ಕನ್ನಡದ ರಿಯಲ್ ಸ್ಟಾರ್ ಉಪೇಂದ್ರ ಅವರು ತಮ್ಮ ಐ ಲವ್ ಯೂ ಪ್ರಮೋಶನ್ ವೇಳೆ ಹೊಸ ಸಂಗತಿಯೊಂದನ್ನು ಬಹಿರಂಗಪಡಿಸಿದ್ದಾರೆ. ನಾವು ಯಾರನ್ನಾದರೂ ತುಂಬಾ ಪ್ರೀತಿಸುತ್ತಿದ್ದರೆ, ಅಥವಾ ಅವರನ್ನು ನಾವು ಮಿಸ್ ಮಾಡಿಕೊಳ್ಳುತ್ತಿದ್ದೇವೆ ಎನಿಸಿದರೆ ಅದನ್ನು ನಾವು ಬಾಯಿಬಿಟ್ಟು ‘ಐ ಲವ್ ಯೂ’ ಅಥವಾ ‘ಐ ಮಿಸ್ ಯೂ’ ಎಂದು ಹೇಳಬೇಕಾಗಿಲ್ಲ. ಅದು ನಾವು ಮಾಡುವ ಚಟುವಟಿಕೆ ಅಥವಾ ಫೀಲ್ ಮೂಲಕವೂ ವ್ಯಕ್ತವಾಗಬಹುದು ಎಂದು ನಟ ಉಪೇಂದ್ರ ಹೇಳಿದ್ದಾರೆ.
ಇತ್ತೀಚೆಗೆ ತಮ್ಮ ಮುಂಬರುವ ಚಿತ್ರ ‘ಐ ಲವ್ ಯೂ’ ಪ್ರಮೋಶನ್ ವೇಳೆ ಮಾತನಾಡಿದ ನಟ ಉಪೇಂದ್ರ ಅವರು “ನಾವು ಯಾರನ್ನಾದರೂ ತುಂಬಾ ಪ್ರೀತಿಸುತ್ತಿದ್ದರೆ ಅಥವಾ ಮಿಸ್ ಮಾಡಿಕೊಳ್ಳುತ್ತಿದ್ದರೆ ಅವರಿಗೆ ‘ಐ ಲವ್ ಯೂ’ ಎಂದಾಗಲೀ ಅಥವಾ ‘ಐ ಮಿಸ್ ಯೂ’ ಎಂದಾಗಲೇ ಹೇಳಲೇಬೇಕು ಎಂದೇನಿಲ್ಲ. ನಾವು ಅವರನ್ನು ತುಂಬಾ ಇಷ್ಟಪಡುತ್ತೇವೆ ಎಂಬುದನ್ನು ಸೂಚ್ಯವಾಗಿಯೂ ಹೇಳಬಹುದು ಅಥವಾ ತಿಳಿಸಬಹುದು. ಇದಕ್ಕೆ ನಾನು ಕೇಳಿದ ಅತ್ಯತ್ತಮ ಉದಾಹರಣೆ ಎಂದರೆ ಡಾ ರಾಜ್‌ಕುಮಾರ್ ಹಾಗೂ ಪಾರ್ವತಮ್ಮ ಜೋಡಿ.
