ಗಂಡಸರಿಗೆ ಹೋಲಿಸಿದರೆ ಮದುವೆಯ ನಂತರ ಮಹಿಳೆಯರು ಬಹಳ ಬೇಗ ದಪ್ಪಗಾಗುತ್ತಾರೆ. ಬದಲಾದ ಜೀವನ ಕ್ರಮ ದೇಹ-ಮನಸ್ಸು ಎರಡರಲ್ಲೂ ತನ್ನ ಚಾಪು ಮೂಡಿಸುತ್ತದೆ. ನಿಜಕ್ಕೂ ಮದುವೆಗೂ ಊದಿಕೊಳ್ಳುವುದಕ್ಕೂ ಅದೆಲ್ಲಿಯ ಸಂಬಂಧ ಎಂದು ಉತ್ತರ ಮಾತ್ರ ಅಚ್ಚರಿ ತರುತ್ತದೆ.
ಮದುವೆ ಅಂದರೆ ಸಂತಸ ಅರಳುವ ಸಮಯ. ಅದೊಂದು ರೀತಿಯ ಹೊಸ ವಾತಾವರಣ ಸೃಷ್ಟಿಸುತ್ತದೆ. ಮನಸ್ಸು, ದೇಹ ರಿಲ್ಯಾಕ್ಸ್ ಆಗುವ ಹೊತ್ತು ಅದು. ಅಷ್ಟೆ ಅಲ್ಲ, ಒಂದಿಷ್ಟು ಸಮಯ ವೃತ್ತಿ ಸೇರಿದಂತೆ ಹಲವಾರು ಒತ್ತಡಗಳಿಂದ ದೂರ ಇರುವ ಸಮಯ ಅದು. ದೇಹ ದಂಡನೆಗೆ ಒಳಗಾಗುವುದಿಲ್ಲ. ನೆಂಟರಿಷ್ಟರ ಮನೆ ಅದು ಇದೂ ಅಂತ ತಿನ್ನುವ ಆಹಾರದಲ್ಲೂ ಲಿಮಿಟ್ ಇರುವುದಿಲ್ಲ.
ಗಂಡ ಹೆಂಡತಿ ಪ್ರೀತಿಯ ಮಾತುಗಳಾಡುತ್ತಾ, ಒಟ್ಟಿಗೆ ಕುಳಿತು ಊಟ ಮಾಡುವಾಗ ಹೊಟ್ಟೆಯ ಮೇಲೆ ಯಾವುದೇ ಹಿಡಿತ ಇರುವುದಿಲ್ಲ. ಏಕಾಂತವ ಹುಡುಕ ಹೊರಟು ಹೊರಗಿನ ತಿಂಡಿಗಳನ್ನು ತಿನ್ನುವುದು ಜಾಸ್ತಿಯಾಗುತ್ತದೆ. ಮದುವೆಯ ನಂತರ ಮಹಿಳೆಯರು ತಮ್ಮ ಆರೋಗ್ಯದ ಕಡೆಗೆ ಗಮನ ಹರಿಸುವುದನ್ನು ಕಡಿಮೆ ಮಾಡುತ್ತಾರೆ. ನನ್ನನ್ನು ಇನ್ಯಾರು ನೋಡುವ ಅವಶ್ಯಕತೆ ಇದೆ. ಅದಾಗಲೇ ಮೆಚ್ಚಿಕೊಳ್ಳಬೇಕಿದ್ದವರು ಮಚ್ಚಿದ್ದಾಗಿದೆ ಎಂದು ತಮ್ಮನ್ನು ತಾವೇ ಸಮಾಧಾನ ಮಾಡಿಕೊಳ್ಳುವುದು ಹೆಚ್ಚು.
ಸ್ವಿಡ್ಜರ್ಲ್ಯಾಂಡ್ನ ಬೆಸಿಲ್ ವಿಶ್ವವಿದ್ಯಾಲಯದ ಸೈಕಾಲಜಿ ಆರೋಗ್ಯ ವಿಭಾಗದ ಅಧ್ಯಯನದ ಪ್ರಕಾರ, ಹೆಚ್ಚು ಆಹಾರ ಸೇವಿಸುವುದು, ಮದುವೆಯ ನಂತರ ವ್ಯಾಯಾಮ, ವಾಕ್ ಕೈಬಿಡುವುದು, ಮಕ್ಕಳು ಹುಟ್ಟಿದ ನಂತರ ಅವರು ಉಳಿಸಿದ ಆಹಾರವನ್ನು ಕಸದ ತೊಟ್ಟಿ ಎಂಬಂತೆ ತಮ್ಮ ಹೊಟ್ಟೆಗೆ ಹಾಕಿಕೊಳ್ಳುವುದು ಮಹಿಳೆಯರ ತೂಕ ಹೆಚ್ಚಲು ಕಾರಣವಂತೆ.
ಆದರೆ ದೇಹ ಹಾಗೂ ಮನಸ್ಸು ಉಲ್ಲಾಸದಿಂದ ಕೂಡಿರಬೇಕು ಅಂದರೆ ಕ್ರಮಬದ್ಧ ಆಹಾರ, ನಿಯಮಿತ ವ್ಯಾಯಾಮ ರೂಢಿಸಿಕೊಳ್ಳಲೇಬೇಕು. ಮದುವೆಯ ನಂತರ ಯಾರನ್ನೂ ಆಕರ್ಷಿಸಬೇಕಿಲ್ಲ ಎಂದುಕೊಳ್ಳಬೇಡಿ. ನಿಮ್ಮ ಸಂಗಾತಿ ದೀರ್ಘಕಾಲ ನಿಮ್ಮತ್ತ ಆಕರ್ಷಣೆ ಉಳಿಸಿಕೊಳ್ಳಬೇಕು ಅಂದರೆ ಮದುವೆ ಮುಂಚಿನ ನಿಮ್ಮ ದೇಹ ಸೌಂದರ್ಯಕ್ಕೆ ಕೊಟ್ಟ ಗಮನವನ್ನು ಈಗಲೂ ಕೊಡಬೇಕು.
ಮದುವೆ ನಂತರವೂ ಏರುವ ತೂಕವನ್ನು ಸಮತೋಲನದಲ್ಲಿಟ್ಟುಕೊಳ್ಳಬಹುದು. ಸಂಗಾತಿಯ ಜತೆಗೆ ಜಾಗಿಂಗ್, ವಾಕಿಂಗ್ ಜತೆ ಕಪಲ್ ಸ್ಪಾ ಥೆರಪಿಗಳನ್ನು ಪಡೆಯಬಹುದು.
Comments are closed.