ಟ್ರಂಪ್‌ ಎಫೆಕ್ಟ್‌: ಪಾಕಿಸ್ತಾನಕ್ಕೆ ಅಮೆರಿಕದ 255 ಮಿಲಿಯನ್‌ ಡಾಲರ್‌ ಆರ್ಥಿಕ ನೆರವು ಕಟ್

ವಾಷಿಂಗ್ಟನ್‌: ಅಮೆರಿಕ ಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್‌ ಪಾಕಿಸ್ತಾನಕ್ಕೆ ಹೊಸ ವರ್ಷದ ದಿನದಂದೇ ಶಾಕ್‌ ನೀಡಿದ ಬೆನ್ನಲ್ಲೇ ಮತ್ತೊಂದು ಆಘಾತ ನೀಡಿದ್ದಾರೆ.

ಇದುವರೆಗೆ ಪಾಕಿಸ್ತಾನದ ಸೇನಾ ಪೋಷಣೆಗಾಗಿ ಅಮೆರಿಕ ಕೋಟ್ಯಂತರ ಅಮೆರಿಕನ್‌ ಡಾಲರ್‌ ನೆರವು ನೀಡುತ್ತಿತ್ತು. ಈಗ ಅದಕ್ಕೆ ಕಡಿವಾಣ ಹಾಕಲಾಗಿದೆ.

ಪಾಕಿಸ್ತಾನಕ್ಕೆ ನೀಡಬೇಕಾಗಿದ್ದ 255 ಮಿಲಿಯನ್‌ ಡಾಲರ್‌ ನೆರವನ್ನು ಅಮೆರಿಕ ರದ್ದು ಮಾಡಿದೆ.

ಪಾಕಿಸ್ತಾನ ಕೇವಲ ಸುಳ್ಳುಗಾರ ಹಾಗೂ ಮೋಸ ಮಾಡಿದ ದೇಶ ಎಂದು ಟ್ರಂಪ್‌ ಟ್ವೀಟ್‌ ಮಾಡಿದ ಬೆನ್ನಲ್ಲೇ ಈ ಮಹತ್ವದ ನಿರ್ಧಾರ ಕೈಗೊಳ್ಳಲಾಗಿದೆ.

2017-18 ನೇ ಸಾಲಿನಲ್ಲಿ ಪಾಕಿಸ್ತಾನದ ಮಿಲಿಟರಿಗೆ ನೀಡಬೇಕಾಗಿದ್ದ ಆರ್ಥಿಕ ನೆರವನ್ನು ಸ್ಥಗಿತಗೊಳಿಸಲಾಗಿದೆ ಎಂದು ಹಿರಿಯ ಅಧಿಕಾರಿಯೊಬ್ಬರು ಸುದ್ದಿಸಂಸ್ಥೆಗೆ ಮಾಹಿತಿ ನೀಡಿದ್ದಾರೆ.

ಭಯೋತ್ಪಾದನೆ ವಿರುದ್ಧ ಪಾಕಿಸ್ತಾನ ಹೋರಾಟ ನಡೆಸುವವರೆಗೂ ಯಾವುದೇ ರೀತಿಯ ನೆರವು ನೀಡಬಾರದು ಎಂದು ಟ್ರಂಪ್‌ ಸ್ಪಷ್ಟ ಆದೇಶ ನೀಡಿದ್ದಾರೆ ಎನ್ನಲಾಗಿದೆ.

ಪಾಕಿಸ್ತಾನಕ್ಕೆ ಈಗಾಗಲೇ ನೀಡುತ್ತಿದ್ದ ಎಲ್ಲ ರೀತಿಯ ನೆರವುಗಳ ಬಗ್ಗೆಯೂ ಪರಿಶೀಲನೆ ನಡೆಸುವಂತೆ ಉನ್ನತ ಮಟ್ಟದ ಸಮಿತಿ ಸೂಚನೆ ನೀಡಿದೆ.

ಉಗ್ರ ಸಂಘಟನೆಗಳಿಗೆ ಪಾಕಿಸ್ತಾನ ನೀಡುತ್ತಿರುವ ಕುಮ್ಮಕ್ಕಿನಿಂದ ಭಾರಿ ಪರಿಣಾಮ ಬೀರುತ್ತಿರುವುದು ಅಮೆರಿಕಕ್ಕೆ ನುಂಗಲಾರದ ವಿಷಯವಾಗಿತ್ತು. ಈ ನಿಟ್ಟಿನಲ್ಲಿ ಕಠಿಣ ಕ್ರಮ ಕೈಗೊಳ್ಳಲು ಅಮೆರಿಕ ನಿರ್ಧರಿಸಿದೆ.