ಕಿರುತೆರೆ ನಟಿ ಕೈಹಿಡಿಯಲಿರುವ ಪವನ್ ಒಡೆಯರ್

ನಟ, ನಿರ್ದೇಶಕ ಪವನ್ ಒಡೆಯರ್ ದಾಂಪತ್ಯ ಜೀವನಕ್ಕೆ ಅಡಿಯಿಡುತ್ತಿದ್ದಾರೆ. ಇದೇ ಡಿಸೆಂಬರ್ 7ರಂದು ಪವನ್ ನಿಶ್ಚಿತಾರ್ಥ ನಡೆಯಲಿದೆ. ಅವರು ಕೈಹಿಡಿಯಲಿರುವ ಯುವತಿ ಹೆಸರು ಅಪೇಕ್ಷಾ. ಈ ಬಗ್ಗೆ ಸ್ವತಃ ಪವನ್ ಒಡೆಯರ್ ಈ ರೀತಿ ತಮ್ಮ ಫೇಸ್‍ಬುಕ್‌ನಲ್ಲಿ ಬರೆದುಕೊಂಡಿದ್ದಾರೆ.

‘ಹೌದು.. ಕೊನೆಗೂ ಆ ದಿನ ಬಂದೇ ಬಿಟ್ಟಿತು. ನನ್ನ ಮುಂದಿನ ಜೀವನದ ಹೆಜ್ಜೆಯ ಜೊತೆ ಹೆಜ್ಜೆ ಇಡಲು ಗುರು ಹಿರಿಯರು ನಿಶ್ಚಯಿಸಿರುವ,ಅಪೇಕ್ಷೆ ಪಟ್ಟಿರುವ ಅಪೇಕ್ಷಾಳ ಜೊತೆ ನನ್ನ ನಿಶ್ಚಿತಾರ್ಥ, ಇದೇ ಡಿಸೆಂಬರ್ ಏಳನೇ ತಾರೀಖು ನಿಮ್ಮೆಲ್ಲರ ಶುಭಾಶೀರ್ವಾದ ನಮ್ಮ ಮೇಲೆ ಇರಲಿ. ಧನ್ಯವಾದಗಳು’ ಎಂದಿದ್ದಾರೆ.

ಪವನ್ ಒಡೆಯರ್ ಅವರ ಬಾಳಸಂಗಾತಿ ಆಗುತ್ತಿರುವ ಅಪೇಕ್ಷಾ ಅವರು ಕೆಲವು ಕಿರುತೆರೆ ಧಾರಾವಾಹಿಗಳಲ್ಲಿ ಅಭಿನಯಿಸಿದ್ದಾರೆ. ಇತ್ತೀಚೆಗೆ ತೆರೆಕಂಡ ಟಿ ಎನ್ ಸೀತಾರಾಮ್ ನಿರ್ದೇಶನದ ಕಾಫಿತೋಟ ಸಿನಿಮಾದಲ್ಲಿ ಸಹನಟಿಯಾಗಿ ಕಾಣಿಸಿದ್ದಾರೆ. ಪವನ್ ಒಡೆಯರ್ ಅವರು ಗೋವಿಂದಾಯ ನಮಃ, ಗೂಗ್ಲಿ, ರಣವಿಕ್ರಮ ಚಿತ್ರಗಳನ್ನು ನಿರ್ದೇಶಿಸಿದ್ದು, ಬಹುಪರಾಕ್, ಪ್ರೀತಿ ಗೀತಿ ಇತ್ಯಾದಿ ಚಿತ್ರಗಳಲ್ಲಿ ಅಭಿನಯಿಸಿದ್ದಾರೆ.