ಬಿಹಾರ: 3,400 ಯುವಕರಿಗೆ ಬಲವಂತದ ಮದುವೆ!

ಪಾಟ್ನಾ: ಭಾರತೀಯ ಸಂಸ್ಕೃತಿಯಲ್ಲಿ ಮದುವೆಯೆಂಬುದು ಪವಿತ್ರ ಬಂಧ. ಆದರೆ ಬಿಹಾರದಲ್ಲಿ ಮಾತ್ರ ಇದು ಉಲ್ಟಾ ಹೊಡೆದಂತಿದೆ, ಏಕೆಂದರೆ ಪೊಲೀಸ್‌ ರೆಕಾರ್ಡ್ಸ್‌ ಪ್ರಕಾರ, ರಾಜ್ಯದಲ್ಲಿ ಕಳೆದ ವರ್ಷ 3,400 ಯುವಕರನ್ನು ಅಪಹರಿಸಿ ಬಲವಂತವಾಗಿ ಮದುವೆ ಮಾಡಲಾಗಿದೆ.

ಬಲವಂತ ಮದುವೆ (ಪಕಡ್ವಾ ವಿವಾಹ್‌) ಪ್ರಕರಣಗಳು ಬಿಹಾರದಲ್ಲಿ ದಿನದಿಂದ ದಿನಕ್ಕೆ ಹೆಚ್ಚಾಗಿದ್ದು, ಒಟ್ಟಾರೆ 3,405 ವರರನ್ನು ಗನ್‌ ತೋರಿಸಿ ಜೀವ ಬೆದರಿಕೆಯೊಡ್ಡಿ ಮದುವೆ ಮಾಡಿಸಲಾಗಿದೆ ಎಂದು ಪೊಲೀಸ್‌ ಅಧಿಕಾರಿಯೊಬ್ಬರು ಹೇಳಿದ್ದಾರೆ.

ಕಳೆದ ತಿಂಗಳು ಪಾಟ್ನಾದ ಗ್ರಾಮವೊಂದರಲ್ಲಿ ಯುವಕನೊಬ್ಬನಿಗೆ ಗನ್‌ ತೋರಿಸಿ ತನ್ನ ಮಗಳನ್ನು ಮದುವೆಯಾಗುವಂತೆ ಬೆದರಿಸಿರುವ ಪ್ರಕರಣ ರಾಷ್ಟ್ರಾದ್ಯಂತ ವೈರಲ್‌ ಆಗಿತ್ತು. ಅಂಕಿ ಅಂಶಗಳ ಪ್ರಕಾರ, 2016ರಲ್ಲಿ 3070 ಪಕಡ್ವಾ ವಿವಾಹವಾಗಿದ್ದರೆ, 2015ರಲ್ಲಿ 3000 ಹಾಗೂ 2014ರಲ್ಲಿ 2,525 ಇಂತಹ ಪ್ರಕರಣ ದಾಖಲಾಗಿವೆ ಎಂದು ಪೊಲೀಸರು ಹೇಳಿದ್ದಾರೆ.

ರಾಜ್ಯದಲ್ಲಿ ದಿನವೊಂದಕ್ಕೆ 9 ಬಲವಂತದ ಮದುವೆ ಪ್ರಕರಣ ದಾಖಲಾಗುತ್ತಿದ್ದು, ಇದನ್ನು ನಿಯಂತ್ರಿಸಲು ಪೊಲೀಸ್‌ ಇಲಾಖೆ ಮುಂದಾಗಿದೆ.