‘ರಾಜಕುಮಾರ’ ಜೋಡಿ ಪವರ್ ಸ್ಟಾರ್ ಪುನೀತ್ ರಾಜ್ಕುಮಾರ್ ಹಾಗೂ ಸಂತೋಷ್ ಆನಂದ್ರಾಮ್ ಅವರ ‘ಯುವರತ್ನ’ ಚಿತ್ರ ನಾನಾ ಕಾರಣಗಳಿಂದ ಸಖತ್ ಸೌಂಡ್ ಮಾಡುತ್ತಿದೆ. ಕಳೆದ ಒಂದು ತಿಂಗಳಿಂದ ಚಿತ್ರದಲ್ಲಿ ಕಾಣಿಸಿಕೊಳ್ಳಲಿರುವ ಪಾತ್ರವರ್ಗದಿಂದ ಸಿನಿಮಾ ಗಮನ ಸೆಳೆದಿತ್ತು. ಆದರೀಗ ಇದೆಲ್ಲವನ್ನು ಮೀರಿಸುವಂತೆ ಹೊಸ ಟಾಕ್ವೊಂದನ್ನು ಗಾಂಧಿನಗರದಲ್ಲಿ ಸೃಷ್ಟಿಯಾಗಿದೆ.
ಅದೇನೆಂದರೆ ‘ಯುವರತ್ನ’ದಲ್ಲಿ ಪವರ್ ಸ್ಟಾರ್ ಜತೆ ಸೆಂಚುರಿ ಸ್ಟಾರ್ ಕೈ ಜೋಡಿಸಲಿರುವುದು. ಅಂದರೆ ಒಂದೇ ಚಿತ್ರದಲ್ಲಿ ರಾಜ್ ಕುಡಿಗಳು ಒಂದಾಗ್ತಾರೆ ಎಂಬ ಸುದ್ದಿಯೊಂದು ಹರಿದಾಡುತ್ತಿದೆ. ಸದ್ಯ ಕೇಳಿ ಬರುತ್ತಿರುವ ಸುದ್ದಿಗಳಲ್ಲಿ ಹೊಸ ಹವಾ ಸೃಷ್ಟಿಸಿರುವುದು ಪುನೀತ್ ರಾಜ್ಕುಮಾರ್ ಹಾಗೂ ಶಿವರಾಜ್ ಕುಮಾರ್ ‘ಯುವರತ್ನ’ದಲ್ಲಿ ಬಣ್ಣ ಹಚ್ಚಲಿದ್ದಾರೆ ಎಂಬುದು. ಈ ಸುದ್ದಿ ಕೇಳಿ ದೊಡ್ಮನೆ ಅಭಿಮಾನಿಗಳು ಹೌಹಾರಿದ್ದರು.
ಆದರೆ ಇಂತಹದೊಂದು ಸುದ್ದಿಯ ಜಾಡು ಹಿಡಿದು ಹೊರಟರೆ ಸಿಗುವ ಉತ್ತರವೇ ಬೇರೆ. ‘ಯುವರತ್ನ’ದಲ್ಲಿ ಪುನೀತ್ ರಾಜ್ಕುಮಾರ್ ಶಿವಣ್ಣನ ಅಭಿಮಾನಿಯಾಗಿ ಕಾಣಿಸಲಿದ್ದಾರಂತೆ. ಚಿತ್ರದಲ್ಲಿ ಬರುವ ಸನ್ನಿವೇಶವೊಂದರಲ್ಲಿ ‘ಓಂ’ ಚಿತ್ರದ ಪೋಸ್ಟರ್ ಕೂಡ ಕಾಣಿಸಲಿದೆ. ಹಾಗೆಯೇ ಥಿಯೇಟರ್ ಸೀನ್ವೊಂದರಲ್ಲಿ ಶಿವಣ್ಣ ಪರದೆಯೊಳಗಿನ ಪರದೆಯಲ್ಲಿ ಬರಲಿದ್ದಾರಂತೆ.
ಈ ಸನ್ನಿವೇಶದ ಚಿತ್ರೀಕರಣದ ವೇಳೆ ‘ಓಂ’ ಚಿತ್ರದ ಪೋಸ್ಟರ್ ಒಳಗೊಂಡ ಫೋಟೋವೊಂದು ವೈರಲ್ ಆಗಿದೆ. ಇದರಿಂದ ‘ಯುವರತ್ನ’ದಲ್ಲಿ ಶಿವರಾಜ್ ಕುಮಾರ್ ಇರಲಿದ್ದಾರೆಂಬ ವಂದತಿಗಳು ಗಾಂಧಿನಗರದಲ್ಲಿ ಹಬ್ಬಿದೆ. ಅದೇನೇಯಾದರು ‘ಯುವರತ್ನ’ದಲ್ಲಿ ‘ಸತ್ಯ’ನಾಗಿ ಪರೋಕ್ಷವಾಗಿ ಶಿವಣ್ಣ ಬಂದು ಹೋಗಲಿದ್ದಾರೆ ಎಂಬ ನಿರೀಕ್ಷೆಯಲ್ಲಿದ್ದಾರೆ ರಾಜ್ವಂಶ ಫ್ಯಾನ್ಸ್.
ಸದ್ಯ ‘ಯುವರತ್ನ’ ಚಿತ್ರದ ಚಿತ್ರೀಕರಣದಲ್ಲಿ ಅಪ್ಪು ತೊಡಗಿಸಿಕೊಂಡಿದ್ದು, ಈ ಚಿತ್ರದಲ್ಲಿ ಅಪ್ಪು ಕಾಲೇಜು ಸ್ಟೂಡೆಂಟ್ ಆಗಿ ಕಾಣಿಸಿಕೊಳ್ಳುತ್ತಿದ್ದಾರೆ. ಸಂತೋಷ್ ಆನಂದ್ರಾಮ್ ನಿರ್ದೇಶಿಸುತ್ತಿರುವ ಈ ಚಿತ್ರದಲ್ಲಿ ನಾಯಕಿಯಾಗಿ ಸಾಯೆಷಾ ಸೈಗಲ್ ಬಣ್ಣ ಹಚ್ಚುತ್ತಿದ್ದಾರೆ. ಹಾಗೆಯೇ ಚಿತ್ರದ ಪ್ರಮುಖ ಪಾತ್ರದಲ್ಲಿ ಡಾಲಿ ಧನಂಜಯ್, ಪ್ರಕಾಶ್ ರಾಜ್, ರಾಧಿಕಾ ಶರತ್ ಕುಮಾರ್ ಸೇರಿದಂತೆ ದೊಡ್ಡ ತಾರಾಬಳಗವೇ ಕಾಣಿಸಿಕೊಳ್ಳುತ್ತಿದೆ.
Comments are closed.