ಆಂಗ್ಲರಿಗೆ ಮಣ್ಣುಮುಕ್ಕಿಸಿದ ಫಿಂಚ್ ಪಡೆ; ಸೆಮಿ ಫೈನಲ್​ಗೆ ಆಸ್ಟ್ರೇಲಿಯಾ

ಬೆಂಗಳೂರು (ಜೂ. 25): ಕ್ರಿಕೆಟ್ ಕಾಶಿ ಲಾರ್ಡ್ಸ್​​ ಮೈದಾನದಲ್ಲಿ ನಡೆದ ಇಂಗ್ಲೆಂಡ್ ವಿರುದ್ಧದ ಹೈವೋಲ್ಟೇಜ್ ಪಂದ್ಯದಲ್ಲಿ ಆಸ್ಟ್ರೇಲಿಯಾ ಭರ್ಜರಿ ಗೆಲುವು ದಾಖಲಿಸಿದೆ. ಬ್ಯಾಟಿಂಗ್​​ನಲ್ಲಿ ಫಿಂಚ್ ಮಿಂಚಿದರೆ, ಬೆಹ್ರೆಂಡಾರ್ಫ್​​ ಬೌಲಿಂಗ್ ದಾಳಿಗೆ ತತ್ತರಿಸಿದ ಆಂಗ್ಲರು ಮೂರನೇ ಸೋಲು ಅನುಭವಿಸಿದೆ. ಫಿಂಚ್ ಪಡೆ 64 ರನ್​ಗಳ ಜಯದೊಂದಿಗೆ ಸೆಮಿ ಫೈನಲ್​​ಗೆ ಲಗ್ಗೆ ಇಟ್ಟಿದೆ.

ಆಸ್ಟ್ರೇಲಿಯಾ ನೀಡಿದ್ದ 286 ರನ್​ಗಳ ಸಾಧಾರಣ ಮೊತ್ತ ಬೆನ್ನಟ್ಟಿದ ಇಂಗ್ಲೆಂಡ್ ಆರಂಭದಲ್ಲೇ ಪ್ರಮುಖ ವಿಕೆಟ್ ಕೈ ಚೆಲ್ಲಿತು. 50 ರನ್ ಆಗುವ ಹೊತ್ತಿಗೆನೆ 4 ವಿಕೆಟ್ ಕಳೆದುಕೊಂಡಿತು.

ಇಂಗ್ಲೆಂಡ್​ನ ಓಪನರ್ ಜೇಮ್ಸ್​ ವಿನ್ಸ್​ ಮತ್ತೊಮ್ಮ ವಿಫಲವಾಗಿ ಮೊದಲ ಓವರ್​​ನ 2ನೇ ಎಸೆತದಲ್ಲೇ ಬೆಹ್ರೆಂಡಾರ್ಫರ್​​ ಬೌಲಿಂಗ್​ನಲ್ಲಿ ಬೌಲ್ಡ್​ ಆದರೆ, ಕಳೆದ ಪಂದ್ಯದಲ್ಲಿ ಮಿಂಚಿದ್ದ ಜೋ ರೂಟ್ ಕೇವಲ 8 ರನ್​ಗೆ ನಿರ್ಗಮಿಸಿದರು. ನಾಯಕ ಇಯಾನ್ ಮಾರ್ಗನ್ ಆಟ 4 ರನ್​ಗೆ ಅಂತ್ಯವಾಯಿತು. ಜಾನಿ ಬೈರ್​ಸ್ಟೋ ಕೊಂಚಹೊತ್ತು ಕ್ರೀಸ್​​​ನಲ್ಲಿದ್ದರಾದರು 27 ರನ್​ಗೆ ಬ್ಯಾಟ್ ಕೆಳಗಿಟ್ಟರು.

4 ವಿಕೆಟ್ ಕಳೆದುಕೊಂಡಿರುವಾಗ ಜಾಸ್ ಬಟ್ಲರ್ ಹಾಗೂ ಬೆನ್ ಸ್ಟೋಕ್ಸ್​ ಎಚ್ಚರಿಕೆಯಿಂದ ಇನ್ನಿಂಗ್ಸ್​ ಕಟ್ಟಿ 71 ರನ್​ಗಳ ಜೊತೆಯಾಟ ಆಡಿದರು. ಚೆನ್ನಾಗಿಯೆ ಆಡುತ್ತಿದ್ದ ಬಟ್ಲರ್ 25 ರನ್ ಬಾರಿಸಿ ಸ್ಟಾಯಿನಿಸ್​ ಬೌಲಿಂಗ್​ನಲ್ಲಿ ಔಟ್ ಆಗುವ ಮೂಲಕ ಮತ್ತೊಂದು ಆಘಾತ ನೀಡಿದರು. ಕ್ರಿಸ್ ವೋಕ್ಸ್​ ಆಟ 26ಕ್ಕೆ ನಿಂತಿತು. ಹೀಗೆ ಒಂದುಕಡೆ ವಿಕೆಟ್ ಉರುಳುತ್ತಿದ್ದರೆ, ಇತ್ತ ಬೆನ್ ಸ್ಟೋಕ್ಸ್​ ಗೆಲುವಿಗಾಗಿ ಎಲ್ಲಿಲ್ಲದ ಹೋರಾಟ ನಡೆಸಿದರು.

