ಫುಟ್ಬಾಲ್ ಆಟಗಾರರು ಜಲದಿಗ್ಬಂಧನದಲ್ಲಿ ಸಿಲುಕಿಕೊಂಡಿದ್ದರು. ಮೊದಲಿಗೆ ಅವರು ಜೀವಂತವಾಗಿದ್ದರ ಬಗ್ಗೆ ಎಲ್ಲಿಯೂ ಒಂದೇ ಒಂದು ಸುಳಿವು ಸಿಕ್ಕಿರಲಿಲ್ಲ. ಬಳಿಕ ಹೆಜ್ಜೆ ಗುರುತು, ಸಮೀಪ ಇದ್ದ ಸೈಕಲ್ ಆಧರಿಸಿ ಕೋಚ್ ಸೇರಿದಂತೆ ಅಂಡರ್ 16 ಫುಟ್ಬಾಲ್ ತಂಡದ ಆಟಗಾರರು ಗುಹೆಯಲ್ಲಿ ಸಿಲುಕಿರುವುದನ್ನ ಪತ್ತೆ ಹಚ್ಚಲಾಗಿತ್ತು. ಇದೀಗ, ಮುಳುಗು ತಜ್ಞರು ದುರ್ಗಮ ಗುಹೆಯೊಳಗೆ ನುಗ್ಗಿ ನಾಲ್ವರನ್ನ ಹೊರತಂದಿದ್ದಾರೆ.

ಘಟನೆ ನಡೆದಿದ್ದು ಹೇಗೆ..?: ಹದಿನಾಲ್ಕು ದಿನಗಳ ಹಿಂದೆ ಫುಟ್ಬಾಲ್ ಆಟಗಾರರು ಪಂದ್ಯ ಮುಗಿಸಿ ಕೋಚ್ ಜೊತೆ ಗುಹೆಯೊಳಗೆ ತೆರಳಿದ್ದರು. ಈ ವೇಳೆ ಭಾರೀ ಮಳೆಯಾಗಿದ್ದು ಗುಹೆಯೊಳಗೆ ನೀರು ಸೇರಿದೆ. ಇದರಿಂದ ಮುಖ್ಯದ್ವಾರವೂ ಬಂದ್ ಆಗಿತ್ತು ಎನ್ನುತ್ತಿವೆ ಮೂಲಗಳು. ಕಳೆದ ಎರಡು ವಾರಗಳಿಂದ ಫುಟ್ಬಾಲ್ ಆಟಗಾರರ ಪತ್ತೆಗೆ ಸತತ ಪ್ರಯತ್ನ ನಡೆಸಲಾಗುತ್ತಿತ್ತು. ಬಳಿಕ ಆಟಗಾರರೂ ಗುಹೆಯಲ್ಲಿ ಸಿಕ್ಕಿಬಿದ್ದಿದ್ದಾರೆ, ಇಲ್ಲವಾದಲ್ಲಿ ಸಾವನ್ನಪ್ಪಿದ್ದಾರೆ ಎಂಬ ಸಂಶಯವೂ ಮೂಡಿತ್ತು.

ಫುಟ್ಬಾಲ್ ಆಟಗಾರರ ರಕ್ಷಣೆಗೆ ಸೇನೆ ಸದ್ದಿಲ್ಲದೇ ಕೆಲಸ ಶುರು ಮಾಡಿತ್ತು. ಬಳಿಕ ಗುಹೆಯ ಒಳಗೆ ಆಮ್ಲಜನಕದ ಸಿಲಿಂಡರ್ ಇಡಲಾಗಿತ್ತು. ಹಗ್ಗದ ವ್ಯವಸ್ಥೆ ಮಾಡಿ, ಗುಹೆಯ ಮೇಲ್ಭಾಗದಲ್ಲಿ ಸಣ್ಣ ತೂತು ಮಾಡಲಾಗಿತ್ತು. ಮಕ್ಕಳು ಗುಹೆಯ ಮೇಲ್ಭಾಗ ತಲುಪಿದ್ದರೆ ಜೀವಂತವಾಗಿರುವ ಸಾಧ್ಯತೆ ಹೆಚ್ಚಿದೆ ಎನ್ನಲಾಗಿತ್ತು. ಗುಹೆಯಲ್ಲಿ ಆಟಗಾರರಿರುವ ಮಾಹಿತಿ ಬೆನ್ನಲ್ಲೇ ಸುಮಾರು 200 ಆಕ್ಸಿಜನ್ ಸಿಲಿಂಡರ್ ಇಡಲಾಯಿತು.

