ಬಾಲಕನಿಗೆ ಲೈಂಗಿಕ ಕಿರುಕುಳ-ಕ್ರಿಕೆಟ್‌ ಕೋಚ್‌ ಬಂಧನ

ಬೆಂಗಳೂರು: 13 ವರ್ಷದ ಬಾಲಕನಿಗೆ ಲೈಂಗಿಕ ಕಿರುಕುಳ ನೀಡಿದ ಆರೋಪದ ಮೇಲೆ 40 ವರ್ಷದ ಕ್ರಿಕೆಟ್‌ ಕೋಚ್‌ನನ್ನು ಯಲಹಂಕ ಠಾಣೆ ಪೊಲೀಸರು ಬಂಧಿಸಿದ್ದಾರೆ.

ಕ್ರಿಕೆಟ್‌ ಹೇಳಿಕೊಡುವ ನೆಪದಲ್ಲಿ ಬಾಲಕನ ಜತೆ ಅತಿಯಾದ ಸಲುಗೆ ಬೆಳೆಸಿಕೊಂಡಿದ್ದ ಕೋಚ್‌ ಶನಿವಾರ ಸಂಜೆ ಬಾಲಕನನ್ನು ನಿರ್ಜನ ಪ್ರದೇಶಕ್ಕೆ ಕರೆದುಕೊಂಡು ಹೋಗಿ ಪುಸಲಾಯಿಸಿ ಲೈಂಗಿಕ ದೌರ್ಜನ್ಯ ಎಸಗಿದ್ದು, ದೂರು ದಾಖಲಾದ ಅರ್ಧ ಗಂಟೆಯಲ್ಲಿ ಆರೋಪಿಯನ್ನು ಬಂಧಿಸುವಲ್ಲಿ ಯಲಹಂಕ ಠಾಣೆ ಪೊಲೀಸರು ಯಶಸ್ವಿ ಆಗಿದ್ದಾರೆ.

ಮೂಲತಃ ಕೊಡಗಿನ ನಾಸಿರ್‌ (40) ಬಂಧಿತ ಕ್ರಿಕೆಟ್‌ ಕೋಚ್‌. ವೀಕೆಂಡ್‌ನಲ್ಲಿ ಕ್ರಿಕೆಟ್‌ ಕಲಿಯಲು ಬರುತ್ತಿದ್ದ ಬಾಲಕನನ್ನೇ ತನ್ನ ಕಾಮತೃಷೆಗೆ ಬಳಸಿಕೊಳ್ಳಲು ಯತ್ನಿಸಿದ್ದ. ಈತನ ಜತೆ ಸೆಣಸಾಡಿ ಬಿಡಿಸಿಕೊಂಡು ಮನೆಗೆ ತೆರಳಿದ್ದ ಬಾಲಕ ಪೋಷಕರಿಗೆ ವಿಷಯ ತಿಳಿಸಿದ್ದ. ಪೋಷಕರು ಕೊಟ್ಟ ದೂರಿನ ಮೇಲೆ ಆರೋಪಿಯನ್ನು ಬಂಧಿಸಿದ ಪೊಲೀಸರು, ವೈದ್ಯ ಪರೀಕ್ಷೆಗೆ ಒಳಪಡಿಸಿದ ನಂತರ ಪೋಕ್ಸೋ ಕಾಯ್ದೆ ಅಡಿಯಲ್ಲಿ ಆತನನ್ನು ಬಂಧಿಸಿ ಜೈಲಿಗೆ ಕಳುಹಿಸಿದ್ದಾರೆ.

