ಉಡುಪಿ: ಉಡುಪಿಯಲ್ಲಿ ಪರ್ಯಾಯ ಬಂತೆಂದರೇ ಎಲ್ಲರಿಗೂ ಹಬ್ಬ. ಪರ್ಯಾಯ ಮೆರವಣಿಗೆ, ದರ್ಬಾರ್ ಕಾರ್ಯಕ್ರಮದಷ್ಟೇ ಮಹತ್ವ ಇಲ್ಲಿ ನಡೆಯುವ ಸಾಂಸ್ಕೃತಿಕ ಕಾರ್ಯಕ್ರಮಗಳಿಗೂ ಇದೆ. ಅಂತೆಯೇ ಪರ್ಯಾಯ ದಿನವಾದ ಸೊಮವಾರ ರಾತ್ರಿ ಉಡುಪಿ ಪಾರ್ಕಿಂಗ್ ಸ್ಥಳ ಸಮೀಪದ ಆನಂದ ತೀರ್ಥ ಮಂಟಪದ ವೇದಿಕೆಯಲ್ಲಿ ನಡೆದ ಜುಗಲ್ ಬಂದಿ ಕಾರ್ಯಕ್ರಮ ನೆರೆದ ಸಹಸ್ರ ಸಹಸ್ರ ಜನರನ್ನು ತನ್ಮಯಗೊಳಿಸಿದೆ.
ಹೌದು. ಸೋಮವಾರ ರಾತ್ರಿ ಈ ವೇದಿಕೆಯಲ್ಲಿ ಇರ್ವರು ಘಟಾನುಘಟಿಗಳೊಡನೆ ಪೈಪೋಟಿ ನಡೆದಿತ್ತು. ಅವರು ಮತ್ತ್ಯಾರು ಅಲ್ಲ. ಖ್ಯಾತ ಡ್ರಂ ವಾದಕ ಶಿವಮಣಿ ಹಾಗೂ ಖ್ಯಾತ್ ಫ್ಲೂಟ್(ಕೊಳಲು) ವಾದಕ ಪ್ರವೀಣ್ ಗೋಡ್ಕಿಂಡಿ ನಡುವೆ ನಾದಗಳ ಜುಗಲ್ಬಂದಿ ಏರ್ಪಟ್ಟಿತ್ತು. ವಾಹ್..! ಶ್ರೋತೃಗಳಿಗೆ ಇದಕ್ಕಿಂತ ರಸದೌತಣ ಬೇರೆ ಬೇಕೆ. ‘ಮಹಾಲೀಲಾ’ ಎನ್ನುವ ಹೆಸರಿನಲ್ಲಿ ಈ ಸೂಪರ್ ಕಾರ್ಯಕ್ರಮ ಆಯೋಜನೆಗೊಂಡಿತ್ತು.
ಮೊದಲು ಪ್ರವೀಣ್ ಗೋಡ್ಕಿಂಡಿ ಅವರು 15 ನಿಮಿಷಗಳ ಕಾಲ ಕೊಳಲು ವಾದನವನ್ನು ತನ್ನ ಹಿಮ್ಮೇಳನದವರ ಸಹಕಾರದಲ್ಲಿ ಹೊರಡಿಸುತ್ತಿದ್ದಂತೆಯೇ ಎದುರಿನಲ್ಲಿ ನೆರೆದ ಜನರ ಚಪ್ಪಾಳೆ ಮುಗಿಲುಮುಟ್ಟಿತ್ತು. ಬಳಿಕ ಜಾಗಟೆ ಬಾರಿಸುತ್ತಾ ತನ್ನದೇ ಲುಕ್ ನೀಡುತ್ತಾ ಸ್ಟೈಲಿಷ್ ಆಗಿ ವೇದಿಕೆಗೆ ಬಂದ ಶಿವಮಣಿ ತನ್ನ ಕೈಗಳಿಗೆ ಕೆಲಸವನ್ನು ನೀಡಿದರು. ‘ಕೃಷ್ಣಾ’ ಎಂದು ಉದ್ಘಾರ ಮಾಡುತ್ತಾ ಶಂಖ ಊದಿ ಜನರನ್ನು ಇನ್ನಷ್ಟು ಕೃಷ್ಣಲೀಲೆಯಲ್ಲಿ ತಲ್ಲೀನರಾಗುವಂತೆ ಮಾಡಿದರು. ಚಂಡೆ, ಡ್ರಮ್ಸ್, ತಮಟೆ, ತಾಳಗಳ ಸರಪಣಿ, ತಬಲಾ, ರಿದಂ ಪ್ಯಾಡ್, ಜಲ್ಲಾರಿಗಳನ್ನು ಬಡಿಯುತ್ತಾ ಜನರ ಎದೆಯೊಳಗೆ ಸ್ವರಲೀಲೆ ಹರಿಸಿದರು. ಇನ್ನು ಶಿವಮಣಿ ಸ್ಟಿಕ್ ತಿರುಗಿಸಿ ತಿರುಗಿಸಿ ವಾದನ ನುಡಿಸುವುದೇ ನೆರೆದ ಜನರಿಗೆ ಮಜಾ ಕೊಟ್ಟಿತ್ತು.
