ರಂಗಿತರಂಗ: ಭೂತದ ರಂಗು, ಪ್ರೇಕ್ಷಕ ದಂಗು

ವಿಮರ್ಶಕರ ರೇಟಿಂಗ್ :
ಪಾತ್ರವರ್ಗ: ನಿರೂಪ್ ಭಂಡಾರಿ, ರಾಧಿಕಾ ಚೇತನ್, ಸಾಯಿಕುಮಾರ್, ಅವಂತಿಕಾ ಶೆಟ್ಟಿ, ಅರವಿಂದ್ ರಾವ್, ಅನಂತವೇಲು, ಚೇತನ್ ಬಾಬು
ನಿರ್ದೇಶನ: ಅನೂಪ್ ಭಂಡಾರಿ
ಓದುಗರ ರೇಟಿಂಗ್ :

* ಪ್ರವೀಣ್ ಚಂದ್ರ

ಹೊಸಬರ ಹೊಸತನದ ಸಿನಿಮಾಕ್ಕೆ ಹೊಸ ಸೇರ್ಪಡೆ ‘ರಂಗಿತರಂಗ’. ಪ್ರೇಕ್ಷಕರನ್ನು ಒಂದಿಷ್ಟು ರಂಗಾಗಿಸುತ್ತ ದಂಗುಬಡಿಸುವಲ್ಲಿ ನಿರ್ದೇಶಕ ಅನೂಪ್ ಭಂಡಾರಿ ಯಶಸ್ವಿಯಾಗಿದ್ದಾರೆ. ತುಳುನಾಡಿನ ಭೂತದ ವೇಷದ ರಂಗು, ಗಗ್ಗರದ ಸದ್ದಿಗೆ ಹಾರರ್ ಲುಕ್ ನೀಡಲಾಗಿದೆ. ಗುಡ್ಡದ ಭೂತ ಸಿನಿಮಾದ 2ನೇ ಭಾಗವೋ ಎಂಬ ಕುತೂಹಲ ಅಲ್ಲಲ್ಲಿ ಮೂಡುತ್ತದೆ. ಮರಳು ಮಾಫಿಯಾದ ಬಗ್ಗೆಯೂ ಚಿತ್ರ ಮಾತನಾಡುತ್ತದೆ.

ಚಿತ್ರದ ಕತೆ ಒಂದೇ ಗುಟುಕಿಗೆ ಅರ್ಥವಾಗದು. ಯಾವುದು ಕತೆ, ಯಾವುದು ಉಪಕತೆ, ಯಾವುದು ನಿಜ, ಯಾವುದು ಭ್ರಮೆ ಇತ್ಯಾದಿ ಗೊಂದಲ ಜೊತೆಯಾಗುತ್ತದೆ. ಗೌತಮ್ (ನಿರೂಪ್)ನ ಹೊಸ ಕಾದಂಬರಿ ‘ರಂಗಿತರಂಗ’. ಅದರಲ್ಲಿ ಆತನ ಹಿಂದಿನ ಕತೆಯಿರುತ್ತದೆ. ಅದಕ್ಕೆ ಇಂದು(ರಾಧಿಕಾ) ಮುಖಪುಟ ರಚಿಸುತ್ತಾಳೆ. ಅನುಷ್ಕು ಎಂಬ ಗುಪ್ತ ಕಾವ್ಯನಾಮದಲ್ಲಿ ಕಾದಂಬರಿ ಬರೆಯುವ ವ್ಯಕ್ತಿ ಹುಡುಕಾಟದಲ್ಲಿ ಸಂಧ್ಯಾ(ಅವಂತಿಕ) ತೊಡಗಿರುತ್ತಾಳೆ.

ಈ ಮೂರೂ ಪಾತ್ರಗಳು ಕಮರೊಟ್ಟು ಎಂಬ ಊರಿಗೆ ಬರುತ್ತವೆ. ಗೌತಮ್ ತನ್ನ ಪತ್ನಿ ಇಂದು ಜೊತೆ ಬರುತ್ತಾನೆ. ಆಕೆ ಗರ್ಭಿಣಿ. ಇಂದುವಿನ ಪೂರ್ವಿಕರ ಮನೆ ಜನರಿಲ್ಲದೆ ಭೂತ ಬಂಗಲೆಯಂತೆ ಇರುತ್ತದೆ. ಅಲ್ಲಿ ಅಂಗಾರ ಭೂತ, ಬ್ರಹ್ಮರಾಕ್ಷಸದ ಉಪದ್ರವ ಇದೆ ಅಂತಾರೆ ಊರಿನವರು. ಒಂದಿನ ಇಂದು ಕಾಣೆಯಾಗುತ್ತಾಳೆ. ಭೂತವೇಷದ ಮುಖವರ್ಣಿಕೆ, ಗಗ್ಗರ, ಗೆಜ್ಜೆ ಸದ್ದು ಮೇಲೈಸುತ್ತದೆ.

