ಹೊಸದಿಲ್ಲಿ: 1877 ರಿಂದ ಶುರುವಾದ ಕ್ರಿಕೆಟ್ ಎಂಬ ಜಾದೂಲೋಕದಲ್ಲಿ ಇದುವರೆಗೂ ಎಷ್ಟೋ ಮಂದಿ ಬದುಕು ರೂಪಿಸಿಕೊಂಡಿದ್ದಾರೆ. ಹಲವರು ನಮ್ಮನ್ನು ರಂಜಿಸಿ ಮರೆಯಾಗಿದ್ದಾರೆ. ಕೆಲವರು ನಿವೃತ್ತಿಯಿಂದ ದೂರ ಸರಿದಿದ್ದಾರೆ. ಆದರೆ, ಕೆಲವು ಕ್ರಿಕೆಟ್ ಕುಟುಂಬದ ಕುಡಿಗಳು ಅಪ್ಪ ಹಾಕಿಕೊಟ್ಟ ಹಾದಿಯಲ್ಲಿ ಸಾಗಿ ತಮ್ಮ ಕನಸನ್ನು ನನಸು ಮಾಡಿಕೊಳ್ಳುತ್ತಿರುವುದಲ್ಲದೇ ಮತ್ತೆ ಕ್ರಿಕೆಟ್ ಪರಂಪರೆಯನ್ನು ನೆನಪು ಮಾಡುತ್ತಿದ್ದಾರೆ.
ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಆಡಲು ಕಠಿಣ ಪರಿಶ್ರಮ ಪಡುತ್ತಿರುವ ಕ್ರಿಕೆಟ್ ದಿಗ್ಗಜರ ಕುಡಿಗಳ ಬಗ್ಗೆ ಒಂದಿಷ್ಟು ಮಾಹಿತಿ ಇಲ್ಲಿದೆ.
ಸಚಿನ್ ಮತ್ತು ಅರ್ಜುನ್
ಈ ಸಾಲಲ್ಲಿ ಮೊದಲಿಗೆ ನಿಲ್ಲುವುದು ಕ್ರಿಕೆಟ್ ದೇವರೆಂದು ಖ್ಯಾತಿಯಾಗಿರುವ ಸಚಿನ್ ತೆಂಡೂಲ್ಕರ್. 24 ವರ್ಷಗಳಿಂದ ಭಾರತವನ್ನು ಪ್ರತಿನಿಧಿಸಿದ ಇವರು ಮಾಡದ ದಾಖಲೆಗಳೇ ಇಲ್ಲ. ಇವರ ಹಾದಿಯಲ್ಲೇ ಸಾಗಿರುವ ಮಗ ಅರ್ಜುನ್ ತೆಂಡೂಲ್ಕರ್ ಅಪ್ಪನನ್ನೆ ಮೀರಿಸಲಿದ್ದಾರೆ. ಆಲ್ರೌಂಡರ್ ಆಗಿರುವ ಅರ್ಜುನ್ ದೇಶಿ ಪಂದ್ಯಾವಳಿಯಲ್ಲಿ ಮಿಂಚುತ್ತಿದ್ದಾರೆ.
ರಾಹುಲ್ ಮತ್ತು ಸಮಿತ್
ಭಾರತದ ಮಾಜಿ ನಾಯಕ ಹಾಗೂ ವಾಲ್ ಖ್ಯಾತಿಯ ರಾಹುಲ್ ಡ್ರಾವಿಡ್ ಅವರ ಮಗ ಸಮಿತ್ ಕೂಡ ಅಪ್ಪನಂತೆ ಉತ್ತಮ ಕ್ರಿಕೆಟಿಗನಾಗಲೂ ಪರಿಶ್ರಮ ಪಡುತ್ತಿದ್ದಾರೆ. ಕರ್ನಾಟಕ ರಾಜ್ಯ ಕ್ರಿಕೆಟ್ ಸಂಸ್ಥೆ ಪರವಾಗಿ ಆಡುತ್ತಿರುವ ಸಮಿತ್ 14 ವರ್ಷದೊಳಗಿನ ಟೂರ್ನಮೆಂಟ್ಗಳಲ್ಲಿ ಭಾಗವಹಿಸಿ ಯಶಸ್ವಿಯಾಗಿದ್ದಾರೆ.
ಡರೇನ್ ಲೆಹಮನ್ ಮತ್ತು ಜೇಕ್
ಆಸ್ಟ್ರೇಲಿಯಾದ ಮಾಜಿ ಕ್ರಿಕೆಟಿಗ ಹಾಗೂ ಪ್ರಸ್ತುತ ತಂಡದ ಕೋಚ್ ಆಗಿರುವ ಡರೇನ್ ಲೆಹಮನ್ ಅವರ 24 ವರ್ಷದ ಮಗ ಜೇಕ್ ಕೂಡ ಅಂತಾರಾಷ್ಟ್ರೀಯ ಪಂದ್ಯದಲ್ಲಿ ಪದಾರ್ಪಣೆ ಮಾಡಲು ಸತತ ತಯಾರಿ ನಡೆಸುತ್ತಿದ್ದಾರೆ. ಈಗಾಗಲೇ ಹಲವು ದೇಶಿ ಪಂದ್ಯಾವಳಿಯಲ್ಲಿ ಗಮನಾರ್ಹ ಪ್ರದರ್ಶನ ನೀಡಿ ಕ್ರಿಕೆಟ್ ದಿಗ್ಗಜರ ಗಮನ ಸೆಳೆದಿದ್ದಾರೆ.
