ಪಿಲಿಭಿತ್: ಬಡ ರೈತ ಭೋಲೆರಾಮ್ನ ಕುಟುಂಬದ ಸದಸ್ಯರು ಎಂದಿನಂತೆ ಮೊನ್ನೆ ರಾತ್ರಿಯೂ ಪರಸ್ಪರ ಗುಡ್ನೈಟ್ ಹೇಳಿ ಮಲಗಿ ಸವಿನಿದ್ರೆಗೆ ಜಾರಿದ್ದರು. ಆದರೆ, ಎಲ್ಲರೂ ಗಾಢ ನಿದ್ರೆಯಲ್ಲಿರುವಾಗ ಮಧ್ಯರಾತ್ರಿ 1 ಗಂಟೆ ವೇಳೆಗೆ ಮನೆಯ ಅಟ್ಟದ ಮೇಲಿನಿಂದ ಇದ್ದಕ್ಕಿದ್ದಂತೆ ದೈತ್ಯ ಹುಲಿಯೊಂದರ ಗರ್ಜನೆ ಕೇಳಿಸಿ ಬೆಚ್ಚಿಬಿದ್ದರು.
ಆಗಿದ್ದಿಷ್ಟು: ಪಿಲಿಭಿತ್ ಹುಲಿಧಾಮದ ಸಮೀಪವಿರುವ ವಿಧಿಪುರದ ಭೋಲೆರಾಮ್ನ ಮನೆಯ ಬಾಗಿಲು ಸದಾ ತೆರೆದಿರುತ್ತಿತ್ತು. ರಾತ್ರಿ ನಿದ್ರಿಸುವಾಗಲೂ ಬಾಗಿಲು ತೆರೆದೇ ಇಡುವುದು ಸಾಮಾನ್ಯವಾಗಿತ್ತು. ಆದರೆ ಈ ಅಭ್ಯಾಸವೇ ಅವರ ಪಾಲಿಗೆ ದುಬಾರಿಯಾಯಿತು.
ಅಲ್ಲೇ 3 ಕಿ.ಮೀ ದೂರದಲ್ಲಿರುವ ಪಿಲಿಭಿತ್ ವನ್ಯಧಾಮದಿಂದ ತಪ್ಪಿಸಿಕೊಂಡು ಬಂದ ಹೆಣ್ಣು ಹುಲಿಯೊಂದು ಪಕ್ಕದ ಊರುಗಳಲ್ಲೆಲ್ಲ ಸುತ್ತಾಡಿ ರಾತ್ರಿ ವೇಳೆ ಭೋಲೆರಾಮ್ನ ಮನೆಯೊಳಗೆ ನುಗ್ಗಿತ್ತು.
ಹುಲಿಯ ಗರ್ಜನೆ ಕೇಳಿಸಿದ ತಕ್ಷಣ ಬೆಚ್ಚಿ ಬಿದ್ದು ಎದ್ದ ಮನೆಯವರು ಹೊರಗೆ ಓಡಿಬಂದು ನೆರೆಹೊರೆಯವರನ್ನು ಎಚ್ಚರಿಸಿದರು. ನಂತರ ಅವರೆಲ್ಲ ಸೇರಿ ಪೊಲೀಸ್ ಅಧಿಕಾರಿಗಳು ಮತ್ತು ಅರಣ್ಯಾಧಿಕಾರಿಗಳಿಗೆ ವಿಷಯ ತಿಳಿಸಿದರು.
ವಿಧಿಪುರ್ಗೆ ಸಮೀಪದ ಪಂಡರಿ ಮತ್ತು ಬಕೈನಿಯಾ ಗ್ರಾಮಸ್ಥರು ಸುಮಾರು 3 ವರ್ಷದ ಹೆಣ್ಣು ಹುಲಿಯೊಂದು ಗ್ರಾಮದಲ್ಲಿ ಓಡಾಡುತ್ತಿದೆ ಎಂದು ಅರಣ್ಯಾಧಿಕಾರಿಗಳಿಗೆ ಮಾಹಿತಿ ನೀಡಿದ್ದರು. ಅರಣ್ಯ ಇಲಾಖೆ ಎರಡು ಸಾಕಾನೆಗಳ ನೆರವಿನೊಂದಿಗೆ ಹುಲಿಯನ್ನು ಹಿಡಿಯಲು ಕಾರ್ಯಾಚರಣೆ ಆರಂಭಿಸಿತು. ಆದರೆ ತಪ್ಪಿಸಿಕೊಂಡು ಕಣ್ಮರೆಯಾಗಿತ್ತು. ಅದೇ ಹುಲಿ ಭಾನುವಾರ ಮಧ್ಯರಾತ್ರಿ ವೇಳೆಗೆ ಭೋಲೆರಾಮ್ನ ಮನೆಯೊಳಕ್ಕೆ ನುಗ್ಗಿದೆ’ ಎಂದು ಬರೇಲಿ ವೃತ್ತದ ಅರಣ್ಯ ಸಂರಕ್ಷಣಾಧಿಕಾರಿ ವಿ.ಕೆ ಸಿಂಗ್ ತಿಳಿಸಿದರು.
ಅನಂತರ ಅರಣ್ಯ ಇಲಾಖೆ ಸಿಬ್ಬಂದಿಗಳು ಗದ್ದಲವೆಬ್ಬಿಸಿ ಹುಲಿಯನ್ನು ಅಟ್ಟದಿಂದ ಕೆಳಗಿಳಿದು ಬರುವಂತೆ ಮಾಡಿದರು. ಹೊರಹೋಗುವ ದಾರಿಗಳನ್ನು ಮುಚ್ಚಿ ಹುಲಿಯನ್ನು ಬಲೆಯೊಳಗೆ ಕೆಡಹುವಲ್ಲಿ ಯಶಸ್ವಿಯಾದರು ಎಂದು ವಿ.ಕೆ ಸಿಂಗ್ ವಿವರಿಸಿದರು.
Comments are closed.