ಮನೋರಂಜನೆ

20ಕ್ಕೂ ಹೆಚ್ಚು ಧಾರಾವಾಹಿಗಳು ಪ್ರಸಾರ ನಿಲ್ಲಿಸಲಿವೆ!

Pinterest LinkedIn Tumblr


ಕೊರೊನಾ ಬರೀ ಆರೋಗ್ಯಕ್ಕೆ ತೊಂದರೆ ಕೊಟ್ಟಿಲ್ಲ, ಬದಲಿಗೆ ಜೀವನಕ್ಕೆ ದೊಡ್ಡ ಹೊಡೆತ ಕೊಟ್ಟಿದ್ದು ಸಾಕಷ್ಟು ಜನ ಈ ಸಂದರ್ಭದಲ್ಲಿಉದ್ಯೋಗ ಕಳೆದುಕೊಳ್ಳುತ್ತಿದ್ದಾರೆ. ಕಿರುತೆರೆ ಧಾರಾವಾಹಿ ಉದ್ಯಮದ ಉದ್ಯೋಗಿಗಳೂ ಈ ಸಾಲಿಗೆ ಸೇರಿದ್ದಾರೆ. ಇದೊಂದು ಆತಂಕಕಾರಿ ಸಂಗತಿ ಎನ್ನುವ ಅಭಿಪ್ರಾಯ ಟಿವಿ ಉದ್ಯಮದಲ್ಲಿಕೇಳಿ ಬರುತ್ತಿದೆ.

ಕಳೆದ ವಾರವಷ್ಟೇ ನಾಲ್ಕು ಸೀರಿಯಲ್‌ಗಳು ಸ್ಥಗಿತಗೊಳ್ಳಲಿವೆ ಎನ್ನಲಾಗಿತ್ತು. ಈಗ ಅದರ ಜತೆಗೆ 20ಕ್ಕೂ ಹೆಚ್ಚಿನ ಧಾರಾವಾಹಿಗಳನ್ನು ಬೇರೆ ಬೇರೆ ಕಾರಣಗಳಿಂದ ನಿಲ್ಲಿಸಲಾಗುತ್ತದೆ ಎಂಬ ಸುದ್ದಿ ಹಬ್ಬಿದೆ. ‘ನನಗೆ ಬಂದಿರುವ ಮಾಹಿತಿ ಪ್ರಕಾರ ಕೆಲ ಸೀರಿಯಲ್‌ಗಳನ್ನು ನಿಲ್ಲಿಸಲಾಗುತ್ತಿದೆ. ಇದರಿಂದ ಸುಮಾರು 2 ಸಾವಿರ ಮಂದಿ ನೇರವಾಗಿ ಕೆಲಸ ಕಳೆದುಕೊಳ್ಳಲಿದ್ದಾರೆ. ಇದು ಬೇಸರದ ಸಂಗತಿ. ಈ ಬಗ್ಗೆ ನಾನು ನಮ್ಮ ಅಸೋಸಿಯೇಶನ್‌ ವತಿಯಿಂದ ಎಲ್ಲ ನಿರ್ಮಾಪಕರು ಮತ್ತು ಚಾನೆಲ್‌ನ ಮುಖ್ಯಸ್ಥರನ್ನು ಕರೆದು ಮನವಿ ಮಾಡಿದ್ದೇನೆ’ ಎಂದು ಟೆಲಿವಿಷನ್‌ ಅಸೋಸಿಯೇಷನ್‌ ಅಧ್ಯಕ್ಷ ಶಿವಕುಮಾರ್‌ ಹೇಳಿದ್ದಾರೆ.

