ನವದೆಹಲಿ: ಅತಿವೇಗದಿಂದ ವಾಹನ ಚಲಾಯಿಸಿದ್ದಕ್ಕೆ ಕ್ರಿಕೆಟ್ ದಿಗ್ಗಜ ಹಾಗೂ ಸ್ಪಿನ್ ಮಾಂತ್ರಿಕ ಶೇನ್ ವಾರ್ನ್ ಅವರಿಗೆ 12 ತಿಂಗಳು ಕಾಲ ಡ್ರೈವಿಂಗ್ನಿಂದ ಬ್ಯಾನ್ ಮಾಡಲಾಗಿದೆ.
ಸೋಮವಾರ ವಿಂಬಲ್ಡನ್ನ ಮ್ಯಾಜಿಸ್ಟ್ರೇಟ್ ನ್ಯಾಯಾಲಯದ ಮುಂದೆ ಹಾಜರಾದ 50 ವರ್ಷದ ಆಸ್ಟ್ರೇಲಿಯಾದ ಮಾಜಿ ಕ್ರಿಕೆಟಿಗ ಶೇನ್ ವಾರ್ನ್, ತಾವು ಅತಿವೇಗದಿಂದ ಚಾಲನೆ ಮಾಡಿದ್ದನ್ನು ತಪ್ಪೊಪ್ಪಿಕೊಂಡರು. ಕಳೆದ ಆಗಸ್ಟ್ ತಿಂಗಳಲ್ಲಿ ಕಿಂಗ್ಸ್ಟನ್ನಲ್ಲಿ ತಮ್ಮ ಜಾಗ್ವಾರ್ ಕಾರಿನಲ್ಲಿ ತೆರಳುತ್ತಿದ್ದ ಶೇನ್ ವಾರ್ನ್, ಗಂಟೆಗೆ 40 ಮೈಲಿ ವೇಗದಲ್ಲಿ ಚಾಲನೆ ಮಾಡಬೇಕಾದ ರಸ್ತೆಯಲ್ಲಿ ಗಂಟೆಗೆ 47 ಮೈಲಿಯಲ್ಲಿ ಚಾಲನೆ ಮಾಡುವ ಮೂಲಕ ಸಂಚಾರಿ ನಿಯಮವನ್ನು ಉಲ್ಲಂಘನೆ ಮಾಡಿದ್ದಾರೆ.
ಸಂಚಾರಿ ನಿಯಮ ಉಲ್ಲಂಘನೆ ವಿಚಾರಣೆಗೆ ಹಾಜರಾಗದ ವಾರ್ನ್ ಅವರ ಲೈಸೆನ್ಸ್ ಮೇಲೆ ಈಗಾಗಲೇ 15 ಪೆನಾಲ್ಟಿ ಅಂಕಗಳಿವೆ. 2016ರ ಏಪ್ರಿಲ್ನಿಂದ ಈವರೆಗೆ ಅತಿವೇಗದ 5 ಅಪರಾಧಗಳನ್ನು ವಾರ್ನ್ ಎಸಗಿದ್ದಾರೆ. ಹೀಗಾಗಿ 1,845 ಪೌಂಡ್ ದಂಡವನ್ನು ನ್ಯಾಯಾಲಯಕ್ಕೆ ಪಾವತಿಸುವಂತೆ ಕೋರ್ಟ್ ಆದೇಶಿಸಿದ್ದು, 12 ತಿಂಗಳು ಡ್ರೈವಿಂಗ್ನಿಂದ ಬ್ಯಾನ್ ಮಾಡಿದೆ.
ಕ್ರಿಕೆಟ್ ಇತಿಹಾಸದಲ್ಲಿ ಉತ್ತಮ ಬೌಲರ್ ಎನಿಸಿಕೊಂಡಿರುವ ಆಸಿಸ್ನ ಲೆಗ್ ಸ್ಪಿನ್ನರ್ ಶೇನ್ ವಾರ್ನ್, 1992 ಮತ್ತು 2007ರ ನಡುವಿನ ಅಂತರದಲ್ಲಿ 145 ಟೆಸ್ಟ್ ಪಂದ್ಯಗಳಲ್ಲಿ 708 ವಿಕೆಟ್ ಕಬಳಿಸಿ ತಮ್ಮದೆಯಾದ ದಾಖಲೆ ಬರೆದಿದ್ದಾರೆ.
Comments are closed.