ಜಾಲಿ -ಪೋಲಿಯ ಸಂಗಮ: ಜಾಲಿ ಬಾರು ಮತ್ತು ಪೋಲಿ ಹುಡುಗರು ಚಿತ್ರ ವಿಮರ್ಶೆ

ನಮ್ಮ ರೇಟಿಂಗ್ 2 / 5
ಓದುಗರ ರೇಟಿಂಗ್2 / 5
ನಿಮ್ಮ ವಿಮರ್ಶೆ ಬರೆಯಿರಿ
ಕಲಾವಿದರುಕೃಷ್ಣ, ಚಿಕ್ಕಣ್ಣ, ಮಾನಸಿ, ಜಹಾಂಗೀರ್‌, ವೀಣಾ ಸುಂದರ್‌, ಮೈಕೋ ನಾಗರಾಜ್‌
ನಿರ್ದೇಶಕಕಾರಂಜಿ ಶ್ರೀಧರ್‌
ಅವಧಿ2 hrs. 1 Min.

*ಹರೀಶ್‌ ಬಸವರಾಜ್‌

ಜಾಲಿ ಬಾರು ಪೋಲಿ ಹುಡುಗರು ಎಂಬ ಹೆಸರು ಕೇಳಿದ ತಕ್ಷಣ ‘ಜಾಲಿಬಾರಿನಲ್ಲಿ ಪೋಲಿ ಹುಡುಗರು, ಗೋಪಿಯನ್ನು ಪಾಪ ಗೇಲಿ ಮಾಡುತ್ತಿದ್ದರು..’ ಎಂದು ಕವಿ ಬಿ.ಆರ್‌. ಲಕ್ಷ್ಮಣರಾವ್‌ ಬರೆದಿದ್ದ ಭಾವಗೀತೆ ನೆನಪಾಗುತ್ತದೆ. ಆದರೆ ಅದಕ್ಕೂ ಈ ಚಿತ್ರಕ್ಕೂ ಯಾವುದೇ ಸಂಬಂಧವಿಲ್ಲ. ಇದೊಂದು ಪಕ್ಕಾ ಕಮರ್ಷಿಯಲ್‌ ಸಿನಿಮಾ. ಹಾಗೆ ಅನ್ನುವುದಕ್ಕಿಂತ, ಈಗ ಬರುತ್ತಿರುವ ಎಲ್ಲ ಕಮರ್ಷಿಯಲ್‌ ಸಿನಿಮಾಗಳನ್ನು ವ್ಯಂಗ್ಯ ಮಾಡುವಂತಹ ಸಿನಿಮಾ ಎನ್ನಬಹುದು.

ಏಕೆಂದರೆ ಈ ಸಿನಿಮಾದಲ್ಲಿ ಉದ್ದುದ್ದ ಫೈಟ್‌ಗಳಿವೆ. ನಗು ತರದಿರುವ ಕೆಲ ಕಾಮಿಡಿ ಸೀನ್‌ಗಳಿವೆ. ಸುಂದರ ಹುಡುಗಿಯರಿಬ್ಬರು ಅವರ ರೂಪಕ್ಕೆ ಯೋಗ್ಯನಲ್ಲದವನನ್ನು ಪ್ರೀತಿಸುವ ಸೀನ್‌ಗಳಿವೆ. ಹಾಗಾಗಿ ಎಲ್ಲ ಕಮರ್ಷಿಯಲ್‌ ಸಿನಿಮಾಗಳನ್ನು ಜಾಲಿ ಬಾರು ಚಿತ್ರ ವ್ಯಂಗ್ಯ ಮಾಡುವಂತಿದೆ. ಮಂದೂರು ಎಂಬ ಊರಿನಲ್ಲಿ ಜನರಿಗೆಲ್ಲ ಸಾಲವಾಗಿ ಹಣ ಕೊಟ್ಟು, ಅದರ ಬಡ್ಡಿಯಲ್ಲಿ ಜೀವನ ಮಾಡುತ್ತಿರುತ್ತಾರೆ ಸರಳಾದೇವಿ ಎಂಬಾಕೆ. ಈ ಸರಳಮ್ಮನಿಗೆ ಒಬ್ಬ ಮಗ, ಮಗನನ್ನು ಎಂಎಲ್‌ಎ ಮಾಡಬೇಕು ಎಂಬ ಆಸೆ ಇರುತ್ತದೆ. ಮಗ ಎಂಎಲ್‌ಎ ಆಗುತ್ತಾನೋ ಇಲ್ಲವೋ ಎಂಬುದೇ ಸಿನಿಮಾ ಕತೆ. ಈ ಮಧ್ಯೆ ತನ್ನ ತಂಗಿಯ ಲವ್‌, ತನ್ನ ಲವ್‌ ಹಾಗೂ ಎದುರಾಳಿ ಎಂಎಲ್‌ಎ ಜತೆಗಿನ ಹೊಡೆದಾಟ.. ಹೀಗೆ ಸಿನಿಮಾ ದಿಕ್ಕುದೆಸೆಯಿಲ್ಲದೆ ಸಾಗುತ್ತಾ ಕಥೆ ಏನು? ಚಿತ್ರಕಥೆ ಹೇಗೆ ಹೋಗುತ್ತಿದೆ ಎಂಬ ಗೊಂದಲದಲ್ಲಿ ಪ್ರೇಕ್ಷಕ ಥಿಯೇಟರ್‌ನಿಂದ ಹೊರ ಬರುತ್ತಾನೆ.