ಆದರೆ, ಅರ್ಧಶತಕ ಸಿಡಿಸಿ ಬಿರುಸಿನ ಆಟ ಪ್ರದರ್ಶಿಸಿದ ಸ್ಟೋಕ್ಸ್​ ತಂಡವನ್ನು ಗೆಲುವಿನ ದಡ ಸೇರಿಸಲು ವಿಫಲರಾದರು. 115 ಎಸೆತಗಳಲ್ಲಿ 8 ಬೌಂಡರಿ, 2 ಸಿಕ್ಸರ್ ಬಾರಿಸಿ 89 ರನ್​ಗೆ ಸ್ಟಾರ್ಕ್​​ ಬೌಲಿಂಗ್​ನಲ್ಲಿ ಬೌಲ್ಡ್​ ಆದರು. ಬಳಿಕ ಬಂದ ಬ್ಯಾಟ್ಸ್​ಮನ್​ಗಳು ಯಾರು ಕ್ರೀಸ್ ಕಚ್ಚಿ ಆಡಲಿಲ್ಲ. ಪರಿಣಾಮ ಇಂಗ್ಲೆಂಡ್ 44.4 ಓವರ್​​ನಲ್ಲಿ 221 ರನ್​ಗೆ ಆಲೌಟ್ ಆಯಿತು. ಆಸೀಸ್ ಪರ ಬೆಹ್ರೆಂಡಾರ್ಫ್​​ 5 ವಿಕೆಟ್ ಕಿತ್ತರೆ, ಮಿಚೆಲ್ ಸ್ಟಾರ್ಕ್​ 4 ಹಾಗೂ ಸ್ಟಾಯಿನಿಸ್ 1 ವಿಕೆಟ್ ಪಡೆದರು.

64 ರನ್​ಗಳ ಭರ್ಜರಿ ಗೆಲುವಿನೊಂದಿಗೆ ಆಸ್ಟ್ರೇಲಿಯಾ ಅಂಕಪಟ್ಟಿಯಲ್ಲಿ ಅಗ್ರಸ್ಥಾನಕ್ಕೇರಿದೆ. ಅಲ್ಲದೆ 2019ರ ಏಕದಿನ ವಿಶ್ವಕಪ್‌ನಲ್ಲಿ ಅಂತಿಮ ನಾಲ್ಕರ ಘಟ್ಟ ಪ್ರವೇಶಿಸಿದ ಮೊದಲ ತಂಡವೆಂಬ ಹೆಗ್ಗಳಿಕೆಗೆ ಪಾತ್ರವಾಗಿ ಸೆಮಿ ಫೈನಲ್​ಗೆ ಎಂಟ್ರಿ ಕೊಟ್ಟಿದೆ. ಇತ್ತ ಇಂಗ್ಲೆಂಡ್ 3ನೇ ಸೋಲಿನೊಂದಿಗೆ ಕುಸಿದಿದ್ದು, 4ನೇ ಸ್ಥಾನದಲ್ಲಿದೆ. ಶತಕ ಸಿಡಿಸಿದ ಆ್ಯರೋನ್ ಫಿಂಚ್ ಪಂದ್ಯಶ್ರೇಷ್ಠ ಪ್ರಶಸ್ತಿ ಬಾಜಿಕೊಂಡರು.

ಇದಕ್ಕೂ ಮೊದಲು ಟಾಸ್ ಗೆದ್ದ ಇಂಗ್ಲೆಂಡ್ ತಂಡದ ನಾಯಕ ಇಯಾನ್ ಮಾರ್ಗನ್ ಬೌಲಿಂಗ್ ಆಯ್ಕೆ ಮಾಡಿಕೊಂಡರು.

ಅದರಂತೆ ಬ್ಯಾಟಿಂಗ್​ಗೆ ಇಳಿದಿರುವ ಆಸ್ಟ್ರೇಲಿಯಾಕ್ಕೆ ಓಪನರ್​ಗಳಾದ ನಾಯಕ ಆ್ಯರೋನ್ ಫಿಂಚ್ ಹಾಗೂ ಡೇವಿಡ್ ವಾರ್ನರ್ ಅರ್ಧಶತಕ ಸಿಡಿಸಿ ಶತಕದ ಜೊತೆಯಾಟ ಆಡಿದರು. ಆಂಗ್ಲ ಬೌಲರ್​ಗಳ ಬೆವರಿಳಿಸಿದ ಈ ಜೋಡಿ ಅತ್ಯುತ್ತಮ ಆಟ ಪ್ರದರ್ಶಿಸಿದರು. 123 ರನ್​ಗಳ ಅಮೋಘ ಜೊತೆಯಾಟದೊಂದಿಗೆ ವಾರ್ನರ್ 53 ರನ್ ಬಾರಿಸಿ ಮೊಯೀನ್ ಅಲಿ ಬೌಲಿಂಗ್​ನಲ್ಲಿ ಔಟ್ ಆದರು.