ಸುಳಿವು ಸಿಕ್ಕಿದ್ದೆಲ್ಲಿ..?: ಚಿಯಾಂಗ್ ರಾಯ್ ಪ್ರಾಂತ್ಯದ ವೈಲ್ಡ್ ಬೋರ್ಸ್ ಎಂಬ ಸ್ಥಳೀಯ ಕಿರಿಯರ ಫುಟ್ಬಾಲ್ ತಂಡದ 12 ಆಟಗಾರರು ಮತ್ತು ಕೋಚ್ ಜೂನ್ 23ರಿಂದ ನಾಪತ್ತೆಯಾಗಿದ್ದರು. 25 ವರ್ಷದ ಕೋಚ್ ಮತ್ತು 11-16 ವರ್ಷ ವಯಸ್ಸಿನ ಆಟಗಾರರು ಡೋಯ್ ನಾಂಗ್ ನೋನ್ ಪರ್ವತ ಶ್ರೇಣಿಯ ಥಾಮ್ ನುವಾಂಗ್ ನಾಂಗ್ ನೋನ್ ಎಂಬ ಗುಹೆ ವೀಕ್ಷಣೆಗೆ ಹೋಗಿದ್ದವರು ಹೊರಗೆ ಬರಲೇ ಇಲ್ಲ.

ಜೂನ್ 23ರಂದು ಗುಹೆಯ ಎಂಟ್ರೆನ್ಸ್​ನಲ್ಲಿ ಇವರ ಸೈಕಲ್ ಮೊದಲಾದ ಸಾಮಾನುಗಳಿರುವುದು ನೋಡಿದ ಮೇಲೆ ಇವರು ಗುಹೆಯೊಳಗೆ ಸಿಲುಕಿರುವುದು ಗೊತ್ತಾಗಿದೆ. ಬಹಳ ಹಳೆಯ ಹಾಗೂ ಬಹಳ ಸಂಕೀರ್ಣವಾಗಿರುವ ಈ ಗುಹೆಯೊಳಗೆ ಹುಡುಗರ ಕಥೆ ಏನಾಗಿರಬಹುದೆಂದು ಯಾರಿಗೂ ಅಂದಾಜು ಇರಲಿಲ್ಲ.

ಮಳೆಗಾಲವಾದ್ದರಿಂದ ಗುಹೆಯೊಳಗೆ ನೀರಿನ ಪ್ರವಾಹ ಇರುತ್ತದೆ. ಹೀಗಾಗಿ ಇವರು ಸತ್ತಿರಬಹುದೆಂದು ಎಲ್ಲರೂ ಭಾವಿಸಿದ್ದರು. ಆದರೆ, ಜುಲೈ 2ರಂದು ಸ್ಟಾಂಟೋನ್ ಮತ್ತು ವೋಲಂಥೇನ್ ಎಂಬಿಬ್ಬರು ಡೈವರ್​ಗಳ ಕಣ್ಣಿಗೆ ಈ ಫುಟ್ಬಾಲ್ ತಂಡ ಬೀಳುತ್ತದೆ.

ಗುಹೆಯಲ್ಲಿ ಸೂಚನಾ ಫಲಕಗಳನ್ನು ಹಾಕುವ ಸಲುವಾಗಿ ಒಳಗೆ ಹೋಗಿದ್ದ ವೋಲಂಥೇನ್​ಗೆ ಆಕಸ್ಮಿಕವಾಗಿ ಈ 13 ಮಂದಿ ಸಿಕ್ಕಿದ್ದಾರೆ. ಅವರನ್ನು ಮಾತನಾಡಿಸಿ, ಸಮಾಧಾನ ಮಾಡಿ, ರಕ್ಷಣೆಯ ಭರವಸೆ ನೀಡಿ ಅದರ ವಿಡಿಯೋ ರೆಕಾರ್ಡ್ ಮಾಡಿಕೊಂಡು ವೋಲಂಥೇನ್ ಹೊರಗೆ ಬಂದಿದ್ದಾರೆ.