ಈ ಹಿಂದೆ ಕಾರಂಜಿ, ಲಿಫ್ಟ್‌ಮ್ಯಾನ್‌ನಂಥ ಸೆನ್ಸಿಬಲ್‌ ಸಿನಿಮಾಗಳನ್ನು ಮಾಡಿದ್ದ ಶ್ರೀಧರ್‌ ಯಾಕೆ ಇಂಥ ಸಿನಿಮಾ ಮಾಡಿದರು ಎಂಬ ಪ್ರಶ್ನೆಗೆ ಉತ್ತರ ಸಿಗುವುದಿಲ್ಲ. ಸರಿಯಾದ ಕಥೆ ಇಲ್ಲ, ನಾಯಕ ಎಂಎಲ್‌ಎ ಆಗುವ ಕಥೆ ಇರಬಹುದು ಎಂದುಕೊಂಡರೆ ಮಧ್ಯಂತರದ ನಂತರ ಕಥೆ ಬೇರೆಡೆಗೆ ಹೊರಳುತ್ತದೆ. ಲವ್‌ ಸ್ಟೋರಿ ಇರಬಹುದಾ ಎಂದುಕೊಂಡರೆ ಅಲ್ಲೂ ನಿಮ್ಮ ಊಹೆ ತಪ್ಪಾಗುತ್ತದೆ. ಮಧ್ಯದಲ್ಲಿ ಸುಖಾ ಸುಮ್ಮನೆ ಹಾಡುಗಳು ಬರುತ್ತವೆ. ಒಟ್ಟಿನಲ್ಲಿ ನೀವು ಏನೆಂದುಕೊಂಡು ಸಿನಿಮಾ ನೋಡುತ್ತಿರುತ್ತೀರೋ ಅದಾವುದು ಆಗುವುದಿಲ್ಲ. ಪ್ರತಿ ದೃಶ್ಯದಲ್ಲಿಯೂ ನೋಡುಗರಿಗೆ ನಿರಾಸೆ ಕಟ್ಟಿಟ್ಟ ಬುತ್ತಿ.

ಮದರಂಗಿ ಕೃಷ್ಣ ಫೈಟಿಂಗ್‌ನಲ್ಲಿ ಮತ್ತು ರೊಮ್ಯಾಂಟಿಕ್‌ ಹಾಡಿನಲ್ಲಿ ಮಿಂಚಿದರೆ, ಅಭಿನಯದಲ್ಲಿ ವೀಕ್‌ ಆಗಿದ್ದಾರೆ. ನಾಯಕಿಯಾಗಿ ಮಾನಸಿ ಹಾಡಿನಲ್ಲಷ್ಟೇ ಮಾದಕವಾಗಿ ಕಾಣುತ್ತಾರೆ. ಇನ್ನು ಸರಳಮ್ಮನಾಗಿ ಕಲ್ಯಾಣಿ ಅವರದ್ದು ಉತ್ತಮ ಅಭಿನಯ. ಉಳಿದಂತೆ ಎಲ್ಲ ಕಲಾವಿದರ ಅಭಿನಯ ಓಕೆ. ಇವರೆಲ್ಲರ ನಡುವೆ ಹಾಸ್ಯ ನಟ ಜಹಾಂಗೀರ್‌ ಮತ್ತು ಚಿಕ್ಕಣ್ಣ ಇಬ್ಬರೇ ಪ್ರೇಕ್ಷಕರಿಗೆ ತಮ್ಮ ಕಾಮಿಡಿಯಿಂದ ರಿಲೀಫ್‌ ನೀಡುತ್ತಾರೆ. ವೀರ್‌ಸಮರ್ಥ್‌ ಸಂಗಿತದಲ್ಲಿ ಎರಡು ಹಾಡುಗಳು ಗುನುಗುವಂತಿವೆ. ಜಾಲಿ ಬಾರು ಮತ್ತು ಪೋಲಿ ಗೆಳೆಯರು ಸಿನಿಮಾ ಯಾವ ವರ್ಗದವರಿಗೆ ಮಾಡಲಾಗಿದೆ ಎಂಬ ಪ್ರಶ್ನೆ ಕಟ್ಟ ಕಡೆಯಲ್ಲಿ ನೋಡಿದ ಪ್ರೇಕ್ಷಕರಿಗೆ ಕಾಡುವ ಪ್ರಶ್ನೆ.