ಡಾ ರಾಜ್‌ಕುಮಾರ್ ಅವರು ಶೂಟಿಂಗ್ ಸಲುವಾಗಿ ತುಂಬಾ ದಿನಗಳು ಮನೆಯಿಂದ ಹೊರಗಡೆಯೇ ಇರುತ್ತಿದ್ದರು. ಆಗ ಸಹಜವಾಗಿಯೇ ಪಾರ್ವತಮ್ಮನವರಿಗೆ ಒಂಟಿತನ ಕಾಡುತ್ತಿತ್ತು. ಆದರೆ, ಅವರು ತಮ್ಮ ಪತಿ ಡಾ ರಾಜ್‌ಕುಮಾರ್ ಇಲ್ಲದಿರುವ ವೇಳೆಯಲ್ಲಿ ಅವರು ಉಟ್ಟುಕೊಳ್ಳುತ್ತಿದ್ದ ಪಂಚೆಯ ತುದಿಯನ್ನು ತಮ್ಮ ಬೆರಳಿಗೆ ಸುತ್ತಿಕೊಂಡು ಮಲಗುತ್ತಿದ್ದರಂತೆ. ಈ ಸಂಗತಿಯನ್ನು ನಾನು ಕೇಳಿದ್ದೇನೆ. ಇಲ್ಲಿ, ಅವರು ತಮ್ಮ ಪತಿಗೆ ನೇರವಾಗಿ ‘ಐ ಲವ್ ಯೂ’ ಎಂದು ಹೇಳದಿದ್ದರೂ ಅವರು ಅವರು ಮಿಸ್ ಮಾಡಿಕೊಂಡಿದ್ದು ಗ್ಯಾರಂಟಿ ಎಂಬುದು ನಡವಳಿಕೆಯೇ ಹೇಳುತ್ತದೆ.
ಇಂಥವುಗಳನ್ನೇ ನಾವು ಗ್ರೇಟ್ ಲವ್ ಎನ್ನಬಹುದು. ನಾವು ಯಾರಿಗೂ ಪದೇ ಪದೇ ಐ ಲವ್ ಯೂ ಎನ್ನಬೇಕಾಗಿಲ್ಲ. ಅಥವಾ ನಮ್ಮ ಪ್ರೀತಿಯನ್ನು ತೋರಿಸಿಕೊಳ್ಳಬೇಕಾಗಿಲ್ಲ. ಡಾ ರಾಜ್‌ಕುಮಾರ್-ಪಾರ್ವತಮ್ಮ ಅವರಂತೆ ಮಿಸ್ ಮಾಡಿಕೊಂಡಾಗ ಸೈಲೆಂಟಾಗಿಯೂ ಫೀಲ್ ಮಾಡಬಹುದು. ಇದನ್ನೇ ಗ್ರೇಟ್ ಲವ್ ಎನ್ನುವುದು” ಎಂದಿದ್ದಾರೆ ನಟ-ನಿರ್ದೇಶಕ ಉಪೇಂದ್ರ.
ಅಂದಹಾಗೆ, ಉಪೇಂದ್ರ-ರಚಿತಾ ರಾಮ್ ಜೋಡಿಯ ‘ಐ ಲವ್ ಯೂ’ ಚಿತ್ರವು ಇದೇ ಶುಕ್ರವಾರ, ಅಂದರೆ ಜೂನ್ 14, 2019ರಂದು ಕರ್ನಾಟಕ ಹಾಗೂ ಆಂಧ್ರದಲ್ಲಿ ಬಿಡುಗಡೆಯಾಗಲಿದೆ. ಬರೋಬ್ಬರಿ 1000 ಸ್ಕ್ರೀನ್‌ಗಳಲ್ಲಿ ಬಿಡುಗಡೆಯಾಗಲಿರುವ ಈ ಚಿತ್ರದಲ್ಲಿ ನಟಿ ಸೋನು ಗೌಡ ಪ್ರಮುಖ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. ಈ ಚಿತ್ರದ ಕಥೆ ತೀರಾ ಭಿನ್ನವಾಗಿದ್ದು, ಕಥೆಗೂ ನಟಿ ರಚಿತಾ ರಾಮ್ ಈ ಚಿತ್ರದಲ್ಲಿ ತುಂಬಾ ಬೋಲ್ಡ್ ಆಗಿ ಕಾಣಿಸಿಕೊಂಡಿದ್ದಕ್ಕೂ ಭಾರೀ ನಂಟಿದೆ ಎನ್ನಲಾಗಿದೆ. ಇನ್ನೇನು ಬಿಡುಗಡೆ ಕ್ಷಣ ಸಮೀಪಿಸುತ್ತಿದೆ. ಸಿನಿಮಾ ನೋಡಲು ಸಿನಿಪ್ರೇಕ್ಷಕರು ಸಜ್ಜಾಗಬಹುದು.
Comments are closed.