ಹೊಸದಿಲ್ಲಿ: ಲೈಂಗಿಕ ಆಧಾರಿತವಾದ ನಡವಳಿಕೆಯ ಸ್ವರೂಪವಿಲ್ಲದಿದ್ದರೆ ಎಲ್ಲ ಆಕಸ್ಮಿಕ ಶಾರೀರಿಕ ಸ್ಪರ್ಶವನ್ನು ಲೈಂಗಿಕ ಕಿರುಕುಳ ಎಂದು ಕರೆಯಲಾಗದು ಎಂದು ದೆಹಲಿ ಹೈಕೋರ್ಟ್ ಮಹತ್ವದ ತೀರ್ಪು ನೀಡಿದೆ.
ನ್ಯಾಯಮೂರ್ತಿ ವಿಭು ಬಕ್ರು, ಈ ಗಮನಾರ್ಹ ವಿಶ್ಲೇಷಣೆಯನ್ನು ಮಾಡಿದ್ದು, ಇಷ್ಟವಿಲ್ಲದಿದ್ದರೂ ಆಕಸ್ಮಿಕ ಭೌತಿಕ ಸಂಪರ್ಕವು ಲೈಂಗಿಕ ಕಿರುಕುಳಕ್ಕೆ ಒಳಪಟ್ಟಿರುವುದಿಲ್ಲ ಎಂದಿದ್ದಾರೆ.
ಲೈಂಗಿಕ ದೌರ್ಜನ್ಯವನ್ನು ಆರೋಪಿಸಿ ಮಾಜಿ ಹಿರಿಯ ಸಹೋದ್ಯೋಗಿ ಮೇಲೆ ಮಾಡಿರುವ ಆರೋಪದಲ್ಲಿ ದೂರುದಾರರ ಸಮಿತಿ ಮತ್ತು ಶಿಸ್ತಿನ ಪ್ರಾಧಿಕಾರ ಕ್ಲೀನ್ಚಿಟ್ ನೀಡಿರುವುದನ್ನು ಪ್ರಶ್ನಿಸಿ ಸಿಆರ್ಆರ್ಐ ವಿಜ್ಞಾನಿಯು ನೀಡಿದ ಮನವಿಯ ವಿಚಾರಣೆಯಲ್ಲಿ ನ್ಯಾಯಪೀಠವು ಈ ಅವಲೋಕನವನ್ನು ಮಾಡಿತ್ತು.
ಇಬ್ಬರೂ ಕೌನ್ಸಿಲ್ ಆಫ್ ಸೈಂಟಿಫಿಕ್ ಮತ್ತು ಇಂಡಸ್ಟ್ರಿಯಲ್ (ಸಿಎಸ್ಐಆರ್) ಭಾಗವಾಗಿರುವ ಸೆಂಟ್ರಲ್ ರೋಡ್ ರಿಸರ್ಚ್ ಇನ್ಸಿಟ್ಯೂಟ್ ಪರ ಕೆಲಸ ಮಾಡುತ್ತಿದ್ದರು.
2005ರ ಎಪ್ರಿಲ್ನಲ್ಲಿ ಸಂಭವಿಸಿದ ಒಂದು ಘಟನೆಗೆ ಸಂಬಂಧಿಸಿದ ಆಪಾದನೆಯಲ್ಲಿ, ಪ್ರಯೋಗಾಲಯಕ್ಕೆ ಪ್ರವೇಶಿಸಿದ ಆತ, ಕೆಲಸದಲ್ಲಿದ್ದ ಆಕೆಯ ಕೈಯಲ್ಲಿದ್ದ ಮಾದರಿಗಳನ್ನು ಕಿತ್ತುಕೊಂಡು ವಸ್ತುಗಳನ್ನು ಎಸೆದರು ಮತ್ತು ಕೊಠಡಿಯಿಂದ ಹೊರ ತಳ್ಳಿದ್ದರು.
ಮಹಿಳೆ ಮೇಲಿನ ದೈಹಿಕ ಸಂಪರ್ಕವು ಲೈಂಗಿಕ ಕಿರುಕುಳಕ್ಕೆ ಕಾರಣವಾಗಿದೆ ಎಂದು ಆಕೆ ವಾದಿಸಿದ್ದರು. ಇದನ್ನು ಪರೀಶೀಲಿಸಿದ ದೂರುದಾರರ ಸಮಿತಿಯು ಇದು ವಾಗ್ವಾದದ ಒಂದು ಸ್ವರೂಪವಾಗಿತ್ತು ಎಂದು ಹೇಳಿತ್ತು.
ವ್ಯಕ್ತಿಯ ನಡವಳಿಕೆಯನ್ನು ಖಂಡಿಸುತ್ತಾ, ಶಾರೀರಿಕ ಸ್ಪರ್ಶ ಮಾಡಿದ ಬಗ್ಗೆ ಸಾಕ್ಷ್ಯಾಧಾರಗಳಿದ್ದರೂ, ಇದು ಲೈಂಗಿಕ ವರ್ತನೆಯಾಗಿರಲಿಲ್ಲ. ಆದರೆ ವಾಗ್ವಾದದ ಸ್ವರೂಪದಲ್ಲಿತ್ತು ಎಂದು ಅವಲೋಕಿಸಿತ್ತು.
ಸಮಿತಿಯ ನಿರ್ಧಾರವನ್ನು ಸಮರ್ಥಿಸಿಕೊಂಡಿದ್ದ ಶಿಸ್ತು ಪ್ರಾಧಿಕಾರ, 2009ನೇ ಇಸವಿಯಲ್ಲಿ ಲೈಂಗಿಕ ಕಿರುಕುಳಕ್ಕೆ ಸಂಬಂಧಿಸಿದಂತೆ ಆತನನ್ನು ದೋಷಮುಕ್ತಿಗೊಳಿಸಿತ್ತು. ಇದೀಗ ಸಮಿತಿ ನಿರ್ಧಾರವನ್ನು ದಿಲ್ಲಿ ಹೈಕೋರ್ಟ್ ಸಹ ಸಮ್ಮತಿಸಿದೆ.
Comments are closed.