ಈ ಮೂಲಕ ವಾರ್ನರ್-ಫಿಂಚ್ ಜೋಡಿ ದಾಖಲೆ ಬರೆದಿದೆ. ಏಕದಿನ ವಿಶ್ವಕಪ್‌ನಲ್ಲಿ ಮೊದಲ ವಿಕೆಟ್‌ಗೆ ಸತತ ಐದು ಬಾರಿ 50ಕ್ಕೂ ಹೆಚ್ಚು ಜೊತೆಯಾಟ ನೀಡಿದ ದಾಖಲೆಗೆ ಇವರಿಬ್ಬರು ಪಾತ್ರವಾಗಿದ್ದಾರೆ. ಅಲ್ಲದೆ ಈ ದಾಖಲೆ ಬರೆದ ಮೊತ್ತ ಮೊದಲ ಆರಂಭಿಕ ಜೋಡಿ ಫಿಂಚ್-ವಾರ್ನರ್ ಆಗಿದ್ದಾರೆ.

ವಾರ್ನರ್ ಔಟ್ ಆದ ಬೆನಲ್ಲೆ ಕ್ರೀಸ್​ಗೆ ಬಂದ ಉಸ್ಮಾನ್ ಖ್ವಾಜಾ ಕೊಂಚಹೊತ್ತು ಬ್ಯಾಟ್ ಬೀಸಿ 23 ರನ್​ಗೆ ಬ್ಯಾಟ್ ಕೆಳಗಿಟ್ಟರು. ಈ ಮಧ್ಯೆ ಫಿಂಚ್ ಏಕದಿನ ಕ್ರಿಕೆಟ್​ನಲ್ಲಿ 15ನೇ ಶತಕ ಪೂರೈಸಿದರು. ಆದರೆ, ಶತಕ ಬಾರಿಸಿದ ಮುಂದಿನ ಎಸೆತದಲ್ಲೇ ಫಿಂಚ್ ನಿರ್ಗಮಿಸಿದರು. 116 ಎಸೆತಗಳಲ್ಲಿ 11 ಬೌಂಡರಿ ಹಾಗೂ 2 ಸಿಕ್ಸರ್​ನೊಂದಿಗೆ ಫಿಂಚ್ 100 ರನ್ ಗಳಿಸಿ ಔಟ್ ಆದರು.

ಬಳಿಕ ಸ್ಟೀವ್ ಸ್ಮಿತ್ ಜೊತೆಯಾದ ಗ್ಲೇನ್ ಮ್ಯಾಕ್ಸ್​ವೆಲ್ ರನ್ ಕಲೆಹಾಕಲು ಹೊರಟರಾದರು, ಮ್ಯಾಕ್ಸ್​ವೆಲ್​ 12 ರನ್​ಗೆ ಔಟ್ ಆದರೆ, ಸ್ಟಾಯಿನಿಸ್ 8 ರನ್ ಗಳಿಸಿರುವಾಗ ರನೌಟ್ ಬಲೆಗೆ ಬಿದ್ದರು. ಸ್ಮಿತ್ ಆಟ 38 ರನ್​ಗೆ ನಿಂತರು. ನಂತರ ಬಂದ ಬ್ಯಾಟ್ಸ್​ಮನ್​ಗಳು ಯಾರು ಹೇಳಿಕೊಳ್ಳುವಂತಹ ಪ್ರದರ್ಶನ ನೀಡಲಿಲ್ಲ.

ಕೊನೆಯಲ್ಲಿ ಅಲೆಕ್ಸ್​ ಕ್ಯಾರಿ 27 ಎಸೆತಗಳಲ್ಲಿ 38 ರನ್ ಬಾರಿಸಿದ ಪರಿಣಾಮ ಆಸ್ಟ್ರೇಲಿಯಾ 50 ಓವರ್​ಗೆ 7 ವಿಕೆಟ್ ಕಳೆದುಕೊಂಡು 285 ರನ್​ ಕಲೆಹಾಕಿತು. ಇಂಗ್ಲೆಂಡ್ ಪರ ಕ್ರಿಸ್ ವೋಕ್ಸ್​ 2 ವಿಕೆಟ್ ಕಿತ್ತರೆ, ಆರ್ಚೆರ್, ಮಾರ್ಕ್​ ವುಡ್, ಮೊಯೀನ್ ಅಲಿ ಹಾಗೂ ಬೆನ್ ಸ್ಟೋಕ್ಸ್​ ತಲಾ 1 ವಿಕೆಟ್ ಪಡೆದರು.