ಕೋಹ್ಲಿಗೆ ತಕ್ಕ ಉತ್ತರ ನೀಡಿದ ಆಮೀರ್

ಹೊಸದಿಲ್ಲಿ: ಭಾರತ ಕ್ರಿಕೆಟ್ ತಂಡದ ನಾಯಕ ವಿರಾಟ್ ಕೋಹ್ಲಿ ಶ್ಲಾಘನೆಯಿಂದ ಪುಳಕಿತಗೊಂಡಿರುವ ಪಾಕಿಸ್ತಾನ ಎಡಗೈ ವೇಗಿ ಮೊಹಮ್ಮದ್ ಆಮೀರ್ ಪ್ರತಿಕ್ರಿಯೆ ನೀಡಿದ್ದಾರೆ.

ಇತ್ತೀಚೆಗಷ್ಟೇ ಬಾಲಿವುಡ್ ನಟ ಆಮೀರ್ ಖಾನ್ ನಡೆಸಿದ ಸಂದರ್ಶನದಲ್ಲಿ ಮೊಹಮ್ಮದ್ ಆಮೀರ್ ತಾವು ಎದುರಿಸಿದರ ಪೈಕಿ ಅತ್ಯಂತ ಕಠಿಣ ಬೌಲರ್ ಎಂದು ಕೋಹ್ಲಿ ಹೊಗಳಿಕೆಯ ಮಾತುಗಳನ್ನಾಡಿದ್ದರು.

ಕೋಹ್ಲಿ ಪ್ರಶಂಸೆಯಿಂದ ಅತ್ಯಂತ ಖುಷಿಯಾಗುತ್ತಿದೆ ಎಂದು ಆಮೀರ್ ಅಭಿಪ್ರಾಯಪಟ್ಟಿದ್ದಾರೆ. ಐಸಿಸಿ ವಿಶ್ವ ಟ್ವೆಂಟಿ-20 ಟೂರ್ನಿಯ ಸಂದರ್ಭದಲ್ಲಿ ನನಗೆ ಬ್ಯಾಟ್ ಕೊಡುಗೆಯಾಗಿ ನೀಡಿರುವುದು ಸ್ಮರಣೀಯ ಕ್ಷಣ ಎಂದು ಕೋಹ್ಲಿ ಜತೆಗಿನ ಬಾಂಧವ್ಯವನ್ನು ನೆನಪಿಸಿಕೊಂಡರು.

ಕೋಹ್ಲಿ ಶ್ರೇಷ್ಠ ಎಂಬುದು ಜಗತ್ತಿಗೆ ಗೊತ್ತು. ಅವರ ವಿರುದ್ಧ ನಿಮ್ಮ ಸರ್ವಶ್ರೇಷ್ಠ ಪ್ರದರ್ಶನ ನೀಡಬೇಕಾಗುತ್ತದೆ. ಅವರಿಗೆ ಅವಕಾಶವನ್ನು ನೀಡಿದರೆ ತಕ್ಷಣವೇ ಪಂದ್ಯವನ್ನು ನಿಮ್ಮಿಂದ ಕಸಿದುಕೊಳ್ಳುತ್ತಾರೆ ಎಂದವರು ಸೇರಿಸಿದರು.

ಪ್ರತಿ ಬಾರಿಯೂ ಕೋಹ್ಲಿ ವಿರುದ್ಧ ಬೌಲ್ ಮಾಡುವಾಗ ಆದಷ್ಟು ಬೇಗನೇ ಅವರನ್ನು ಔಟ್ ಮಾಡುವುದು ನನ್ನ ಗುರಿಯಾಗಿರುತ್ತದೆ. ಚೇಸಿಂಗ್ ವೇಳೆ ಅವರ ಸ್ಟ್ರೇಕ್ ರೇಟ್ ಮತ್ತು ಸರಾಸರಿಯು ವಿಶ್ವದ ಯಾವುದೇ ಬೌಲರ್‌ಗೆ ಸವಾಲಿನ ವಿಷಯವಾಗಿದೆ ಎಂದರು.

ಮಾತು ಮುಂದುವರಿಸಿದ ಆಮೀರ್, ಕೋಹ್ಲಿ ವಿರುದ್ಧ ಉತ್ತಮವಾಗಿ ದಾಳಿ ಮಾಡಿದರೆ ಮಾತ್ರ ನೀವು ಅತ್ಯುತ್ತಮ ಬೌಲರ್ ಆಗಿ ಮೂಡಿಬರಲು ಸಾಧ್ಯ ಎಂದರು.

ಮ್ಯಾಚ್ ಫಿಕ್ಸಿಂಗ್‌ನಿಂದಾಗಿ ಐದು ವರ್ಷಗಳ ನಿಷೇಧದ ಬಳಿಕ ಅಂತರಾಷ್ಟ್ರೀಯ ಕ್ರಿಕೆಟ್‌ಗೆ ಮರಳಿದಾಗ ಆಮೀರ್ ಅವರನ್ನು ಕೋಹ್ಲಿ ಬೆಂಬಲಿಸಿದ್ದರು. ಅಲ್ಲಿಂದ ಬಳಿಕ ಕ್ರಿಕೆಟ್ ಮೈದಾನದಲ್ಲಿ ಭಾರಿ ಪೈಪೋಟಿ ಎದುರಾಗಿದ್ದರೂ ಮೈದಾನ ಹೊರಗಡೆ ಉತ್ತಮ ಬಾಂಧವ್ಯವನ್ನು ಕಾಪಾಡಿಕೊಂಡಿದ್ದರು.