ತಂಡದ ಸಹ ಆಟಗಾರನ ಮೇಲೆ ಅಶಿಸ್ತಿನ ವರ್ತನೆ ತೋರಿದ ಮುಂಬೈ ಅಂಡರ್ 16 ತಂಡದ ನಾಯಕ ಮುಶೀರ್ ಖಾನ್ಗೆ ಮುಂಬೈ ಕ್ರಿಕೆಟ್ ಮಂಡಳಿ 3 ವರ್ಷಗಳ ಕಾಲ ನಿಷೇಧ ಹೇರಿದೆ. ಮುಶೀರ್ ಐಪಿಎಲ್ನಲ್ಲಿ ಆರ್ಸಿಬಿ ತಂಡದ ಪರ ಆಡಿದ್ದ ಸರ್ಫರಾಜ್ ಖಾನ್ ಅವರ ಸಹೋದರನಾಗಿದ್ದು, ಸದ್ಯ ಮುಂಬೈ ಕಿರಿಯರ ತಂಡವನ್ನು ಪ್ರತಿನಿಧಿಸುತ್ತಿದ್ದಾನೆ.
ವಿಜಯ್ ಮರ್ಚೆಂಟ್ ಟೂರ್ನಿಯ ಪಂದ್ಯದ ವೇಳೆ, ತನ್ನ ಸಹ ಆಟಗಾರನ ಜೊತೆ ಅಶಿಸ್ತಿನಿಂದ ಮುಶೀರ್ ವರ್ತಿಸಿದ್ದನು. ಈ ಕುರಿತು ದೂರು ಬಂದಿದ್ದರಿಂದ 14 ರ ಹರೆಯದ ಆಟಗಾರರನ್ನು ಟೀಮ್ ಆಡಳಿತ ಮಂಡಳಿ ವಿಚಾರಣೆ ನಡೆಸಿತ್ತು. ಈ ವೇಳೆ ಮುಶೀರ್ ತಪ್ಪೊಪ್ಪಿಕೊಂಡಿದ್ದು, ಹೀಗಾಗಿ ಆತನ ಮೇಲೆ ಎಂಸಿಎ ಮೂರು ವರ್ಷಗಳ ಕಾಲ ನಿಷೇಧ ಹೇರಿದೆ ಎಂದು ಮುಂಬೈ ಕ್ರಿಕೆಟ್ನ ಕಾರ್ಯದರ್ಶಿ ಉಮೇಶ್ ಖಾನ್ವಿಲ್ಕರ್ ತಿಳಿಸಿದ್ದಾರೆ.
ಆದರೆ ಕಿರಿಯ ಆಟಗಾರನ ಮೇಲೆ ವಿಧಿಸಿರುವ ಶಿಕ್ಷೆಯಿಂದ ಆತನ ಕ್ರಿಕೆಟ್ ಜೀವನದ ಮೇಲೆ ಪರಿಣಾಮ ಬೀರಲಿದೆ ಎಂಬ ಮಾತುಗಳು ಕೇಳಿ ಬಂದಿದ್ದು, ಶಿಕ್ಷೆಯ ಪ್ರಮಾಣವನ್ನು ಕಡಿತಗೊಳಿಸುವಂತೆ ಕ್ರಿಕೆಟ್ ಅಭಿಮಾನಿಗಳು ಆಗ್ರಹಿಸಿದ್ದಾರೆ.
ಬೆಳೆಯುವ ಸಿರಿ ಮೊಳಕೆಯಲ್ಲಿ ಎಂಬಂತೆ ಮುಶೀರ್ ಈಗಾಗಲೇ ತನ್ನ ಅದ್ಭುತ ಪ್ರತಿಭೆಯ ಮೂಲಕ ಹಲವು ಕ್ರಿಕೆಟಿಗರ ಮನಗೆದ್ದಿದ್ದಾನೆ. ಸ್ಪಿನ್ ಮತ್ತು ಬ್ಯಾಟಿಂಗ್ ಕೌಶಲ್ಯದ ಮೂಲಕ 8 ನೇ ವಯಸ್ಸಿನಲ್ಲೇ ಮುಶೀರ್ ಕ್ರಿಕೆಟ್ನ ವಂಡರ್ ಕಿಡ್ ಎಂದು ಕರೆಸಿಕೊಂಡಿದ್ದನು.
2013 ರಲ್ಲಿ ಮುಂಬೈ ಕ್ರಿಕೆಟ್ ಅಸೋಶಿಯೇಷನ್ ಆಯೋಜಿಸಿದ್ದ ಸಮಾರಂಭದಲ್ಲಿ ಮುಶೀರ್ ಸಾಧನೆಗೆ ಖುದ್ದು ಕ್ರಿಕೆಟ್ ದಿಗ್ಗಜ ಸಚಿನ್ ತೆಂಡೂಲ್ಕರ್ ಪ್ರಶಸ್ತಿ ನೀಡಿ, ಶಹಬ್ಬಾಸ್ ಗಿರಿ ನೀಡಿದ್ದರು. ಮಗನ ಮೇಲೆ ಹೇರಲಾಗಿರುವ ನಿಷೇಧವನ್ನು ತೆಗೆದು ಹಾಕುವಂತೆ ಈಗಾಗಲೇ ಮುಶೀರ್ ಖಾನ್ ಪೋಷಕರು ಎಂಸಿಎ ಅನ್ನು ಕೇಳಿಕೊಂಡಿದ್ದಾರೆ. ಈ ಬಗ್ಗೆ ಮುಂಬೈ ಕ್ರಿಕೆಟ್ ಅಸೋಶಿಯೇಷನ್ ಶಿಕ್ಷೆಯ ಪ್ರಮಾಣ ಕಡಿಮೆ ಮಾಡಲಿದೆಯೇ ಎಂಬುದನ್ನು ಕಾದು ನೋಡಬೇಕಿದೆ.
Comments are closed.