ಹೊಸದಿಲ್ಲಿ: ಡರ್ಬನ್ನಲ್ಲಿ ನಡೆದ ಪ್ರಥಮ ಟೆಸ್ಟ್ ಪಂದ್ಯದಲ್ಲಿ ದಕ್ಷಿಣ ಆಫ್ರಿಕಾ ವಿಕೆಟ್ ಕೀಪರ್ ಬ್ಯಾಟ್ಸ್ಮನ್ ಕ್ವಿಂಟನ್ ಡಿ ಕಾಕ್ ನಡುವಣ ಜಪಾಪಟಿ ಬಗ್ಗೆ ಮೊದಲ ಬಾರಿಗೆ ಆಸ್ಟ್ರೇಲಿಯಾದ ಎಡಗೈ ಆರಂಭಿಕ ಡೇವಿಡ್ ವಾರ್ನರ್ ಪ್ರತಿಕ್ರಿಯಿಸಿದ್ದಾರೆ.
ತಮ್ಮ ಪತ್ನಿ ವಿರುದ್ಧ ಕೆಟ್ಟ ಹಾಗೂ ಅಸಹ್ಯಕರ ಹೇಳಿಕೆ ನೀಡಿರುವುದೇ ತಮ್ಮನ್ನು ಕೆರಳಿಸಿತ್ತು ಎಂದು ವಾರ್ನರ್ ವಿವರಿಸಿದ್ದಾರೆ.
ಚಹಾ ವಿರಾಮಕ್ಕಾಗಿ ಉಭಯ ತಂಡಗಳು ತಮ್ಮ ಡ್ರೆಸಿಂಗ್ ರೂಮ್ಗೆ ಮರಳುವ ವೇಳೆ ಡಿ’ಕಾಕ್ಗೆ ವಾರ್ನರ್ ಡ್ರೆಸಿಂಗ್ ರೂಮ್ನ ಮೆಟ್ಟಿಲುಗಳ ಬಳಿ ಕಾದು ನಿಂತಿದ್ದರು. ಡಿ’ಕಾಕ್ ಅಲ್ಲಿಗೆ ಆಗಮಿಸುತ್ತಲೇ ಅವರ ವಿರುದ್ಧ ವಾರ್ನರ್ ಕೂಗಾಡಲು ಆರಂಭಿಸಿದರು. ಅಲ್ಲದೆ ಡಿ’ಕಾಕ್ ಅವರ ಮೇಲೇರಿ ಹೋಗುವ ರೀತಿಯಲ್ಲಿ ಕೋಪೋದ್ರಿಕ್ತರಾಗಿ ಮುನ್ನುಗ್ಗಿದರು. ಈ ಸಂದರ್ಭದಲ್ಲಿ ಆಸೀಸ್ ತಂಡದ ಸಹ ಆಟಗಾರರು ವಾರ್ನರ್ ಅವರನ್ನು ಸಮಾಧಾನ ಪಡಿಸಿ ತಮ್ಮ ಡ್ರೆಸಿಂಗ್ ರೂಮ್ಗೆ ಕರೆದೊಯ್ದಿದ್ದರು.
ಬಳಿಕ ನೀತಿ ಸಂಹಿತೆಯಂತೆ ಶಿಸ್ತು ಕ್ರಮ ಕೈಗೊಂಡಿರುವ ಅಂತರಾಷ್ಟ್ರೀಯ ಕ್ರಿಕೆಟ್ ಮಂಡಳಿ (ಐಸಿಸಿ) ವಾರ್ನರ್ ಮೇಲೆ ಪಂದ್ಯ ಶುಲ್ಕದ ಶೇಕಡಾ 75ರಷ್ಟು ಹಾಗೂ ಡಿ ಕಾಕ್ ಮೇಲೆ ಶೇಕಡಾ 25ರಷ್ಟು ದಂಡ ವಿಧಿಸಿದೆ.
ವಾರ್ನರ್ ಮೇಲೆ ಮೂರು ಡಿಮೆರಿಟ್ ಅಂಕಗಳನ್ನು ಹೇರಲಾಗಿದೆ. ಅಂದರೆ ಇನ್ನೊಂದು ವರ್ಷದ ಅವಧಿಯಲ್ಲಿ ಮಗದೊಂದು ಡಿಮೆರಿಟ್ ಅಂಕ ಪಡೆದ್ದಲ್ಲಿ ಪಂದ್ಯವೊಂದರ ನಿಷೇಧದ ಭೀತಿ ಎದುರಿಸಲಿದ್ದಾರೆ.
ಅಭಿಮಾನಿಗಳು ಹಾಗೂ ಎದುರಾಳಿ ಆಟಗಾರರ ಟೀಕೆಗಳನ್ನು ಧನಾತ್ಮಕವಾಗಿ ತೆಗೆದುಕೊಳ್ಳುತ್ತೇನೆ. ಆದರೆ ಡಿಕಾಕ್ ಹೇಳಿಕೆ ಹದ್ದು ಮೀರಿತ್ತು ಎಂದು ವಾರ್ನರ್ ಹೇಳಿದ್ದಾರೆ.
ನಾನು ವರ್ತಿಸಿದ ರೀತಿಯ ಬಗ್ಗೆ ನನಗೆ ಖೇದವಿದೆ. ಇದೇ ನಾನಾಗಿದ್ದು, ಭಾವನಾತ್ಮಕವಾಗಿ ಪ್ರತಿಕ್ರಿಯಿಸುತ್ತೇನೆ. ಆದರೆ ನನ್ನ ವರ್ತನೆ ಬಗ್ಗೆ ಖೇದವಿದೆ ಎಂದರು.
ನಾನು ಯಾವತ್ತೂ ನನ್ನ ಕುಟುಂಬಕ್ಕೆ ಅಂಟಿಕೊಂಡಿರುತ್ತೇನೆ. ನನ್ನ ಪತ್ನಿ ಬಗ್ಗೆ ವೈಯಕ್ತಿಕವಾಗಿ ಮಾಡಿರುವ ಕಾಮೆಂಟ್ ಮೀತಿ ಮೀರಿತ್ತು ಎಂದು ಸೇರಿಸಿದರು.
ಕುಟುಂಬ ಅಥವಾ ವರ್ಣಬೇಧದ ಬಗ್ಗೆ ಇಂತಹ ಹೇಳಿಕೆಗಳನ್ನು ನೀಡಿದಾಗ ಪರಿಸ್ಥಿತಿ ಕೈಮೀರಿ ಹೋಗುತ್ತದೆ ಎಂದು ವಿವರಿಸಿದರು.
Comments are closed.