ಕೆಲವೇ ದಿನಗಳ ಹಿಂದೆ ನಟ ನವಾಜುದ್ದೀನ್‌ ಸಿದ್ದಿಕಿಗೆ ಅವರ ಹೆಂಡತಿ ಆಲಿಯಾ ಅವರು ವಿಚ್ಛೇದನ ಕೋರಿ ನೋಟಿಸ್‌ ಕಳಿಸಿದ್ದಾರೆ ಎಂಬ ಸುದ್ದಿ ಬಹಿರಂಗಗೊಂಡಿತು. ಅದರ ಬೆನ್ನಲ್ಲೇ ಆಲಿಯಾ ವಿರುದ್ಧ ಕೆಲವು ಆರೋಪಗಳನ್ನು ಹೊರಿಸಲಾಯಿತು. ಅವರಿಗೆ ಪರಪುರುಷನೊಬ್ಬನ ಜೊತೆ ಸಂಬಂಧ ಇತ್ತು ಎಂಬ ಸುದ್ದಿ ಕೂಡ ಕೇಳಿಬಂತು. ಆ ಆರೋಪಗಳನ್ನು ಆಲಿಯಾ ಇತ್ತೀಚೆಗೆ ತಳ್ಳಿ ಹಾಕಿದ್ದರು.
ನವಾಜುದ್ದೀನ್‌ ಮತ್ತು ಆಲಿಯಾ ನಡುವಿನ ಜಗಳ ದಿನಕ್ಕೊಂದು ತಿರುವು ಪಡೆದುಕೊಳ್ಳುತ್ತಿದೆ. ಮುಂಬೈನಲ್ಲಿನ 30 ಕೋಟಿ ರೂ. ಬೆಲೆ ಬಾಳುವ ಫ್ಲಾಟ್‌ಗಾಗಿ ಅವರು ಈ ವಿಚ್ಛೇದನದ ಬೇಡಿಕೆ ಇಟ್ಟಿದ್ದಾರೆ ಎಂಬ ಗಾಸಿಪ್‌ ಹರಡಿದೆ. ಅಲ್ಲದೆ, ಜೀವನಾಂಶಕ್ಕಾಗಿ 20 ಕೋಟಿ ರೂ. ಹಣವನ್ನು ಕೇಳುತ್ತಿದ್ದಾರೆ ಎನ್ನಲಾಗುತ್ತಿದೆ. ಒಟ್ಟು 50 ಕೋಟಿ ರೂ. ಮೇಲೆ ಅವರು ಕಣ್ಣಿಟ್ಟಿದ್ದಾರೆ ಎಂಬ ಮಾತು ಕೇಳಿಬಂದಿದೆ. ಅದಕ್ಕೆಲ್ಲ ಆಲಿಯಾ ಈಗ ಉತ್ತರ ನೀಡಿದ್ದಾರೆ.
ಹೀಗೆ ಸಾಲು ಸಾಲು ಆರೋಪಗಳು ಕೇಳಿಬಂದ ಹಿನ್ನೆಲೆಯಲ್ಲಿ ಆಲಿಯಾ ಟ್ವಿಟರ್‌ ಮೂಲಕ ಸ್ಪಷ್ಟನೆ ನೀಡಿದ್ದಾರೆ. ‘ಇಂಥ ವಿಚಾರಗಳ ಸಲುವಾಗಿ ನನ್ನ ವಕೀಲರಿಗೆ ಮಾಧ್ಯಮದವರ ಕಡೆಯಿಂದ ಫೋನ್‌ ಕರೆಗಳು ಬರುತ್ತಿವೆ. ಇದಕ್ಕೆಲ್ಲ ಸಾಕ್ಷಿ ಇದೆ ಎಂಬುದಾಗಿಯೂ ಕೆಲವರು ಹೇಳುತ್ತಿದ್ದಾರೆ. ಅದೆಲ್ಲವೂ ಶುದ್ಧ ಸುಳ್ಳ. ಅವರ ಬಳಿ ಏನೇ ಸಾಕ್ಷಿ ಇದ್ದರೂ ಅದು ನಿಜವಲ್ಲ. ಯಾರದ್ದೋ ಕುತಂತ್ರ ಇದು. ಈಗ ಎಲ್ಲವೂ ಬಯಲಾಗಲಿದೆ’ ಎಂದು ಆಲಿಯಾ ಹೇಳಿದ್ದಾರೆ.
2009ರಲ್ಲಿ ನವಾಜುದ್ದೀನ್‌ ಮತ್ತು ಆಲಿಯಾ ಬಾಳಬಂಧನಕ್ಕೆ ಒಳಗಾಗಿದ್ದರು. ಅವರಿಗೆ ಇಬ್ಬರು ಮಕ್ಕಳಿದ್ದಾರೆ. ಈ ದಂಪತಿ ನಡುವೆ ವೈಮನಸ್ಸು ಮೂಡಲು ನವಾಜುದ್ದೀನ್‌ ಸಹೋದರ ಶಮಾಸ್‌ ಸಿದ್ದಿಕಿ ಕೂಡ ಕಾರಣ ಎಂದು ಹೇಳಲಾಗುತ್ತಿದೆ. ‘ನಾನಾಗಿಯೇ ನೇರವಾಗಿ ಒಪ್ಪಿಕೊಳ್ಳುವವರೆಗೂ ಅಥವಾ ತಳ್ಳಿಹಾಕುವವರೆಗೂ ನನ್ನ ಮೇಲೆ ಬರುವ ಯಾವ ಆರೋಪಕ್ಕೂ ಜನರು ಕಿವಿಗೊಡುವುದು ಉತ್ತಮವಲ್ಲ’ ಎಂದು ಆಲಿಯಾ ಟ್ವೀಟ್‌ ಮಾಡಿದ್ದಾರೆ. ಕೆಲವು ಸತ್ಯಗಳನ್ನು ಬಯಲಿಗೆ ಎಳೆಯುವ ಸಲುವಾಗಿಯೇ ತಾವು ಟ್ವಿಟರ್‌ ಖಾತೆ ತೆರೆದಿರುವುದಾಗಿ ಅವರು ತಿಳಿಸಿದ್ದಾರೆ.
Comments are closed.