ಚಂಡೀಗಢ: ಹರಿಯಾಣ ಖ್ಯಾತ ಗಾಯಕಿ ಹರ್ಷಿತಾ ಕೊಲೆ ಪ್ರಕರಣ ಹೊಸ ತಿರುವು ಪಡೆದಿದೆ. ಹರ್ಷಿತಾ ಅಕ್ಕ ಲತಾ ‘ನನ್ನ ಗಂಡನೇ ತಂಗಿಯನ್ನು ಸಾಯಿಸಿದ್ದಾನೆ. ನನ್ನ ತಾಯಿ ಕೊಲೆ ನೋಡಿದ ಸಾಕ್ಷಿಯಾಗಿದ್ದ ತಂಗಿಯನ್ನೂ ಕೊಂದು ಹಾಕಿದ್ದಾನೆ’ ಎಂದಿದ್ದಾರೆ.
ಆರು ತಿಂಗಳ ಹಿಂದೆ ಹರ್ಷಿತಾ ತಾಯಿ ಕೊಲೆಯಾಗಿದ್ದರು. ಈ ಕೊಲೆಗೆ ಸಹೋದರನೇ ಕಾರಣ ಎಂದು ಹರ್ಷಿತಾ ಆರೋಪಿಸಿದ್ದರು.
ಹರ್ಷಿತಾ ದಹಿಯಾ ಗ್ರಾಮವೊಂದರಲ್ಲಿ ಕಾರ್ಯಕ್ರಮ ಮುಗಿಸಿ ಹಿಂತಿರುಗುವ ವೇಳೆ ದುಷ್ಕರ್ಮಿಗಳು ಗುಂಡಿಟ್ಟು ಹತ್ಯೆ ಮಾಡಿದ್ದಾರೆ.
ಮಂಗಳವಾರ ಸಂಜೆ ಸುಮಾರು 4ರ ವೇಳೆ ದಿಲ್ಲಿಯಲ್ಲಿರುವ ತಮ್ಮ ಮನೆಗೆ ಕಾರಿನಲ್ಲಿ ಹರ್ಷಿತಾ ವಾಪಸ್ ಆಗುತ್ತಿದ್ದರು. ಈ ವೇಳೆ ಮತ್ತೊಂದು ಕಾರಿನಲ್ಲಿ ಬಂದ ದುಷ್ಕರ್ಮಿಗಳು ಹರ್ಷಿತಾ ಮೇಲೆ ಶೂಟ್ ಮಾಡಿದ್ದಾರೆ. ಘಟನೆಯಲ್ಲಿ ಗಾಯಕಿ ಮೃತಪಟ್ಟರೆ ಇವರ ಜತೆ ಕಾರಿನಲ್ಲಿದ್ದ ಡ್ರೈವರ್ ಹಾಗೂ ಮತ್ತೊಬ್ಬ ಗಾಯಕ ಗಾಯಗಳಿಂದ ಪಾರಾಗಿದ್ದಾರೆ ಎಂದು ಪಾಣಿಪತ್ ಡಿಎಸ್ಪಿ ದೇಶ್ ರಾಜ್ ಹೇಳಿದ್ದಾರೆ.
ಕಾರಿನಲ್ಲಿದ್ದ ಹರ್ಷಿತಾರ ಮೇಲೆ ಏಳು ಸುತ್ತು ಗುಂಡು ಹಾರಿಸಲಾಗಿದ್ದು ಆರು ಗುಂಡುಗಳು ಇವರ ಕತ್ತು ಮತ್ತು ಹಣೆಯನ್ನು ಸೀಳಿದೆ. ಪರಿಣಾಮ ಹರ್ಷಿತಾ ಸ್ಥಳದಲ್ಲೇ ಸಾವಿಗೀಡಾಗಿದ್ದಾರೆ. ನಂತರ ಸ್ಥಳದಿಂದ ಹಂತಕರು ಕಾಲ್ಕಿತ್ತಿದ್ದಾರೆ.
ಇತ್ತೀಚೆಗೆ ಹರ್ಷಿತಾಗೆ ಜೀವ ಬೆದರಿಕೆ ಇತ್ತಂತೆ. ಈ ಕುರಿತು ಅವರು ಸೋಶಿಯಲ್ ಮೀಡಿಯಾದಲ್ಲಿ ಹೇಳಿಕೊಂಡಿದ್ದರು. ವಿಡಿಯೋ ಪೋಸ್ಟ್ ಮಾಡಿ, ಇಂತಹ ಬೆದರಿಕೆಗಳಿಗೆ ತಾವು ಬೆದರುವುದಿಲ್ಲ ಎಂದಿದ್ದರು. ಜೀವ ಬೆದರಿಕೆ ವಿಷಯವನ್ನು ಪೊಲೀಸರ ಗಮನಕ್ಕೆ ತಂದಿದ್ದರೋ, ಇಲ್ಲವೋ ಗೊತ್ತಿಲ್ಲ.
ಹರ್ಷಿತಾ ಕೊಲೆ ಬಗ್ಗೆ ಪ್ರಕರಣ ದಾಖಲಿಸಿರುವ ಹರಿಯಾಣ ಪೊಲೀಸರು, ತನಿಖೆ ಕೈಗೊಂಡಿದ್ದಾರೆ.
Comments are closed.