ವೈಲ್ಡ್ ಬೋರ್ಸ್ ತಂಡದ ಸದಸ್ಯರು ಸುರಕ್ಷಿತವಾಗಿರುವ ವಿಚಾರವನ್ನು ವಿಡಿಯೋ ಸಮೇತ ಇವರು ಹೊರಹಾಕಿದ್ದಾರೆ. ಸತ್ತೇ ಹೋದರು ಎಂದು ಭಾವಿಸಿದ್ದವರು ಬದುಕಿದ್ದಾರೆಂಬ ವಿಚಾರ ತಿಳಿದು ಇಡೀ ದೇಶ ಪುಟಿದೆದ್ದು ನಿಂತಿತು. ರಕ್ಷಣಾ ಕಾರ್ಯಕರ್ತನೊಬ್ಬ ಈ 13 ಮಂದಿ ಇರುವ ಸ್ಥಳಕ್ಕೆ ಹೋಗಿ ಬರುತ್ತಾನೆ ಎಂದರೆ, ಆ ಹುಡುಗರೇಕೆ ಹೊರಗೆ ಬರಲು ಸಾಧ್ಯವಿಲ್ಲ? ಎಂಬ ಪ್ರಶ್ನೆ ಮೂಡಿತ್ತು.

ಗುಹೆಯಲ್ಲಿ ಅಂಥದ್ದೇನಿದೆ?: ಚಿಯಾಂಗ್ ಲುವಾಂಗ್ ನಾಂಗ್ ನೋನ್ ಎಂಬ ಗುಹೆ ಥಾಯ್ಲೆಂಡ್​ನ ಅತ್ಯಂತ ಅಪಾಯಕಾರಿ ಮತ್ತು ಸಂಕೀರ್ಣ ಗುಹೆಗಳಲ್ಲೊಂದು. ಮಳೆಗಾಲದಲ್ಲಿ ಇಲ್ಲಿ ಪ್ರವೇಶ ನಿಷಿದ್ಧ. ಹಲವಾರು ಕಿಲೋಮೀಟರ್ ದೂರದವರೆಗೂ ಇರುವ ಗುಹೆಯ ಬಹುಭಾಗದ ದಾರಿ ಬಹಳ ಕಡಿದಾಗಿದೆ.

ಒಬ್ಬನೇ ವ್ಯಕ್ತಿ ನುಸುಳಿಕೊಂಡು ಹೋಗಬಹುದಾದಷ್ಟು ಕಡಿದು ದಾರಿ ಕೆಲವೆಡೆ ಇದೆ. ಮಳೆಗಾಲದಲ್ಲಿ ಗುಹೆಯೊಳಗೆ ನೀರು ನುಗ್ಗಿದರೆ ಅಲ್ಲಲ್ಲಿ ನಡುಗಡ್ಡೆಗಳೇ ನಿರ್ಮಾಣವಾಗಿಬಿಡುತ್ತದೆ. ಈ 13 ಜನರು ಇಂಥ ಪುಟ್ಟ ನಡುಗಡ್ಡೆಯಲ್ಲಿ ಸಿಲುಕಿಕೊಂಡುಬಿಟ್ಟಿದ್ದಾರೆ. ಬಹಳ ಉದ್ದದ ಮತ್ತು ಕಡಿದಾದ ಗುಹೆಯಾದ್ದರಿಂದ ಒಳಗೆ ಬೆಳಕಿರುವುದಿಲ್ಲ. ಕತ್ತಲಲ್ಲೇ ತಡಕಾಡಿಕೊಂಡು ಇರಬೇಕಾಗುತ್ತದೆ.

ರಕ್ಷಣೆ ಕಷ್ಟ ಹೇಗೆ?: ಹೊರಗಿನಿಂದ ರಕ್ಷಣಾ ಕಾರ್ಯಕರ್ತರೊಬ್ಬರು ಇವರಿದ್ದ ಸ್ಥಳಕ್ಕೆ ಹೋಗಿ ವಾಪಸ್ ಬರುತ್ತಾರೆಂದರೆ, ಇವರಿಗೇಕೆ ಹೊರಬರಲು ಸಾಧ್ಯವಿಲ್ಲ ಎಂಬ ಪ್ರಶ್ನೆ ಸಹಜವೇ. ಇಲ್ಲಿ ಸಮಸ್ಯೆ ಇರುವುದು ಈ ಫುಟ್ಬಾಲ್ ತಂಡದ ಬಹುತೇಕ ಸದಸ್ಯರಿಗೆ ಈಜು ಬರುವುದಿಲ್ಲ. ಗುಹೆ ಬಹಳ ಕಡಿದಾಗಿರುವುದರಿಂದ ಒಬ್ಬೊಬ್ಬರನ್ನು ಜೊತೆಗೆ ಕರೆದುಕೊಂಡು ನೀರಿನೊಳಗೆ ಡೈವ್ ಮಾಡಿಕೊಂಡು ಹೊರಗೆ ಬರುವುದು ತೀರಾ ಅಪಾಯದ ಕೆಲಸ. ಹೀಗಾಗಿ, ಇಂಥ ಸಾಹಸಕ್ಕೆ ಕೈಹಾಕದಿರಲು ನಿರ್ಧರಿಸಲಾಗಿದೆ. ಆದರೂ ಹಲವು ಮಾರ್ಗೋಪಾಯಗಳನ್ನು ಹುಡುಕುವುದು ಮುಂದುವರಿದಿದೆ.

