30ರ ಹರೆಯದಲ್ಲೂ ಕರ್ಣ್ ಶರ್ಮಾ ಅದ್ಭುತ ಫೀಲ್ಡಿಂಗ್

ಹೈದರಾಬಾದ್: ಇಂಡಿಯನ್ ಪ್ರೀಮಿಯರ್ ಲೀಗ್ (ಐಪಿಎಲ್) ಟ್ವೆಂಟಿ-20 ಕ್ರಿಕೆಟ್ ಚಾಂಪಿಯನ್‌ಶಿಪ್‌ ಕೇವಲ ಯುವ ಆಟಗಾರರಿಗೆ ಮಾತ್ರ ಸೀಮಿತ ಎಂಬ ವಾದವಿದೆ.

ಆದರೆ ಇವೆಲ್ಲವೂ ಮಾತಿಗೆ ಮಾತ್ರ ಸೀಮಿತ ಎಂಬುದನ್ನು ಚೆನ್ನೈ ಸೂಪರ್ ಸಿಂಗ್ಸ್ ಆಟಗಾರರು ಸಾಬೀತುಪಡಿಸುತ್ತಿದ್ದಾರೆ.

ಐಪಿಎಲ್ ಆರಂಭಕ್ಕೂ ಮುನ್ನ ಸಿಎಸ್‌ಕೆ ತಂಡವನ್ನು ಚೆನ್ನೈ ಸೀನಿಯರ್ಸ್ ಕಿಂಗ್ಸ್ ಎಂದು ಗೇಲಿ ಮಾಡಲಾಗುತ್ತಿತ್ತು. ಆದರೆ ಪ್ರಭಾವಿ ಪ್ರದರ್ಶನ ನೀಡುವ ಮೂಲಕ ಚೆನ್ನೈ ಆಟಗಾರರು ಗಮನ ಸೆಳೆದಿದ್ದಾರೆ.

ಚೆನ್ನೈ ತಂಡದಲ್ಲಿ ಬಹುತೇಕ ಆಟಗಾರರು 30ರ ವಯಸ್ಸನ್ನು ದಾಟಿದ್ದಾರೆ. ಇದೀಗ 30ರ ಹರೆಯದ ಕರ್ಣ್ ಶರ್ಮಾ ಸಹ ಅದ್ಭುತ ಫೀಲ್ಡಿಂಗ್ ಮಾಡುವ ಮೂಲಕ ಮೆಚ್ಚುಗೆಗೆ ಪಾತ್ರವಾಗಿದ್ದಾರೆ.

ಸನ್‌ರೈಸರ್ಸ್ ಹೈದರಾಬಾದ್ ವಿರುದ್ಧದ ಪಂದ್ಯದಲ್ಲಿ ಮೊದಲು ದೀಪಕ್ ಚಹರ್ ದಾಳಿಯಲ್ಲಿ ಮನೀಷ್ ಪಾಂಡೆ ಅವರ ಕ್ಯಾಚ್ ಹಿಡಿದಿರುವ ಕರ್ಣ್ ಶರ್ಮಾ, ಬೌಂಡರಿಯೊಂದನ್ನು ತಡೆಗಟ್ಟುವಲ್ಲಿ ನಿರ್ಣಾಯಕ ಪಾತ್ರವ ವಹಿಸಿದ್ದರು.

ಬಳಿಕ ಬೌಂಡರಿ ಗೆರೆಯಲ್ಲಿ ಅಧ್ಭುತ ಫೀಲ್ಡಿಂಗ್ ಮಾಡುವ ಮೂಲಕ ಸಿಕ್ಸರನ್ನು ತಡೆಗಟ್ಟಿದ್ದಾರೆ. ಪ್ರಸ್ತುತ ಕರ್ಣ್ ಪ್ರದರ್ಶನಕ್ಕೆ ಸಾಮಾಜಿಕ ಜಾಲತಾಣಗಳಲ್ಲಿ ಪ್ರಶಂಸೆಗಳು ವ್ಯಕ್ತವಾಗುತ್ತಿದೆ.