ಕ್ರೇಜಿಸ್ಟಾರ್ ಅಭಿನಯದ ‘ನೀಲಕಂಠ’, ಚಾಲೆಂಜಿಂಗ್ ಸ್ಟಾರ್ ದರ್ಶನ್ ಅಭಿನಯದ ‘ಇಂದ್ರ’ ಸೇರಿದಂತೆ ಒಂದಿಷ್ಟು ಕನ್ನಡ ಚಿತ್ರಗಳಲ್ಲಿ ಅಭಿನಯಿಸಿ ಕನ್ನಡಿಗರ ಮನಗೆದ್ದವರು ನಮಿತಾ. ಕೆಲ ದಿನಗಳ ಹಿಂದಷ್ಟೇ ನಮಿತಾ ತಮ್ಮ ಮದುವೆ ವಿಷಯವನ್ನು ಬಹಿರಂಗಪಡಿಸಿದ್ದರು.
ಇದೇ ನವೆಂಬರ್ 24ರಂದು ಗೆಳೆಯ ವೀರಾಂದ್ರ ಚೌಧರಿ ಜತೆ ತಿರುಪತಿಯಲ್ಲಿ ದಾಂಪತ್ಯ ಜೀವನಕ್ಕೆ ಕಾಲಿಡುತ್ತಿರುವುದಾಗಿ ಹೇಳಿಕೊಂಡಿದ್ದರು ‘ಇಂದ್ರ’ನ ಬೆಡಗಿ. ಇದೀಗ ನಮಿತಾ ಮದುವೆಯ ಲಗ್ನ ಪತ್ರಿಕೆ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿವೆ. ಇತ್ತೀಚೆಗಷ್ಟೇ ದಕ್ಷಿಣ ಭಾರತದ ಖ್ಯಾತ ನಟಿ ಸಮಂತಾ ವಿವಾಹ ಜೀವನಕ್ಕೆ ಕಾಲಿಟ್ಟರು. ಅವರ ಬೆನ್ನಲ್ಲೇ ನಮಿತಾ ಸಹ ಮದುವೆಗೆ ಸಿದ್ಧವಾಗಿರುವುದು ಅಭಿಮಾನಿಗಳಲ್ಲಿ ಕುತೂಹಲ ಮೂಡಿಸಿದೆ.
ಮದುವೆ ಕುರಿತು ‘ವಿಜಯ ಕರ್ನಾಟಕ ವೆಬ್’ನೊಂದಿಗೆ ಮಾತನಾಡಿದ ನಮಿತಾ, ಒಂದಿಷ್ಟು ಇಂಟ್ರೆಸ್ಟಿಂಗ್ ವಿಚಾರಗಳನ್ನು ಬಿಚ್ಚಿಟ್ಟಿದ್ದಾರೆ. ‘ವೀರಾ ನನ್ನ ಬೆಸ್ಟ್ ಫ್ರೆಂಡ್. ಸದ್ಯಕ್ಕೆ ಅವರು ನಿರ್ಮಾಪಕರಾಗಿದ್ದು ಮುಂದಿನ ದಿನಗಳಲ್ಲಿ ನಟನಾಗಿ ಕಾಣಿಸಿಕೊಳ್ಳಲಿದ್ದಾರೆ. ನನ್ನ ಬೆಸ್ಟ್ ಫ್ರೆಂಡ್ ಶಶಿಧರ್ ಅವರು ವೀರಾನನ್ನು ಕಳೆದ ವರ್ಷ ಸೆಪ್ಟೆಂಬರ್ನಲ್ಲಿ ಭೇಟಿ ಮಾಡಿಸಿದ್ದರು. ನಮ್ಮಿಬ್ಬರ ಪರಿಚಯ ಕ್ರಮೇಣ ಒಂದು ಒಳ್ಳೆಯ ಸ್ನೇಹಕ್ಕೆ ತಿರುಗಿತು. ಇದೇ ವರ್ಷ ಸೆಪ್ಟೆಂಬರ್ 6ರಂದು ಬೀಚ್ನಲ್ಲಿ ಕ್ಯಾಂಡಲ್ ಲೈಟ್ ಡಿನ್ನರ್ ಆಯೋಜಿಸುವ ಮೂಲಕ ವೀರಾ ಪ್ರೇಮ ನಿವೇದನೆ ಮಾಡಿದರು. ಅದು ತುಂಬಾ ರೋಮ್ಯಾಂಟಿಕ್ ಆಗಿಯೂ ಇತ್ತು. ನಾನು ಯಾವತ್ತೂ ಅದನ್ನು ನಿರೀಕ್ಷಿಸಿರಲಿಲ್ಲ. ನಮ್ಮದು ಅರೇಂಜಡ್ ಲವ್ ಮ್ಯಾರೇಜ್’ ಎನ್ನುತ್ತಾರೆ ನಮಿತಾ.
ಮಾತು ಮುಂದುವರೆಸುತ್ತ ವೀರಾ ಅವರ ಲವ್ ಪ್ರಪೋಸಲ್ ಒಪ್ಪಿಕೊಳ್ಳಲು ಒಂದಿಷ್ಟು ಕಾರಣಗಳನ್ನು ನೀಡಿದ್ದಾರೆ ‘ನೀಲಕಂಠ’ನ ಚೆಲುವೆ. ‘ನಮ್ಮಿಬ್ಬರ ಅಭಿರುಚಿಗಳು ಒಂದೇ ಆಗಿವೆ. ಇಬ್ಬರಿಗೂ ಟ್ರಾವೆಲ್ ಮಾಡುವುದೆಂದರೆ ಇಷ್ಟ. ಅದರಲ್ಲೂ ಟ್ರೆಕ್ಕಿಂಗ್ ಎಂದರೆ ಪಂಚಪ್ರಾಣ. ಮದುವೆ ಬಗ್ಗೆ ನನಗಿದ್ದ ಮಿಥ್ಯಗಳು ವೀರಾರಿಂದ ದೂರವಾದವು. ಒಂದರ್ಥದಲ್ಲಿ ಅವರನ್ನು ಮದುವೆ ಆಗುತ್ತಿರುವ ನಾನು ತುಂಬಾ ಅದೃಷ್ಟವಂತೆ’ ಎಂದು ಖುಷಿಯಿಂದ ಹೇಳಿಕೊಂಡರು ನಮಿತಾ.
Comments are closed.