ಅಪಾಯಗಳಿವೆ: ರಕ್ಷಣಾ ಕಾರ್ಯಾಚರಣೆಯಲ್ಲಿದ್ದ ನೇವಿ ಸೀಲ್​ನ ಒಬ್ಬ ಡೈವರ್ ಆಕ್ಸಿಜನ್ ಕೊರತೆಯಿಂದ ಸಾವನ್ನಪ್ಪಿದ್ದಾರೆ. ಇದು ಗುಹೆಯೊಳಗಿರುವ ಅಪಾಯದ ಪರಿಸ್ಥಿತಿಗೆ ಕನ್ನಡಿ ಹಿಡಿದಿದೆ. ಆ 13 ಜನರೂ ಆಮ್ಲಜನಕದ ಕೊರತೆಯಿಂದಲೇ ಅಸುನೀಗುವ ಅಪಾಯವಿತ್ತು. ರಕ್ಷಣಾ ಕಾರ್ಯಕರ್ತರ ಸಂಖ್ಯೆ ಹೆಚ್ಚಳವಾಗಿ ಗುಹೆಯಲ್ಲಿರುವ ಆಮ್ಲಜನಕ ಇನ್ನೂ ಕಡಿಮೆಯಾಗಿಬಿಡುವ ಸಾಧ್ಯತೆ ಇದ್ದುದರಿಂದ ಎಚ್ಚರಿಕೆ ವಹಿಸಲಾಗಿತ್ತು. ಮಳೆಗಾಲವಾಗಿದ್ದರಿಂದ ರಕ್ಷಣಾ ಕಾರ್ಯಾಚರಣೆಗೆ ತೊಡಕಾಗಿದೆ.

ರಕ್ಷಣೆಯಲ್ಲೂ ಅವಾಂತರ: ಗುಹೆಯಲ್ಲಿ ಸಿಲುಕಿದವರನ್ನು ರಕ್ಷಿಸಲು ತಂಡೋಪತಂಡವಾಗಿ ಜನರು ತೆರಳುತ್ತಿದ್ದು, ಅತಿಯಾದ ಉತ್ಸಾಹ ತೋರುತ್ತಿದ್ಧಾರೆ. ಪರಿಣಿತರ ಜೊತೆ ರಕ್ಷಣಾ ಕಾರ್ಯದ ಅರಿವೇ ಇಲ್ಲದ ಉತ್ಸಾಹಿಗಳೂ ಕೈಜೋಡಿಸಿದ್ದಾರೆ. ಉದಾಹರಣೆಗೆ, ತಜ್ಞರ ಒಂದು ತಂಡವು ಗುಹೆಯೊಳಗಿನಿಂದ ನೀರನ್ನು ಹೊರಹಾಕುತ್ತಿದ್ದರೆ, ಮತ್ತೊಂದು ಕಡೆ ಅನನುಭವಿ ಉತ್ಸಾಹಿಗಳು ನೀರನ್ನು ಮತ್ತೆ ಗುಹೆಯೊಳಗೆ ಕಳುಹಿಸುತ್ತಿದ್ದಾರೆ. ಇವರಿಗೆ ತಾವೇನು ಮಾಡುತ್ತಿದ್ದೇವೆಂಬ ಅರಿವೇ ಇಲ್ಲ. ಕೆಲಸ ಕೆಡಲು ಇದೂ ಕಾರಣವಾಗಿದೆ.