ಹಾರರ್ ಸಿನಿಮಾಗಳಲ್ಲಿ ಸಾಮಾನ್ಯವಾಗಿ ಬಳಸುವ ಪ್ರತಿಮೆಗಳನ್ನೇ ಇಲ್ಲೂ ಬಳಸಲಾಗಿದೆ. ಅಂದರೆ, ಸಡನ್ ಆಗಿ ಎದುರಾಗುವ ಭಯಾನಕ ಮುಖ, ಅಪರಿಚಿತ ಸ್ಥಳದಲ್ಲಿ ಕಾರ್ ಸ್ಟಾರ್ಟ್ ಆಗದೆ ಇರುವುದು ಇತ್ಯಾದಿ. ಹೆಚ್ಚಿನ ಹಾರರ್ ಚಿತ್ರಗಳಲ್ಲಿ ದೆವ್ವ ಪಿಶಾಚಿಗಳಿದ್ದರೆ ರಂಗಿತರಂಗದಲ್ಲಿ ಭೂತಾರಾಧನೆಯನ್ನು ಬಳಸಿಕೊಳ್ಳಲಾಗಿದೆ. ಯಕ್ಷಗಾನದ ಹಾಡುಗಳು, ರಾಕ್ಷಸರ ಸಂಭಾಷಣೆ ಮೂಲಕವೂ ‘ಭಯ’ ಸೃಷ್ಟಿಸಲು ನಿರ್ದೇಶಕರು ಪ್ರಯತ್ನಿಸಿದ್ದಾರೆ.

ನಾಯಕ ನಿರೂಪ್ ನಟನೆ ಉತ್ತಮ. ರಾಧಿಕಾ, ಅವಂತಿಕಾ ನಟನೆ ಪರವಾಗಿಲ್ಲ. ಪೋಸ್ಟ್ ಮ್ಯಾನ್ ಕಾಳಿಂಗ(ಸಾಯಿಕುಮಾರ್), ಶಂಕರ್(ಅನಂತವೇಲು) ಮೇಸ್ಟ್ರು, ಇನ್‌ಸ್ಪೆಕ್ಟರ್ ಬಸವರಾಜ್(ಅರವಿಂದ್ ರಾವ್) ಪಾತ್ರಗಳೂ ಗಮನ ಸೆಳೆಯುತ್ತವೆ. ಭೂತದ ವೇಷದಲ್ಲಿ ಸಾಯಿಕುಮಾರ್ ಭರ್ಜರಿಯಾಗಿ ನಟಿಸಿದ್ದಾರೆ. ಅಕ್ಕಪಕ್ಕ ಹಕ್ಕಿಪುಕ್ಕ ಸೇರಿದಂತೆ ಅಚ್ಚಕನ್ನಡದ ಹಾಡುಗಳು ಕೇಳಲು ಹಿತವಾಗಿದೆ. ಬಾಲಿವುಡ್‌ನ ಲಾನ್ಸ್ ಕಾಪ್ಲೊನ್, ವಿಲಿಯಂ ಡೇವಿಡ್ ಕ್ಯಾಮೆರಾಗಳು ದೃಶ್ಯಗಳನ್ನು ಅನನ್ಯವಾಗಿ ಸೆರೆಹಿಡಿದಿವೆ. ಹಿನ್ನೆಲೆ ಸಂಗೀತವೂ ಚಿತ್ರದ ಜೀವಾಳ.

ಚಿತ್ರ ಸಂಪೂರ್ಣವಾಗಿ ಪರ್ಫೆಕ್ಟ್ ಎಂದಲ್ಲ. ಮೊದಲಾರ್ಧ ನಿಧಾನಗತಿಯಲ್ಲಿ ಸಾಗುತ್ತದೆ. ಕೆಲವೊಮ್ಮೆ ದೃಶ್ಯದಿಂದ ದೃಶ್ಯಕ್ಕೆ ಕತೆ ಸಿಂಕ್ ಆಗದೆ ಪ್ರೇಕ್ಷಕನಿಗೆ ಗೊಂದಲವಾಗುತ್ತದೆ. ಇಂತಹ ಹಲವು ಲೋಪಗಳನ್ನು ಬದಿಗಿರಿಸಿ ನೋಡಿದರೆ ಹೊಸಬರ ವಿಭಿನ್ನ ಪ್ರಯತ್ನಕ್ಕೆ ಶಹಬ್ಬಾಸ್ ಎನ್ನಬಹುದು.