ವಾಷಿಂಗ್ ಟನ್: ಮಕ್ಕಳು ಎಷ್ಟೇ ಒಳ್ಳೆಯ ಅಂಕ ಪಡೆದರೂ ಕೆಲವು ಪೋಷಕರಿಗೆ ಸಮಾಧಾನವೇ ಇರುವುದಿಲ್ಲ. ನೂರಕ್ಕೆ ನೂರು ಅಂಕಗಳನ್ನು ಪಡೆಯಬೇಕೆಂಬುದು ಅಂತಹ ಪೋಷಕರ ಮಹತ್ವಾಕಾಂಕ್ಷೆಯಾಗಿರುತ್ತದೆ. ಈ ಮನಸ್ಥಿತಿಯ ಪೋಷಕರಿಗೆ ಎಚ್ಚರಿಕೆ ಗಂಟೆಯಾಗಿ ಹೊಸ ಸಂಶೋಧನೆಯೊಂದು ಹೊರಬಿದ್ದಿದೆ.
ಶೈಕ್ಷಣಿಕ ವಿಷಯದಲ್ಲಿ ಮಕ್ಕಳ ಮೇಲೆ ಹೆಚ್ಚು ಒತ್ತಡ ಹೇರಿದಷ್ಟೂ ಮಕ್ಕಳ ಶೈಕ್ಷಣಿಕ ಸಾಧನೆ ಕುಗ್ಗುತ್ತದೆ ಎಂದು ದಿ ಯುನಿವರ್ಸಿಟಿ ಆಫ್ ರೀಡಿಂಗ್ ನಡೆಸಿರುವ ಸಂಶೋಧನೆ ಎಚ್ಚರಿಸಿದೆ. ಪೋಷಕರ ನಿರೀಕ್ಷೆ ವಾಸ್ತವಕ್ಕೆ ಹತ್ತಿರವಿದ್ದರೆ ಮಕ್ಕಳ ಶೈಕ್ಷಣಿಕ ಸಾಧನೆಯೂ ಉತ್ತಮವಾಗಿರುತ್ತದೆ. ಆದರೆ ಪೋಷಕರ ಒತ್ತಡ ಹೆಚ್ಚಾದಷ್ಟೂ ವಿದ್ಯಾರ್ಥಿಗಳ ಗುಣಮಟ್ಟ ಕುಗ್ಗುತ್ತದೆ ಎಂದು ಸಂಶೋಧನೆ ಎಚ್ಚರಿಸಿದೆ.
ಒಂದು ಹಂತದ ವರೆಗೆ ಪೋಷಕರ ಒತ್ತಡ ವಿದ್ಯಾರ್ಥಿಗಳ ಗುಣಮಟ್ಟ ಹೆಚ್ಚುವುದಕ್ಕೆ ಕಾರಣವಾಗುತ್ತದೆ ಆದರೆ ಒತ್ತಡ ಅತಿಯಾದರೆ ವಿದ್ಯಾರ್ಥಿಗಳ ಮೇಲೆ ಪ್ರತಿಕೂಲ ಪರಿಣಾಮ ಬೀರಲಿದೆ ಎಂದು ಸಂಶೋಧನಾ ತಂಡ ಅಭಿಪ್ರಾಯಪಟ್ಟಿದೆ. ಈ ಬಗೆಗಿನ ಅಧ್ಯಯನ ವರದಿ ಪರ್ಸನಾಲಿಟಿ ಅಂಡ್ ಸೋಶಿಯಲ್ ಸೈಕಾಲಜಿಗೆ ಸಂಬಂಧಿಸಿದ ಜರ್ನಲ್ ನಲ್ಲಿ ಪ್ರಕಟವಾಗಿದೆ.