ರಕ್ಷಣಾ ಕಾರ್ಯಾಚರಣೆ ಹೇಗೆ?: ಗುಹೆಯೊಳಗೆ ಇರುವ ನೀರನ್ನು ಹೊರತೆಗೆಯುವ ಕೆಲಸವಾಗುತ್ತಿದೆ. ಒಂದು ಮಟ್ಟದವರೆಗೂ ನೀರನ್ನು ಹೊರಬಸಿದರೆ, ಹುಡುಗರು ನಡೆದುಕೊಂಡು ಹೊರಗೆ ಬರಲು ಅವಕಾಶವಾಗುತ್ತದೆ. ಆದರೆ, ಮಳೆ ಬಂದರೆ ಆ ಸಾಧ್ಯತೆಯೂ ನಶಿಸುತ್ತದೆ. ಇನ್ನು, ತಿಂಗಳುಗಳಿಗಾಗುವಷ್ಟು ಆಹಾರವನ್ನು ಗುಹೆಯೊಳಗೆ ಸರಬರಾಜು ಮಾಡಲಾಗಿದೆ.

ಡೈವಿಂಗ್ ಪರಿಣಿತ ವೈದ್ಯರನ್ನು ಕಳುಹಿಸಿ 13 ಮಂದಿಗೆ ಶುಶ್ರೂಷೆ ನೀಡಲಾಗುತ್ತಿದೆ. ಜೊತೆಗೆ, ಗುಹೆಯೊಳಗೆ ಆಮ್ಲಜನಕದ ಬಾಕ್ಸ್​ಗಳನ್ನು ಕಳುಹಿಸುವ ಕೆಲಸವೂ ನಡೆಯುತ್ತಿದೆ. ಆದರೆ, ತೀರಾ ಕಡಿದಾದ ದಾರಿಯಲ್ಲಿ ಒಬ್ಬ ವ್ಯಕ್ತಿಯು ಆಕ್ಸಿಜನ್ ಸಿಲೆಂಡರ್ ಹೊತ್ತೊಯ್ಯುವುದು ಸಾಧ್ಯವೇ ಇಲ್ಲ ಎನ್ನಲಾಗುತ್ತಿದೆ.

ನೀರಿನ ಮಟ್ಟ ಇಳಿಯದೇ ಹೋದಲ್ಲಿ ಹುಡುಗರು ಮಳೆಗಾಲ ಮುಗಿಯುವವರೆಗೂ ಆ ಗುಹೆಯೊಳಗೆ ಇರುವುದು ಅನಿವಾರ್ಯವಾಗಬಹುದು. ಅಷ್ಟರಲ್ಲಿ ಆ ಹುಡುಗರಿಗೆ ಡೈವಿಂಗ್ ಕಲಿಸಿಕೊಡುವ ಯೋಜನೆ ಇದೆ. ಇನ್ನು, ಪ್ರಪಂಚದ ಅತ್ಯಂತ ವೇಗದ ಸಾರಿಗೆ ವ್ಯವಸ್ಥೆಯಾದ ಹೈಪರ್ ಲೂಪ್ ಯೋಜನೆ ರೂವಾರಿಯಾದ ಇಲಾನ್ ಮಸ್ಕ್ ತಂಡದ ಸದಸ್ಯರು ಥಾಯ್ಲೆಂಡ್​ನ ಈ ಅಪಾಯಕಾರಿ ಗುಹೆಗೆ ಆಗಮಿಸಿ ರಕ್ಷಣಾ ಕಾರ್ಯಾಚರಣೆಗೆ ಇಳಿದಿದ್ದಾರೆ ಎನ್ನಲಾಗಿದೆ.

ಆದರೆ ಇಂದು (ಜು.8) ನಡೆದ ನಿರಂತರ ಕಾರ್ಯಾಚರಣೆ ಥಾಯ್‌ಲ್ಯಾಂಡ್‌ ಗುಹೆಯಲ್ಲಿ ಸಿಲುಕಿದ್ದ ಆರು ಬಾಲಕರನ್ನು ರಕ್ಷಿಸಲಾಗಿದೆ. ಬಿಡುವಿಲ್ಲದೇ ರಕ್ಷಣೆಗಾಗಿ ಕೆಲಸ ಮಾಡಿರುವ ಡೈವರ್​ಗಳು ದಣಿದಿರುವ ಕಾರಣ ರಕ್ಷಣಾ ಕಾರ್ಯಾಚರಣೆಯನ್ನು ನಾಳೆಗೆ ಮುಂದೂಡಿದ್ದಾರೆ.