ದುಬೈ: ಹವಾ ಹವಾಯಿ ಖ್ಯಾತಿಯ ನಟಿ ಶ್ರೀದೇವಿ ಅವರು ಹೃದಯಾಘಾತದ ನಂತರ ಆಯತಪ್ಪಿ ಬಾತ್ ಟಬ್ಗೆ ಬಿದ್ದು, ನೀರಿನಲ್ಲಿ ಮುಳುಗಿ ಮೃತಪಟ್ಟಿದ್ದಾರೆ ಎಂದು ಮರಣೋತ್ತರ ಪರೀಕ್ಷೆಯ ವರದಿ ದೃಢ ಪಡಿಸಿದೆ.
ಹೃದಯಾಘಾತದ ನಂತರ ನಟಿ ಬಾತ್ ಟಬ್ನಲ್ಲಿ ಮುಳುಗಿದ್ದು, ರಕ್ತದಲ್ಲಿ ಆಲ್ಕೋಹಾಲ್ ಅಂಶವಿರುವುದನ್ನು ಮರಣೋತ್ತರ ಪರೀಕ್ಷೆ ವರದಿ ದೃಢಪಡಿಸಿದೆ ಎಂದು ಸ್ಥಳೀಯ ಮಾಧ್ಯಮ ಖಲೀಜ್ ಟೈಮ್ಸ್ ವರದಿ ಮಾಡಿದ್ದರೆ, ಆಕಸ್ಮಿಕವಾಗಿ ಬಾತ್ ಟಬ್ನಲ್ಲಿ ಬಿದ್ದು ಶ್ರೀದೇವಿ ಮೃತಪಟ್ಟಿದ್ದಾರೆ ಎಂದು ಗಲ್ಫ್ ನ್ಯೂಸ್ ವರದಿ ಮಾಡಿದೆ.
ಮದುವೆ ಸಮಾರಂಭದಲ್ಲಿ ಶನಿವಾರ ರಾತ್ರಿ ಆಯೋಜಿಸಿದ್ದ ವಿಶೇಷ ಔತಣಕೂಟದ ಮಧ್ಯೆ ಶ್ರೀದೇವಿ ವಾಶ್ ರೂಂ ಬಳಸಲು ತಾವು ನೆಲೆಸಿದ್ದ ಕೊಠಡಿಗೆ ತೆರಳಿದ್ದರು. ಆ ಸಂದರ್ಭದಲ್ಲಿ ಪಾನಮತ್ತರೂ ಆಗಿದ್ದ ಅವರು ಕೆಲ ಸಮಯದ ನಂತರ ಮೃತಪಟ್ಟಿರುವುದು ಪತಿ ಬೋನಿ ಕಪೂರ್ ಗಮನಕ್ಕೆ ಬಂದಿತ್ತು.
ಶ್ರೀದೇವಿಯವರದ್ದು ಅಸಹಜ ಸಾವಾಗಿದ್ದು, ಅನುಮಾನಕ್ಕೆ ಎಡೆಮಾಡಿಕೊಟ್ಟಿರುವುದರಿಂದ ಈಗಾಗಲೇ ಶ್ರೀದೇವಿ ಅವರ ಫೋನಿನ ಕರೆಗಳನ್ನು ತನಿಖೆ ನಡೆಸಲಾಗುತ್ತಿದೆ. ಈ ಬೆಳವಣಿಗೆಯಿಂದಾಗಿ ಅವರ ಮೃತದೇಹವನ್ನು ಇಂದು ಕೂಡ ಭಾರತಕ್ಕೆ ತರುವುದು ಅನಿಶ್ಚಿತ ಎನ್ನಲಾಗಿದೆ.
Comments are closed.