ಏಕದಿನದಲ್ಲಿ 5 ವಿಕೆಟ್ ಕಬಳಿಸಿದ ಅತಿ ಕಿರಿಯ ಬೌಲರ್

ಹೊಸದಿಲ್ಲಿ: ಅಪಘಾನಿಸ್ತಾನದ ಯುವ ಸ್ಪಿನ್ನರ್ ಮುಜೀಬ್ ಜಾಡ್ರನ್ ಏಕದಿನದಲ್ಲಿ ಐದು ವಿಕೆಟುಗಳನ್ನು ಕಬಳಿಸಿದ ವಿಶ್ವದ ಅತಿ ಕಿರಿಯ ಬೌಲರ್ ಎಂಬ ದಾಖಲೆಗೆ ಪಾತ್ರವಾಗಿದ್ದಾರೆ.

ಜಿಂಬಾಬ್ವೆ ವಿರುದ್ಧದ ಏಕದಿನ ಪಂದ್ಯದಲ್ಲಿ ಮುಜೀಬ್ ಈ ಸಾಧನೆಯನ್ನು ಬರೆದಿದ್ದಾರೆ. ಮುಜೀಬ್‌ಗೆ ಈಗ ವಯಸ್ಸು 16 ವರ್ಷ ಹಾಗೂ 325 ದಿನಗಳು.

ಈ ಮೂಲಕ ಪಾಕಿಸ್ತಾನದ ಮಾಜಿ ದಿಗ್ಗಜ ವಕಾರ್ ಯೂನಿಸ್ ಅವರ ದಾಖಲೆಯನ್ನು ಅಳಿಸಿ ಹಾಕಿದ್ದಾರೆ. ವಕಾರ್ ಅವರು 18 ವರ್ಷ 164ನೇ ದಿನದಲ್ಲಿ ಐದರ ಗೊಂಚಲನ್ನು ಪಡೆದಿದ್ದರು.

ಮುಜೀಬ್ ದಾಳಿಗೆ ಉದುರಿದ ಜಿಂಬಾಬ್ವೆ 38 ಓವರ್‌ಗಲ್ಲೇ 134 ರನ್‌ಗಳಿಗೆ ಸರ್ವಪತನವನ್ನು ಕಂಡಿತ್ತು. ಮುಜೀಬ್ ತಮ್ಮ 10 ಓವರ್‌ಗಳ ಕೋಟಾದಲ್ಲಿ 50 ರನ್ ನೀಡಿ ಐದು ವಿಕೆಟುಗಳನ್ನು ಕಬಳಿಸಿದ್ದರು.

ಬಳಿಕ ರನ್ ಬೆನ್ನತ್ತಿದ ಅಪಘಾನಿಸ್ತಾನ 21.1 ಓವರ್‌ಗಳಲ್ಲಿ ಯಾವುದೇ ವಿಕೆಟ್ ನಷ್ಟವಿಲ್ಲದೆ ಗೆಲುವು ದಾಖಲಿಸಿತ್ತು. ಆರಂಭಿಕರಾದ ಮೊಹಮ್ಮದ್ ಶೆಹ್ಜಾದ್ (75*) ಹಾಗೂ ಇಹಂಸುಲ್ಲಾ ಜನತ್ (51*) ಅಜೇಯ ಅರ್ಧಶತಕಗಳನ್ನು ಬಾರಿಸಿದ್ದರು.

ಈ ಮೂಲಕ ಐದು ಪಂದ್ಯಗಳ ಏಕದಿನ ಸರಣಿಯನ್ನು ಇನ್ನು ಒಂದು ಪಂದ್ಯ ಬಾಕಿ ಉಳಿದಿರುವಂತೆಯೇ 3-1ರ ಅಂತರದಿಂದ ವಶಪಡಿಸಿಕೊಂಡಿದೆ.

ಇದಕ್ಕೂ ಮೊದಲು ಇಂಡಿಯನ್ ಪ್ರೀಮಿಯರ್ ಲೀಗ್ (ಐಪಿಎಲ್) ಹರಾಜಿನಲ್ಲಿ ಮುಜೀಬ್ ಅವರನ್ನು ಬರೋಬ್ಬರಿ 4 ಕೋಟಿ ರೂಗಳನ್ನು ನೀಡಿ ಕಿಂಗ್ಸ್ ಇಲೆವೆನ್ ಪಂಜಾಬ್ ಫ್ರಾಂಚೈಸಿ ಖರೀದಿಸಿತ್ತು.

ನಿಮಗಿದು ಗೊತ್ತೇ?
ಮುಜೀಬ್ ಜಾಡ್ರನ್ ಅವರು 21ನೇ ಶತಮಾನದಲ್ಲಿ ಹುಟ್ಟಿ ಅಂತರಾಷ್ಟ್ರೀಯ ಕ್ರಿಕೆಟ್ ಆಡಿದ ಮೊದಲ ಪುರುಷ ಕ್ರಿಕೆಟಿಗ ಎಂಬ ದಾಖಲೆಗೂ ಪಾತ್ರವಾಗಿದ್ದರು. 2001 ಮಾರ್ಚ್ 28ರಂದು ಮುಜೀಬ್ ಹುಟ್ಟಿದ್ದರು.

ಹಾಗೆಯೇ 2017ರಲ್ಲಿ ತಮ್ಮ ಚೊಚ್ಚಲ ಅಂತರಾಷ್ಟ್ರೀಯ ಪಂದ್ಯದಲ್ಲೇ ಕೆನಡಾ ವಿರುದ್ಧ ನಾಲ್ಕು ವಿಕೆಟುಗಳನ್ನು ಕಬಳಿಸಿದ್ದರು.