ಬಳಿಕ ನಿರಂತರವಾಗಿ ನಡೆಯಿತು ನೋಡಿ ಇವರಿಬ್ಬರ ಜುಗಲ್ಬಂದಿ. ಒಂದೆಡೆ ಪ್ರವೀಣ್ ಗೋಡ್ಕಿಂಡಿ ಪ್ಲೂಟ್ ವಾದನದಲ್ಲಿ ತನ್ನ ಚಾಕಾಛಕ್ಯತೆ ತೋರಿಸಿದರೇ ಏಕಕಾಲದಲ್ಲಿ ಶಿವಮಣಿ ತನ್ನ ವಿವಿಧ ನಮೂನೆಯ ರಿದಂ ಮೂಲಕ ಅವರಿಗೆ ಸ್ಪರ್ಧೆ ನೀಡಿದ್ರು. ಗಂಟೆಗಳಿಗೂ ಅಧಿಕ ಕಾಲ ನಡೆದ ಈ ಘಟಾನುಘಟಿ ಕಲಾವಿದರ ಜುಗಲ್ಬಂದಿ ನೆರೆದವರನ್ನು ಮಂತ್ರಮುಗ್ಧರನ್ನಾಗಿಸಿತು. ವಯಲಿನ್ ವಾದನದಲ್ಲಿ ಮೈಸೂರು ಮಂಜುನಾಥ್ ಇದ್ದರು. ಒಟ್ಟಿನಲ್ಲಿ ‘ಮಹಾಲೀಲಾ’ ಕಾರ್ಯಕ್ರಮ ಜನರ ಚಪ್ಪಾಳೆ ಗಿಟ್ಟಿಸಿ ಸೂಪರ್ ಎಂದೆನಿಸಿಕೊಳ್ಳುವಲ್ಲಿ ಸಫಲವಾಯಿತು.
ಕಾರ್ಯಕ್ರಮವನ್ನು ಪೇಜಾವರ ಶ್ರೀ ವಿಶ್ವೇಶ್ವರ ತೀರ್ಥ ಶ್ರೀಪಾದರು, ಕಿರಿಯ ಶ್ರೀ ವಿಶ್ವಪ್ರಸನ್ನ ತೀರ್ಥ ಸ್ವಾಮೀಜಿ ಗಂಟೆಗಳ ಕಾಲ ಕುಳಿತು ಆಲಿಸಿದರು. ಉದ್ಯಮಿಗಳಾದ ಹರೀಶ್ ಶೇರಿಗಾರ್, ಡಾ.ಬಿ.ಆರ್ ಶೆಟ್ಟಿ, ಫ್ರಾಂಕ್ ಫೆರ್ನಾಂಡಿಸ್, ಭುವನೇಂದ್ರ ಸುವರ್ಣ ಕಿದಿಯೂರ್ ಮೊದಲಾದವರು ಕಾರ್ಯಕ್ರಮದಲ್ಲಿ ಉಪಸ್ಥಿತರಿದ್ದರು.
ವರದಿ,ಚಿತ್ರ- ಯೋಗೀಶ್ ಕುಂಭಾಸಿ