ಕಾರಣವೇನು?
ಎರಡು ತಿಂಗಳಿನಿಂದ ಹೊಸ ಎಪಿಸೋಡ್‌ಗಳು ಪ್ರಸಾರವಾಗಿಲ್ಲ. ಇದರಿಂದ ಜನರಿಗೆ ಕಥೆ ಕನೆಕ್ಟ್ ಮಾಡುವುದು ಕಷ್ಟ. ಜನರಿಗೆ ಕಥೆಯನ್ನು ನೆನಪಿಸುವುದಕ್ಕಿಂತ ಅವುಗಳನ್ನು ನಿಲ್ಲಿಸುವುದೇ ಉತ್ತಮ ಎನ್ನುವ ನಿರ್ಧಾರಕ್ಕೆ ವಾಹಿನಿಗಳು ಬಂದಿವೆ. ಒಂದು ವಾಹಿನಿಯಲ್ಲಿ ಹತ್ತು ಸೀರಿಯಲ್‌ಗಳು ಪ್ರಸಾರವಾಗುತ್ತಿದ್ದರೆ ಅದರಲ್ಲಿಆರನ್ನು ನಿಲ್ಲಿಸಿ ನಾಲ್ಕನ್ನು ಮುಂದುವರಿಸುವುದು. ಆ ಆರರ ಜಾಗಕ್ಕೆ ಡಬ್ಬಿಂಗ್‌ ಸೀರಿಯಲ್‌ಗಳು ಅಥವಾ ಸಿನಿಮಾಗಳನ್ನು ಹಾಕುವುದು ಚಾನೆಲ್‌ಗಳ ಯೋಚನೆ ಎನ್ನುತ್ತಾರೆ ಹೆಸರು ಹೇಳಲು ಇಚ್ಛಿಸದ ಸೀರಿಯಲ್‌ ನಿರ್ಮಾಪಕರು.

ಸದ್ಯ ಲಾಕ್‌ಡೌನ್‌ ಹಿನ್ನೆಲೆಯಲ್ಲಿಜಾಹೀರಾತುಗಳು ಸಿಗದೇ ಇರುವುದು ಸಹ ಸೀರಿಯಲ್‌ಗಳನ್ನು ನಿಲ್ಲಿಸಲು ಒಂದು ಕಾರಣವಂತೆ. ಗುರುವಾರವಷ್ಟೇ ‘ಸುಬ್ಬಲಕ್ಷ್ಮಿ ಸಂಸಾರ’ ಸೀರಿಯಲ್‌ ಅನ್ನು ನಿಲ್ಲಿಸಲಾಗುವುದು ಎಂದು ನಿರ್ಮಾಪಕಿ ಸ್ವಪ್ನ ಕೃಷ್ಣಾ ಫೇಸ್‌ ಬುಕ್‌ನಲ್ಲಿ ಹೇಳಿಕೊಂಡಿದ್ದರು. ಜತೆಗೆ ವಾಹಿನಿಯೊಂದು ತನ್ನಲ್ಲಿ ಪ್ರಸಾರವಾಗುತ್ತಿದ್ದ ಎಲ್ಲ ಹೊಸ ಕಂಟೆಂಟ್‌ಗಳ ಪ್ರಸಾರ ನಿಲ್ಲಿಸಿ, ಹಳೆಯ ಕಂಟೆಂಟ್‌ಗಳನ್ನು ಮಾತ್ರ ಪ್ರಸಾರ ಮಾಡಲು ತೀರ್ಮಾನ ಮಾಡಿದೆ.

ಮೇ 25ರಿಂದ ಚಿತ್ರೀಕರಣ
ಇದೆಲ್ಲದರ ನಡುವೆ ಮೇ 25ರಿಂದ ಸೀರಿಯಲ್‌ಗಳ ಚಿತ್ರೀಕರಣ ಆರಂಭವಾಗಲಿದೆ. ‘ಇದಕ್ಕೆ ಸಂಬಂಧಪಟ್ಟಂತೆ ಕೆಟಿವಿ ವತಿಯಿಂದ ಎಲ್ಲ ನಿರ್ಮಾಪಕರು ಮತ್ತು ಚಾನೆಲ್‌ನ ಮುಖ್ಯಸ್ಥರನ್ನು ಕರೆದು ಸಭೆ ನಡೆಸಲಾಗಿದೆ. ಚಿತ್ರೀಕರಣಕ್ಕೂ ಮುನ್ನ ಯಾವ್ಯಾವ ಮುಂಜಾಗ್ರತಾ ಕ್ರಮಗಳನ್ನು ತೆಗೆದುಕೊಳ್ಳಬೇಕು ಎಂಬುದನ್ನು ಎಲ್ಲರಿಗೂ ಹೇಳಲಾಗಿದೆ’ ಎಂದು ಮಾಹಿತಿ ನೀಡಿದ್ದಾರೆ ಕೆಟಿವಿ ಅಧ್ಯಕ್ಷ ಶಿವಕುಮಾರ್‌.

Comments are closed.