ದುಬೈ: ಯುಎಇನಲ್ಲಿ ಸಾಗುತ್ತಿರುವ ಪ್ರತಿಷ್ಠಿತ ಏಷ್ಯಾ ಕಪ್ 2018 ಕ್ರಿಕೆಟ್ ಟೂರ್ನಮೆಂಟ್ನಲ್ಲಿ ಮಂಗಳವಾರ ನಡೆದ ಭಾರತ ಹಾಗೂ ಅಫಘಾನಿಸ್ತಾನ ನಡುವಣ ಸೂಪರ್ ಫೋರ್ ಹಂತದ ಪಂದ್ಯವು ರೋಚಕ ಟೈನಲ್ಲಿಅಂತ್ಯಗೊಂಡಿದೆ. ಇದರೊಂದಿಗೆ ಭಾರತದ ಫೈನಲ್ ವರೆಗಿನ ಅಜೇಯ ಓಟ ಅಬಾಧಿತವಾಗಿದೆ.
ರೋಹಿತ್ ಶರ್ಮಾ ಸೇರಿದಂತೆ ಐವರು ಪ್ರಮುಖ ಆಟಗಾರರಿಗೆ ಭಾರತ ವಿಶ್ರಾಂತಿಯನ್ನು ಸೂಚಿಸಿತ್ತು. ಇದರೊಂದಿಗೆ ತಂಡವನ್ನು ಮುನ್ನಡೆಸುವ ಅವಕಾಶವನ್ನು ಮಹೇಂದ್ರ ಸಿಂಗ್ ಧೋನಿ ಅವರು ಪಡೆದಿದ್ದರು. ಈ ಮೂಲಕ 696 ದಿನಗಳ ನಂತರ ಧೋನಿ ಮರಳಿ ಟೀಮ್ ಇಂಡಿಯಾದ ಮುಂದಾಳಾದರು. ಇದರೊಂದಿಗೆ ಏಕದಿನದಲ್ಲಿ ದಾಖಲೆಯ 200ನೇ ಬಾರಿಗೆ ಟೀಮ್ ಇಂಡಿಯಾ ನಾಯಕರಾಗಿ ಕಣಕ್ಕಿಳಿದರು.
ಆಗಲೇ ಫೈನಲ್ ಪ್ರವೇಶಿಸಿರುವ ಟೀಮ್ ಇಂಡಿಯಾಕ್ಕಿದು ಬೆಂಚ್ ಸ್ಟ್ರೆಂಗ್ ಪರೀಕ್ಷಿಸುವ ಪಂದ್ಯವಾಗಿತ್ತು. ಮೊದಲು ಬ್ಯಾಟಿಂಗ್ ನಡೆಸಿದ ಅಫಘಾನಿಸ್ತಾನ ಮೊಹಮ್ಮದ್ ಶೆಹ್ಜಾದ್ (124) ಸಿಡಿಲಬ್ಬರದ ಶತಕದ ನೆರವಿನೊಂದಿಗೆ 252 ರನ್ಗಳ ಸ್ಪರ್ಧಾತ್ಮಕ ಮೊತ್ತ ಪೇರಿಸಿತ್ತು.
ಬಳಿಕ ಗುರಿ ಬೆನ್ನಟ್ಟಿದ ಟೀಮ್ ಇಂಡಿಯಾ ಕೆಎಲ್ ರಾಹುಲ್ (60), ಅಂಬಟಿ ರಾಯುಡು (57), ದಿನೇಶ್ ಕಾರ್ತಿಕ್ (44) ಹಾಗೂ ಕೊನೆಯ ಹಂತದಲ್ಲಿ ರವೀಂದ್ರ ಜಡೇಜಾ (25) ಹೋರಾಟದ ಹೊರತಾಗಿಯೂ 49.5 ಓವರ್ಗಳಲ್ಲಿ 252 ರನ್ಗಳಿಗೆ ಸರ್ವಪನತವನ್ನು ಕಾಣುವ ಮೂಲಕ ಸ್ಕೋರ್ ಸಮಬಲಗೊಂಡಿತ್ತು. ಈ ಮೂಲಕ ರೋಚಕ ಟೈನಲ್ಲಿ ಅಂತ್ಯಕಂಡಿದೆ.
ರೋಹಿತ್ ಶರ್ಮಾ ಹಾಗೂ ಶಿಖರ್ ಧವನ್ ಅವರಿಗೆ ವಿಶ್ರಾಂತಿ ಸೂಚಿಸಿರುವ ಹಿನ್ನಲೆಯಲ್ಲಿ ಬಡ್ತಿ ಪಡೆದು ಬಂದ ಅಂಬಟಿ ರಾಯುಡು ಜೊತೆಗೆ ಕರ್ನಾಟಕದ ಕೆಎಲ್ ರಾಹುಲ್ ಇನ್ನಿಂಗ್ಸ್ ಆರಂಭಿಸಿದ್ದರು.
ಅಫಘಾನಿಸ್ತಾನ ಬೌಲರ್ಗಳನ್ನು ದಿಟ್ಟವಾಗಿ ಎದುರಿಸಿದ ಈ ಜೋಡಿಯು ಬಿರುಸಿನಿಂದ ರನ್ ಪೇರಿಸಿದರು. ಅಲ್ಲದೆ ಒಂಬತ್ತು ಓವರ್ಗಳಲ್ಲೇ ತಂಡದ ಮೊತ್ತ 50ರ ಗೆರೆ ದಾಟಿತು.
Comments are closed.