ಹೊಸದಿಲ್ಲಿ: ಸೀಮಿತ ಓವರ್ಗಳ ಕ್ರಿಕೆಟ್ನಲ್ಲಿ ಮಾಜಿ ನಾಯಕ ಹಾಗೂ ಹಿರಿಯ ಅನುಭವಿ ವಿಕೆಟ್ ಕೀಪರ್ ಬ್ಯಾಟ್ಸ್ಮನ್ ಮಹೇಂದ್ರ ಸಿಂಗ್ ಧೋನಿ ಸ್ಥಾನವನ್ನು ತುಂಬಲಾಗದು ಎಂಬುದು ಭಾರತ ಕ್ರಿಕೆಟ್ ತಂಡದ ನಾಯಕ ವಿರಾಟ್ ಕೊಹ್ಲಿ ಅನಿಸಿಕೆಯಾಗಿದೆ.
ಕ್ರಿಕೆಟ್ನಲ್ಲಿ ಅಪಾರ ಅನುಭವ ಸಂಪತ್ತನ್ನು ಹೊಂದಿರುವ ಧೋನಿ ತಂಡದ ಆಸ್ತಿ ಎಂಬುದನ್ನು ಕೊಹ್ಲಿ ಉಲ್ಲೇಖಿಸಿದ್ದಾರೆ.
ಈ ಎಲ್ಲ ವಿವರವನ್ನು ಕ್ರಿಕೆಟ್ ಆಡಳಿತಾಧಿಕಾರಿ ಸಮಿತಿಯ ಮುಖ್ಯಸ್ಥ ವಿನೋದ್ ರಾಯ್ ಬಹಿರಂಗಪಡಿಸಿದ್ದಾರೆ. ಅಲ್ಲದೆ ಕ್ರಿಕೆಟ್ಗೆ ಹೊಸತಾದ ಎ ಪ್ಲಸ್ ಗ್ರೇಡ್ ಸೇರ್ಪಡೆಗೊಳಿಸಲು ಧೋನಿ ಹಾಗೂ ಕೊಹ್ಲಿ ಸಲಹೆ ಮಾಡಿರುವುದಾಗಿ ವಿವರಿಸುತ್ತಾರೆ.
2014 ಡಿಸೆಂಬರ್ನಲ್ಲಿ ಧೋನಿ ಉತ್ತರಾಧಿಕಾರಿಯಾಗಿ ಭಾರತೀಯ ಟೆಸ್ಟ್ ತಂಡದ ನಾಯಕತ್ವವನ್ನು ಕೊಹ್ಲಿ ವಹಿಸಿಕೊಂಡಿದ್ದರು. ಟೆಸ್ಟ್ ಕ್ರಿಕೆಟ್ಗೆ ನಿವೃತ್ತಿ ಘೋಷಿಸಿದ್ದ ಧೋನಿ, ಏಕದಿನ ಹಾಗೂ ಟ್ವೆಂಟಿ-20ನಲ್ಲಿ ತಮ್ಮ ಸೇವೆಯನ್ನು ಮುಂದುವರಿಸಿದ್ದರು.
ಕ್ರಿಕೆಟ್ ಬಗ್ಗೆ ಧೋನಿಗಿರುವ ಜ್ಞಾನ ಹಾಗೂ ವಿಕೆಟ್ ಹಿಂದುಗಡೆ ವಿಕೆಟ್ ಕೀಪಿಂಗ್ ಕೌಶಲ್ಯ ದೊಡ್ಡ ಸ್ವತ್ತು ಆಗಿದೆ. ಈಗಲೂ ಧೋನಿಯಷ್ಟು ವೇಗದಲ್ಲಿ ಸ್ಟಂಪ್ ಹಾರಿಸುವ ವಿಕೆಟ್ ಕೀಪರ್ ತಂಡದಲ್ಲಿಲ್ಲ. ಧೋನಿ ಕ್ರಿಕೆಟಿಂಗ್ ಜ್ಞಾನವು ವಿರಾಟ್ ಪಾಲಿಗೆ ದೊಡ್ಡ ಆಸ್ತಿಯಾಗಿದೆ. ಆದರೂ ಎಷ್ಟು ವರ್ಷ ಕ್ರಿಕೆಟ್ನಲ್ಲಿ ಉಳಿಯಲಿದ್ದಾರೆ ಎಂಬುದನ್ನು ಸಮಯವೇ ತಿಳಿಸಲಿದೆ ಎಂದು ರಾಯ್ ತಿಳಿಸಿದರು.
ಧೋನಿ ಹಾಗೂ ಕೊಹ್ಲಿ ಪರಸ್ಪರ ಗೌರವವನ್ನು ಇಟ್ಟುಕೊಂಡಿದಾರೆ. ಓರ್ವ ಕ್ರಿಕೆಟಿಗನಾಗಿ ವಿರಾಟ್ ಯಶಸ್ಸನ್ನು ಧೋನಿ ಗೌರವಿಸುತ್ತಾರೆ ಎಂದು ರಾಯ್ ವಿವರಿಸಿದರು.
Comments are closed.