ಮಖಾಯ ಎನ್ಟಿನಿ ಮತ್ತು ಥಂಢೊ ಎನ್ಟಿನಿ
ದಕ್ಷಿಣ ಆಫ್ರಿಕಾದ ವೇಗದ ಬೌಲರ್ ಆಗಿ ಮಿಂಚಿದ ಮಖಾಯ ಎನ್ಟಿನಿ ರೀತಿಯಲ್ಲೇ ಅವರ ಮಗ ಥಂಢೊ ಎನ್ಟಿನಿ ಕೂಡ ವೇಗದ ಬೌಲರ್ ಆಗಲು ಹೊರಟಿದ್ದು, ಅಪ್ಪನ ಮಾರ್ಗದರ್ಶನ ಪಡೆದಿದ್ದಾರೆ. ಅಲ್ಲದೆ, ಮುಂದಿನ ತಿಂಗಳು ನ್ಯೂಜಿಲೆಂಡ್ನಲ್ಲಿ ನಡೆಯಲಿರುವ 19 ವರ್ಷದೊಳಗಿನ ವಿಶ್ವಕಪ್ ಟೂರ್ನಿಗೆ ದಕ್ಷಿಣ ಆಫ್ರಿಕಾ ತಂಡದಲ್ಲಿ ಸ್ಥಾನ ಪಡೆದಿದ್ದಾರೆ.
ಸ್ವೀವ್ ವಾಗ್ ಮತ್ತು ಆಸ್ಟಿನ್
ಆಸ್ಟ್ರೇಲಿಯಾದ ಸ್ಟಾರ್ ಆಟಗಾರ ಸ್ವೀವ್ ವಾಗ್ 90ರ ದಶಕದಲ್ಲಿ ತಂಡದ ಪರ ಉತ್ತಮ ಪ್ರದರ್ಶನ ನೀಡಿ ಹಲವು ಜಯವನ್ನು ತಂದುಕೊಟ್ಟಿದ್ದರು. ಅವರ ದಾರಿಯಲ್ಲೇ ಮಗ ಆಸ್ಟಿನ್ ಸಾಗುತ್ತಿದ್ದು, ಆಲ್ರೌಂಡರ್ ಆಗಿರುವ ಆಸ್ಟಿನ್ ಕೂಡ 19 ವರ್ಷದೊಳಗಿನ ವಿಶ್ವಕಪ್ ಟೂರ್ನಿಗೆ ಆಸ್ಟ್ರೇಲಿಯಾ ತಂಡವನ್ನು ಪ್ರತಿನಿಧಿಸಲಿದ್ದಾರೆ.
ಚಂದ್ರಪಾಲ್ ಮತ್ತು ಟ್ಯಾಗೆನರೀನ್
ಮೂಲ ಭಾರತೀಯನಾಗಿ ವೆಸ್ಟ್ ಇಂಡೀಸ್ ತಂಡವನ್ನು ಪ್ರತಿನಿಧಿಸುತ್ತಿದ್ದ ಶಿವನಾರಾಯಣ್ ಚಂದ್ರಪಾಲ್ ಇಂಡೀಸ್ ಪಾಲಿಗೆ ಅದ್ಭುತ ಆಟಗಾರ. ನಾಯಕನಾಗಿ ಹಲವು ಗೆಲುವನ್ನು ತಂದುಕೊಟ್ಟಿದ್ದಾರೆ. ಇದೀಗ ಅವರ ಹೆಜ್ಜೆಯಲ್ಲಿ ಸಾಗುತ್ತಿರುವ ಮಗ ಟ್ಯಾಗೆನರೀನ್ 19 ವರ್ಷದೊಳಗಿನ ವಿಶ್ವಕಪ್ ಟೂರ್ನಿಗೆ ಆಯ್ಕೆಯಾಗಿದ್ದಾರೆ.
ಸುನೀಲ್ ಜೋಶಿ ಮತ್ತು ಆರ್ಯನ್ ಜೋಶಿ
ಭಾರತದ ಮಾಜಿ ಸ್ಪಿನ್ನರ್ ಸುನೀಲ್ ಜೋಶಿ ಅವರ ಮಗ ಆರ್ಯನ್ ಜೋಶಿ ಕೂಡ ದೇಶಿ ಪಂದ್ಯಾವಳಿಯಲ್ಲಿ ಉತ್ತಮ ಪ್ರದರ್ಶನ ನೀಡುತ್ತಿದ್ದಾರೆ. ರಾಹುಲ್ ಡ್ರಾವಿಡ್ ಹಾಗೂ ಸುನೀಲ್ ಜೋಶಿ ಭಾರತ ತಂಡವನ್ನು ಪ್ರತಿನಿಧಿಸಿದ್ದು ವಿಶೇಷವಾದರೆ, ಇತ್ತ ಸಮಿತ್ ಹಾಗೂ ಆರ್ಯನ್ ಜೋಶಿ ಕೂಡ ಕರ್ನಾಟಕ ರಾಜ್ಯ ಕ್ರಿಕೆಟ್ ಸಂಸ್ಥೆಯನ್ನು ಪ್ರತಿನಿಧಿಸುತ್ತಿರುವ ವಿಶೇಷವಾಗಿದೆ.
Comments are closed.