ಜಾಲಹಳ್ಳಿಯ ಮೈದಾನವೊಂದರಲ್ಲಿ ನಾಸಿರ್‌ ಕಳೆದ 8 ವರ್ಷಗಳಿಂದ ಮಕ್ಕಳಿಗೆ ಕ್ರಿಕೆಟ್‌ ತರಬೇತಿ ನೀಡುತ್ತಿದ್ದ. ಈಗ್ಗೆ ಕೆಲ ತಿಂಗಳುಗಳಿಂದ ಕ್ರಿಕೆಟ್‌ ತರಬೇತಿಗೆಂದು ಸ್ಥಳೀಯ ಬಾಲಕ ಸೇರಿಕೊಂಡಿದ್ದ. ಕ್ರಿಕೆಟ್‌ ಕಲಿಸುವ ನೆಪದಲ್ಲಿ ಆರೋಪಿ ಬಾಲಕನ ಜತೆ ಅತಿಯಾದ ಸಲುಗೆ ಬೆಳೆಸಿಕೊಂಡಿದ್ದ. ಇದರ ಹಿಂದಿನ ಉದ್ದೇಶ ಬಾಲಕನಿಗೆ ಅರ್ಥ ಆಗಿರಲಿಲ್ಲ. ಆದರೆ ಶನಿವಾರ ತರಬೇತಿ ಮುಗಿಸಿಕೊಂಡು ಮನೆಗೆ ತೆರಳುವ ವೇಳೆಯಲ್ಲಿ ಉಳಿದ ಮಕ್ಕಳೆಲ್ಲರೂ ವಾಪಸ್ಸಾದರೂ ನಾಸಿರ್‌ ಈ ಬಾಲಕನನ್ನು ಮಾತ್ರ ತನ್ನ ಜತೆಗೇ ಉಳಿಸಿಕೊಂಡಿದ್ದ. ಸಂಜೆ 7 ಗಂಟೆ ಸುಮಾರಿಗೆ ಕತ್ತಲಾಗುತ್ತಿದ್ದಂತೆ ಜಿಕೆವಿಕೆ ಆವರಣದೊಳಗಿನ ಮಣ್ಣಿನ ರಸ್ತೆಯ ನಿರ್ಜನ ಪ್ರದೇಶಕ್ಕೆ ಬಾಲಕನನ್ನು ಕರೆದುಕೊಂಡು ಹೋಗಿದ್ದ. ನಿರ್ಜನ ಪ್ರದೇಶವಾದ್ದರಿಂದ ಬಾಲಕ ಮೊದಲಿಗೆ ಹೆದರಿದ್ದ. ಆದರೂ ಕೋಚ್‌ ಎನ್ನುವ ಕಾರಣದಿಂದ ಜತೆಯಲ್ಲೇ ಹೋಗಿದ್ದ. ಪೊದೆಯೊಂದರ ಬಳಿ ಬಾಲಕನನ್ನು ಎದುರು ನಿಲ್ಲಿಸಿಕೊಂಡ ಆರೋಪಿ ಅನುಚಿತವಾಗಿ ವರ್ತಿಸಲು ಆರಂಭಿಸಿದ್ದ. ತಬ್ಬಿಕೊಳ್ಳಲು ಮುಂದಾಗಿದ್ದ. ಆದರೆ ಬಟ್ಟೆ ಬಿಚ್ಚಲು ಹೇಳಿದಾಗ ಬಾಲಕ ಪ್ರತಿರೋಧ ವ್ಯಕ್ತಪಡಿಸಿದ್ದ. ಆದರೂ ನಾಸಿರ್‌ ತನ್ನ ಕೃತ್ಯ ಮುಂದುವರಿಸಲು ಯತ್ನಿಸಿದಾಗ ಆತನಿಂದ ಬಿಡಿಸಿಕೊಂಡ ಬಾಲಕ ಅಲ್ಲಿಂದ ಓಡಿ ಹೋಗಿದ್ದ ಎಂದು ಪೊಲೀಸರು ಮಾಹಿತಿ ನೀಡಿದರು.

ಪೋಷಕರಿಗೆ ದೂರು: ಮನೆಗೆ ತೆರಳಿದ ಬಾಲಕ ಭಯಗೊಂಡಿದ್ದು ಊಟಕ್ಕೂ ಬಾರದಿದ್ದಾಗ ಪೋಷಕರು ಮಗನನ್ನು ಕರೆದು ವಿಚಾರಿಸಿದ್ದರು. ನಂತರ ಮಗ ನಡೆದ ವಿಷಯವನ್ನು ಪೋಷಕರಿಗೆ ವಿವರವಾಗಿ ತಿಳಿಸಿದ್ದ. ಭಾನುವಾರ ಬೆಳಗ್ಗೆ ಯಲಹಂಕ ಠಾಣೆಗೆ ಧಾವಿಸಿದ ಪೋಷಕರು ದೂರು ದಾಖಲಿಸಿದ್ದರು. ಬಾಲಕನ ಹೇಳಿಕೆ ಪಡೆದು ವಿಷಯ ತಿಳಿದ ಠಾಣಾಧಿಕಾರಿ ದೂರು ದಾಖಲಾದ ಅರ್ಧ ಗಂಟೆಯಲ್ಲಿ ಕೋಚ್‌ ನಾಸಿರ್‌ನನ್ನು ಬಂಧಿಸಿದ್ದಾರೆ.

ಬಂಧಿಸಲು ಪೊಲೀಸರು ತೆರಳಿದ ವೇಳೆಯಲ್ಲಿ ಆರೋಪಿ ಏನೂ ನಡೆದೇ ಇಲ್ಲ ಎನ್ನುವಂತೆ ಕೋಚಿಂಗ್‌ನಲ್ಲಿ ಮುಳುಗಿದ್ದ. ಠಾಣೆಗೆ ಕರೆತಂದ ಪೊಲೀಸರು ವಿಚಾರಣೆ ಆರಂಭಿಸುತ್ತಿದ್ದಂತೆ ತನ್ನ ತಪ್ಪನ್ನು ಒಪ್ಪಿಕೊಂಡಿದ್ದಾನೆ. ನಂತರ ವೈದ್ಯ ಪರೀಕ್ಷೆಗೆ ಆರೋಪಿಯನ್ನು ಒಳಪಡಿಸಿ ಪೋಕ್ಸೋ ಕಾಯ್ದೆ ಅಡಿಯಲ್ಲಿ ಪ್ರಕರಣ ದಾಖಲಿಸಿ ಪರಪ್ಪನ ಅಗ್ರಹಾರ ಕೇಂದ್ರ ಕಾರಾಗೃಹಕ್ಕೆ ಕಳುಹಿಸಿದ್ದಾರೆ.